ਭਗਵੰਤ ਮਾਨ ਨੇ ਨਵੇਂ ਗੀਤ 'ਨਨਕਾਣਾ' ਨੇ ਮਚਾਈ ਸੋਸ਼ਲ ਮੀਡੀਆ 'ਤੇ ਧੂਮ
ਨਵੇਂ ਸਾਲ ਦੇ ਮੌਕੇ ਆਮ ਆਦਮੀ ਪਾਰਟੀ ਦੇ ਸੰਗਰੂਰ ਤੋਂ ਸਾਂਸਦ ਭਗਵੰਤ ਮਾਨ ਦਾ ਸ੍ਰੀ ਨਨਕਾਣਾ ਸਾਹਿਬ ਨੂੰ ਲੈ ਕੇ ਇਕ ਧਾਰਮਿਕ
ਚੰਡੀਗੜ੍ਹ : ਨਵੇਂ ਸਾਲ ਦੇ ਮੌਕੇ ਆਮ ਆਦਮੀ ਪਾਰਟੀ ਦੇ ਸੰਗਰੂਰ ਤੋਂ ਸਾਂਸਦ ਭਗਵੰਤ ਮਾਨ ਦਾ ਸ੍ਰੀ ਨਨਕਾਣਾ ਸਾਹਿਬ ਨੂੰ ਲੈ ਕੇ ਇਕ ਧਾਰਮਿਕ ਗੀਤ ਸੋਸ਼ਲ ਮੀਡੀਆ 'ਤੇ ਕਾਫ਼ੀ ਧੂਮ ਮਚਾ ਰਿਹਾ ਹੈ। ਅਪਣੇ ਫੇਸਬੁੱਕ ਪੇਜ਼ 'ਤੇ ਸ਼ੇਅਰ ਕੀਤੇ ਭਗਵੰਤ ਮਾਨ ਵੱਲੋਂ ਗਾਏ ਗਾਣੇ ਦੇ ਬੋਲ ਕੁੱਝ ਇਸ ਤਰ੍ਹਾਂ ਹਨ :
ਮੇਰੇ ਮਨ ਮੰਦਰ ਵਿਚ ਵਸਦਾ ਐ ਮੈਥੋਂ ਦੂਰ ਨਹੀਂ ਨਨਕਾਣਾ,
ਹਰ ਦਮ ਦੇ ਗੇੜੇ ਦਰਸ ਕਰਾਂ ਹੈ ਹਰ ਪਲ ਆਣਾ ਜਾਣਾ।
ਦਿਲ ਕਰਦਾ ਐ ਤੇਰਾ ਅਸਲ ਟਿਕਾਣਾ ਦੇਖਣ ਨੂੰ,
ਨੈਣ ਤਰਸਦੇ ਰਹਿੰਦੇ ਨੇ ਨਨਕਾਣਾ ਦੇਖਣ ਨੂੰ।
ਗੁਰੂ ਜੀ ਮੇਰੇ ਨੈਣ ਤਰਸਦੇ ਰਹਿੰਦੇ ਨੇ ਨਨਕਾਣਾ ਦੇਖਣ ਨੂੰ,
ਕਰਤਾਰਪੁਰ ਨੂੰ ਜਾਂਦੇ ਰਾਹ ਨੂੰ ਫੁੱਲਾਂ ਨਾਲ ਸਜਾਵਾਂ ਮੈਂ,
ਕਰਮਭੂਮੀ ਦੀ ਮਿੱਟੀ ਚੁੰਮ ਕੇ ਮੱਥੇ ਦੇ ਨਾਲ ਲਾਵਾਂ ਮੈਂ,
ਏਕੀ ਧੂੜ ਚੜ੍ਹਾਵੇ ਕੀਤੇ ਹੋਏ ਸਰਵੇਖਣ ਨੂੰ,
ਮੇਰੇ ਨੈਣ ਤਰਸਦੇ ਰਹਿੰਦੇ ਨੇ ਨਨਕਾਣਾ ਦੇਖਣ ਨੂੰ।
ਗੁਰੂ ਜੀ ਮੇਰੇ ਨੈਣ ਤਰਸਦੇ ਰਹਿੰਦੇ ਨੇ ਨਨਕਾਣਾ ਦੇਖਣ ਨੂੰ।
ਪਾਣੀ, ਹਵਾ ਤੇ ਧਰਤੀ ਅਸੀਂ ਸਭ ਜ਼ਹਿਰੀਲੀ ਕਰਤੀ,
ਲੱਗਣ ਮੇਲੇ ਮੜ੍ਹੀ ਮਸਾਣੀ ਰੁਲਦੀ ਗਲੀਆਂ ਦੇ ਵਿੱਚ ਬਾਣੀ,
ਕਰ ਲਈਆਂ ਦੌਲਤਾਂ ਇਕੱਠੀਆਂ ਤੇਰੇ ਨਾਂ 'ਤੇ ਖੋਲ੍ਹ ਕੇ ਹੱਟੀਆਂ,
