ਪੰਚਕੂਲਾ : ਪੰਚਕੂਲਾ ਸੀਬੀਆਈ ਕੋਰਟ ਨੇ 400 ਸਾਧੁਆਂ ਨੂੰ ਨਪੁੰਸਕ ਬਣਾਉਣ ਦੇ ਮਾਮਲੇ ਵਿਚ ਡੇਰਾ ਸੱਚਾ ਸੌਦਾ ਮੁਖੀ ਰਾਮ ਰਹੀਮ ਨੂੰ ਜ਼ਮਾਨਤ ਦੇ ਦਿਤੀ ਹੈ। ਹਾਲਾਂਕਿ, ਸਾਧਵੀਆਂ ਨਾਲ ਬਲਾਤਕਾਰ ਮਾਮਲੇ ਵਿਚ ਦੋਸ਼ੀ ਠਹਿਰਾਏ ਗਏ ਰਾਮ ਰਹੀਮ ਨੂੰ ਜੇਲ੍ਹ ਵਿਚ ਰਹਿਣਾ ਹੋਵੇਗਾ। 400 ਸਾਧੁਆਂ ਨੂੰ ਨਪੁੰਸਕ ਬਣਾਏ ਜਾਣ ਦੇ ਮਾਮਲੇ ਵਿਚ ਪੰਚਕੂਲਾ ਸਥਿਤ ਸੀਬੀਆਈ ਦੀ ਵਿਸ਼ੇਸ਼ ਕੋਰਟ ਨੇ ਰਾਮ ਰਹੀਮ ਦੇ ਵਿਰੁਧ 3 ਅਗਸਤ 2018 ਨੂੰ ਇਲਜ਼ਾਮ ਤੈਅ ਕੀਤੇ ਸਨ। ਸਾਧਵੀ ਯੋਨ ਸ਼ੋਸ਼ਣ ਮਾਮਲੇ ਵਿਚ ਪਹਿਲਾਂ ਤੋਂ ਹੀ ਜੇਲ੍ਹ ਵਿਚ ਬੰਦ ਰਾਮ ਰਹੀਮ ਤੋਂ ਇਲਾਵਾ

ਇਸ ਮਾਮਲੇ ਵਿਚ ਡਾ. ਮੋਹਿੰਦਰ ਇੰਸਾ ਅਤੇ ਡਾ. ਪੀਆਰ ਗਰਗ ਨੂੰ ਵੀ ਆਰੋਪੀ ਬਣਾਇਆ ਗਿਆ ਹੈ। ਤਿੰਨਾਂ ਦੇ ਖਿਲਾਫ ਆਈਪੀਸੀ ਦੀ ਧਾਰਾ 326, 417, 506 ਅਤੇ 120ਬੀ ਦੇ ਤਹਿਤ ਇਲਜ਼ਾਮ ਤੈਅ ਕੀਤੇ ਗਏ। ਇਲਜ਼ਾਮ ਤੈਅ ਕਰਨ ਦੇ ਸਾਬਕਾ ਬਚਾਅ ਪੱਖ ਦੇ ਵਕੀਲ ਧਰੁਵ ਗੁਪਤਾ ਨੇ ਦਲੀਲ ਦਿਤੀ ਕਿ ਗੁਰਮੀਤ ਰਾਮ ਰਹੀਮ ਵਲੋਂ ਕਿਸੇ ਨੂੰ ਵੀ ਨਪੁੰਸਕ ਨਹੀਂ ਬਣਾਇਆ ਗਿਆ ਹੈ ਅਤੇ ਉਂਝ ਵੀ ਇਸ ਮਾਮਲੇ ਵਿਚ ਧਾਰਾ 326 ਨਹੀਂ ਬਣਦਾ ਕਿਉਂਕਿ ਜਿਨ੍ਹਾਂ ਲੋਕਾਂ ਨੂੰ ਨਪੁੰਸਕ ਬਣਾਉਣ ਦੀ ਗੱਲ ਆ ਰਹੀ ਹੈ, ਉਨ੍ਹਾਂ ਦੇ ਸਰਜਿਕਲ ਆਪਰੇਸ਼ਨ ਹੋਏ ਹਨ।  

ਗੁਰਮੀਤ ਰਾਮ ਰਹੀਮ 'ਤੇ ਇਲਜ਼ਾਮ ਹੈ ਕਿ ਉਸ ਨੇ ਸਾਲ 2000 ਵਿਚ ਮੁਕਤੀ ਪਾਉਣ ਦਾ ਝਾਂਸਾ ਦੇ ਕੇ 400 ਸਾਧੁਆਂ ਨੂੰ ਨਪੁੰਸਕ ਬਣਾ ਦਿਤਾ ਸੀ। ਇਲਜ਼ਾਮ ਹੈ ਕਿ ਅਜਿਹਾ ਇਸ ਲਈ ਕੀਤਾ ਗਿਆ ਤਾਕਿ ਇਹ ਸਾਧੁ ਬੱਚੇ ਜੰਮਣ ਤੋਂ ਮਹਿਰੂਮ ਹੋ ਜਾਣ ਅਤੇ ਡੇਰੇ ਦੇ ਪ੍ਰਤੀ ਵਫ਼ਾਦਾਰ ਬਣੇ ਰਹਿਣ। ਉਧਰ, ਮੁਕਤੀ ਨਾ ਮਿਲਣ 'ਤੇ ਇਹਨਾਂ ਸਾਧੁਆਂ ਨੇ ਇਸ ਦੀ ਸ਼ਿਕਾਇਤ 2012 ਵਿਚ ਕੀਤੀ।