ਕਿਸਾਨ ਅੰਦੋਲਨ ਦੀਆਂ ਸਟੇਜਾਂ ਉਤੇ ਲਗਾਤਾਰ ਗਾਇਕਾਂ, ਕਿਸਾਨ ਜਥੇਬੰਦੀਆਂ, ਅਤੇ ਸਮਾਜਸੇਵੀਆਂ ਦਾ ਆਉਣਾ ਜਾਣਾ ਬਣਿਆ ਹੋਇਆ ਹੈ। ਉਥੇ ਹੀ ਅੱਜ ਸੋਸ਼ਲ ਮੀਡੀਆ ‘ਤੇ ਸਰਗਰਮ ਰਹਿਣ ਵਾਲੇ ਭਾਨਾ ਸਿੱਧੂ ਨੇ ਕਿਸਾਨ ਅੰਦੋਲਨ ‘ਚ ਸ਼ਿਰਕਤ ਕੀਤੀ। ਇਸ ਦੌਰਾਨ ਭਾਨਾ ਸਿੱਧੂ ਨੇ ਦੇਸ਼ ਦੇ ਸਾਰੇ ਨੌਜਵਾਨਾਂ ਦਾ ਕਿਸਾਨ ਅੰਦੋਲਨ ‘ਚ ਮੋਢੇ ਨਾਲ ਮੋਢਾ ਜੋੜ ਕੇ ਸਾਥ ਦੇਣ ਲਈ ਧਨਵਾਦ ਕੀਤਾ ਤੇ ਕਿਹਾ ਕਿ ਇਸ ਅੰਦੋਲਨ ਤੋਂ ਪੰਜਾਬ ਦੇ ਨੌਜਵਾਨਾਂ ਨੇ ਬਹੁਤ ਕੁਝ ਸਿੱਖਣਾ ਹੈ ਜਿਵੇਂ ਸਾਡੇ ਪੰਜਾਬ ਨੂੰ ਭ੍ਰਿਸ਼ਟ ਨੇਤਾਵਾਂ ਨੇ ਕਿੰਝ ਲੁੱਟਿਆ ਹੈ।

ਉਨ੍ਹਾਂ ਕਿਹਾ ਕਿ ਜਿਹੜੇ ਕਿਸਾਨ ਵਿਰੋਧੀ ਕਾਨੂੰਨ ਹਾਲੇ ਤੱਕ ਰੱਦ ਕਿਉਂ ਨਹੀਂ ਹੋਏ, ਇਸ ਪਿੱਛੇ ਪੰਜਾਬ ਦੇ ਲੀਡਰਾਂ ਦਾ ਪੂਰਾ ਹੱਥ ਹੈ। ਭਾਨਾ ਨੇ ਸੁਖਬੀਰ ਬਾਦਲ ‘ਤੇ ਤਿੱਖਾ ਨਿਸ਼ਾਨਾ ਸਾਧਿਆ ਕਿਹਾ ਕਿ ਜਿਹੜੇ ਮੋਰਚੇ ‘ਤੇ 60 ਕਿਸਾਨਾਂ ਦੀ ਮੌਤ ਹੋਈ ਹੈ, ਸੁਖਬੀਰ ਬਾਦਲ ਨੂੰ ਇਨ੍ਹਾਂ ‘ਤੇ ਸਿਆਸਤ ਨਹੀਂ ਕਰਨੀ ਚਾਹੀਦੀ। ਇਸ ਦੌਰਾਨ ਹੀ ਭਾਨਾ ਨੇ ਕੈਪਟਨ ਅਮਰਿੰਦਰ ਸਿੰਘ ਨੂੰ ਲੰਮੇ ਹੱਥੀਂ ਲਿਆ, ਕਿਹਾ ਕਿ ਪੂਰਾ ਪੰਜਾਬ ਤਾਂ ਧਰਨੇ ‘ਤੇ ਪਰ ਕੈਪਟਨ ਸਾਬ ਅਡਾਨੀਆਂ ਦਾ ਨੈਸ਼ਨਲ ਹਾਈਵੇਅ ਕਢਵਾਈ ਜਾਂਦੇ ਹਨ।