ਏਤੀ ਮਾਰ ਪਈ ਕੁਰਲਾਵੇ ਤੁਮ ਰਤਾ ਤਰਸ ਨਾ ਖਾਵੇ,
ਅਸੀਂ ਭੁੱਲ ਕੇ ਕਰਨੀਆਂ ਕਿਰਤਾਂ ਪੈ ਗਈਆਂ ਵਿਹਲੇ ਖਾਣ ਦੀਆਂ ਬਿਰਤਾਂ,
ਮੈਂ ਉੱਜੜਾ ਭਾਵੇਂ ਵੱਸਾ ਅੱਜ ਤੇਰੇ ਦਰ 'ਤੇ ਦੱਸਾਂ,
ਫੇਰ ਸ਼ਾਂਤੀ ਆਊ ਮੇਰੀ ਰੂਹ ਪਰਦੇਸਣ ਨੂੰ,
ਨੈਣ ਤਰਸਦੇ...।
ਤੇਰੇ ਨਾਮ ਜ਼ਹਾਜ ਦੇ ਉੱਤੇ ਜਿਹੜੇ ਅੱਜ ਕੱਲ੍ਹ ਚੜ੍ਹਦੇ ਨੇ,
ਮੈਂ ਲਿਆਂਦਾ ਮੈਂ ਖੁਲਵਾਇਆ ਏਸੇ ਗੱਲ 'ਤੇ ਲੜਦੇ ਨੇ,
ਮੈਂ ਲਿਆਂਦਾ ਮੈਂ ਖੁਲ੍ਹਵਾਇਆ ਏਸੇ
ਗੱਲ ਗੱਲ ਤੇ ਕਾਹਲੇ ਰਹਿੰਦੇ ਪੰਥ 'ਚੋਂ ਛੇਕਣ ਨੂੰ
ਨੈਣ ਤਰਸਦੇ...।
ਜੀਹਦੇ ਵੱਲ ਵੀ ਤੇਰੀ ਦਾਤਿਆਂ ਹੋਜੇ ਨਜ਼ਰ ਸਵੱਲੀ
ਹਰ ਮੈਦਾਨ ਫਿਰ ਫਤਹਿ ਕਰਨ ਦੀ ਦਿਲ ਨੂੰ ਹੋਏ ਤਸੱਲੀ
ਔਖੀਆਂ ਰਾਹਾਂ ਲੰਮੇ ਪੈਂਡੇ ਬੇੜਾ ਪਾਰ ਜੋ ਚਰਨੀ ਬਹਿੰਦੇ
ਸੱਜਦਾ ਕਰਦੀ ਦੁਨੀਆਂ ਸਾਰੀ ਤੇਰੇ ਨਾਮ ਦੀ ਚੜ੍ਹੀ ਖੁਮਾਰੀ
ਕੱਢ ਗੁਮਾਨ ਮੈਂ ਹੋਵਾਂ ਨੀਵਾਂ ਤੇਰੀ ਸ਼ਰਨ 'ਚ ਰਹਿ ਕੇ ਜੀਵਾਂ
ੴਦਾ ਸੁਣ ਕੇ ਹੋਕਾ ਮਿਟ ਜੇ ਮਨ ਬੰਜਰ ਦਾ ਸੋਕਾ
ਜੇ ਮੈਂ ਦੇਖਾ ਅਮਲਾਂ ਵੱਲੋਂ ਤਾਂ ਫਿਰ ਕੁੱਝ ਨੀ ਮੇਰੇ ਪੱਲੇ
ਵੇਖਾਂ ਤੇਰੀ ਰਹਿਮਤ ਵੱਲੇ ਤਾਂ ਫਿਰ ਬੱਲੇ ਬੱਲੇ ਬੱਲੇ
ਜਾਣ ਤੋਂ ਪਹਿਲਾਂ ਇਕ ਵਾਰੀ ਮੈਂ ਜਾਣਾ ਦੇਖਣ ਨੂੰ
ਮੇਰੇ ਨੈਣ ਤਰਸਦੇ...।
ਤੇਰੇ ਘਰ ਨੂੰ ਜਾਂਦੇ ਰਾਹ ਵਿਚ ਅੱਜ ਵੀ ਬਹੁਤੇ ਰੋ ਰਹੇ ਨੇ
ਤੈਨੂੰ ਮੰਨਣ ਲੱਖਾਂ ਤੇਰੀਆਂ ਮੰਨਣ ਵਾਲੇ ਥੋੜ੍ਹੇ ਨੇ
ਚੁੱਲ੍ਹਾ ਤੇਰੇ ਨਾਂ ਤੇ ਫਿਰਦੇ ਰੋਟੀਆਂ ਸੇਕਣ ਨੂੰ
ਗੁਰੂ ਜੀ ਮੇਰੇ ਨੈਣ ਤਰਸਦੇ ਰਹਿੰਦੇ ਨੇ ਨਨਕਾਣਾ ਦੇਖਣ ਨੂੰ।
ਅਪਣੇ ਇਸ ਗਾਣੇ ਦੇ ਬੋਲਾਂ ਵਿਚ ਭਗਵੰਤ ਮਾਨ ਜਿੱਥੇ ਨਨਕਾਣਾ ਸਾਹਿਬ ਨੂੰ ਦੇਖਣ ਦੀ ਇੱਛਾ ਜ਼ਾਹਰ ਕਰ ਰਿਹਾ ਹੈ। ਉਥੇ ਹੀ ਉਸ ਗਾਣੇ ਦੇ ਇਕ ਪੈਰ੍ਹੇ ਵਿਚ ਕਿਹਾ ਕਿ ਗੁਰੂ ਜੀ ਤੁਸੀਂ 'ਪਵਨ ਗੁਰੂ ਪਾਣੀ ਪਿਤਾ ਮਾਤਾ ਧਰਤ ਮਹੱਤ' ਦਾ ਉਪਦੇਸ਼ ਦਿੱਤਾ ਸੀ ਕਿ ਪਰ ਬਦਕਿਸਮਤੀ ਅਸੀਂ ਇਨ੍ਹਾਂ ਸਾਰਿਆਂ ਨੂੰ ਹੀ ਪਲੀਤ ਕਰ ਦਿੱਤਾ। ਇਸ ਦੇ ਨਾਲ ਹੀ ਭਗਵੰਤ ਮਾਨ ਨੇ ਨਸ਼ਿਆਂ 'ਚ ਗਲਤਾਨ ਹੋ ਰਹੀ ਨੌਜਵਾਨੀ ਦੀ ਗੱਲ ਕਰਦਿਆਂ ਮੌਜੂਦਾ ਹਾਕਮਾਂ 'ਤੇ ਵੀ ਤੰਜ ਕੀਤਾ।
ਇਸ ਦੇ ਨਾਲ ਗਾਣੇ ਤੀਜੇ ਪੈਰ੍ਹੇ ਵਿਚ ਭਗਵੰਤ ਮਾਨ ਨੇ ਉਨ੍ਹਾਂ ਲੋਕਾਂ 'ਤੇ ਵੀ ਨਿਸ਼ਾਨਾ ਸਾਧਿਆ ਜੋ ਸ੍ਰੀ ਕਰਤਾਰਪੁਰ ਸਾਹਿਬ ਦੇ ਲਾਂਘੇ ਦਾ ਸਿਹਰਾ ਲੈਣ ਦੀ ਸਿਆਸਤ ਖੇਡਣ ਵਿਚ ਲੱਗੇ ਹੋਏ ਹਨ। ਇਸ ਦੇ ਨਾਲ ਹੀ ਆਪ ਸਾਂਸਦ ਨੇ ਅਪਣੇ ਗਾਣੇ ਵਿਚ ਪਾਖੰਡਵਾਦ ਵਿਚ ਪਏ ਲੋਕਾਂ ਨੂੰ ਵੀ ਲਪੇਟੇ ਵਿਚ ਲਿਆ। ਇਸ ਦੇ ਨਾਲ ਹੀ ਗੁਰੂ ਸਾਹਿਬ ਨੂੰ ਮੰਨਣ ਵਾਲੇ ਲੱਖਾਂ ਅਤੇ ਗੁਰੂ ਦੀ ਮੰਨਣ ਵਾਲੇ ਘੱਟ ਹੋਣ ਦੀ ਗੱਲ ਵੀ ਬਿਆਨ ਕੀਤੀ ਹੈ।
ਬ੍ਰੈਂਡ ਬੀ ਕੰਪਨੀ ਵੱਲੋਂ ਰਿਕਾਰਡ ਕੀਤਾ ਗਿਆ ਇਹ ਭਗਵੰਤ ਮਾਨ ਦਾ ਇਹ ਗਾਣਾ ਲੋਕਾਂ ਵੱਲੋਂ ਖ਼ੂਬ ਪਸੰਦ ਕੀਤਾ ਜਾ ਰਿਹਾ ਹੈ ਅਤੇ ਇਸ ਨੂੰ ਲੈ ਕੇ ਭਗਵੰਤ ਮਾਨ ਦੀ ਕਾਫ਼ੀ ਤਾਰੀਫ਼ ਕੀਤੀ ਜਾ ਰਹੀ ਹੈ। ਥੋੜ੍ਹੇ ਸਮੇਂ ਦੇ ਅੰਦਰ ਹੀ ਇਸ ਗਾਣੇ ਨੂੰ ਕਾਫ਼ੀ ਜ਼ਿਆਦਾ ਵਿਊਜ਼, ਕੁਮੈਂਟ ਅਤੇ ਸ਼ੇਅਰ ਮਿਲ ਚੁੱਕੇ ਹਨ।