ਭਾਨਾ ਸਿੱਧੂ ਨੇ ਇੱਥੇ ਸ਼੍ਰੀ ਬਰਾੜ ਉਤੇ ਹੋਏ ਪਰਚੇ ਦਾ ਜ਼ਿਕਰ ਵੀ ਕੀਤਾ, ਉਨ੍ਹਾਂ ਕਿਹਾ ਕਿ ਪਹਿਲਾਂ ਕਿਹੜਾ ਹਥਿਆਰਾ ਉਤੇ ਗੀਤ ਨਹੀਂ ਆਉਂਦੇ ਸੀ, ਇਹ ਤਾਂ ਅਮਿਤ ਸ਼ਾਹ ਦੇ ਕਹਿਣ ‘ਤੇ ਹੀ ਕੈਪਟਨ ਅਮਰਿੰਦਰ ਸਿੰਘ ਸ਼੍ਰੀ ਬਰਾੜ ਉਤੇ ਪਰਚਾ ਕਰਵਾਇਐ ਜੋ ਕਿ ਬਹੁਤ ਗਲਤ ਗੱਲ ਹੈ। ਇਸ ਦੌਰਾਨ ਭਾਨਾ ਸਿੱਧੂ ਨੇ ਪੰਜਾਬ ਦੇ ਲੀਡਰਾਂ ਨੂੰ ਮੂੰਹ-ਮੱਥੇ ਨਾ ਲਗਾਉਣ ਦੀ ਗੱਲ ਵੀ ਕਹੀ ਕਿ ਇਨ੍ਹਾਂ ਕਰਕੇ ਹੀ ਕਿਸਾਨ ਵਿਰੋਧੀ ਬਿਲ ਖਾਰਜ ਨਹੀਂ ਹੋ ਰਹੇ ਤੇ ਆਉਣ ਵਾਲੀਆਂ 2022 ਦੀਆਂ ਚੋਣਾਂ ਵਿਚ ਇਨ੍ਹਾਂ ਦੇ ਪਿੱਛੇ ਨਾ ਲੱਗਣ ਦੀ ਗੱਲ ਵੀ ਕਹੀ ਹੈ।

ਸਿੱਧੂ ਨੇ ਕਿਹਾ ਕਿ ਕਿਸਾਨਾਂ ਤੇ ਮਜ਼ਦੂਰਾਂ ਦੀ ਪੰਜਾਬ ‘ਚ ਅਜਿਹੀ ਪਾਰਟੀ ਹੋਵੇ ਜੋ ਸਾਡੇ ਹੱਕਾਂ ਦੀ ਗੱਲ ਕਰੇ। ਇਸ ਦੌਰਾਨ ਭਾਨਾ ਨੇ ਪੰਜਾਬ ਦੇ ਐਮ.ਪੀ ਤੇ ਐਮ.ਐਲ.ਏ ‘ਤੇ ਸਿਕੰਜ਼ਾ ਕਸਦਿਆ ਕਿਹਾ ਕਿ ਦਿੱਲੀ ਲੋਕ ਸਭਾ ਵਿਚ ਮੁਹੰਮਦ ਸਦੀਕ, ਐਮ.ਪੀ ਪਰਨੀਤ ਕੌਰ, ਤੇ ਹੋਰ ਕਈਂ ਲੀਡਰਾਂ ਨੇ ਕਦੇਂ ਵੀ ਸਾਡੇ ਕਿਸਾਨਾਂ ਬਾਰੇ ਕੋਈ ਵੀ ਮੁੱਦਾ ਨਹੀਂ ਚੁੱਕਿਆ। ਭਾਨਾ ਸਿੱਧੂ ਨੇ ਕਾਂਗਰਸੀਆਂ, ਅਕਾਲੀਆਂ ਤੇ ਆਪ ਨੂੰ ਚੈਲੇਂਜ ਕੀਤਾ ਕਿ ਜੇ ਤੁਸੀਂ ਕਿਸਾਨੀ ਦੇ ਪੱਖ ਵਿਚ ਹੋ ਤਾਂ ਇੱਕ ਮਹੀਨੇ ਲਈ ਵੱਡਾ ਏਅਰਪੋਰਟ ਰੋਡ ਜਾਮ ਕਰਕੇ ਦਿਖਾ ਦਓ ਫਿਰ ਅਸੀਂ ਸਮਝਾਗੇ ਕਿ ਤੁਸੀਂ ਕਿਸਾਨਾਂ ਦੇ ਹੱਕ ਵਿਚ ਹੋ।