Twelve Youths Assaulted A Women In Ludhiana After Kidnaping Her

ਲੁਧਿਆਣਾ : ਲੁਧਿਆਣਾ ਦੇ ਦਾਖਾ ਇਲਾਕੇ ਵਿਚ ਦੇਰ ਰਾਤ ਇਕ ਮੁਟਿਆਰ ਨੂੰ ਬੰਦੀ ਬਣਾ ਕੇ 12 ਨੌਜਵਾਨਾਂ ਨੇ ਕੁਕਰਮ ਕੀਤਾ। ਇਸ ਦੌਰਾਨ ਬਦਮਾਸ਼ਾਂ ਨੇ ਮੁਟਿਆਰ ਤੋਂ 14 ਹਜ਼ਾਰ ਰੁਪਏ, ਦੋ ਅੰਗੂਠੀਆਂ, ਦੋਵਾਂ ਦੇ ਪਰਸ ਅਤੇ ਮੋਬਾਇਲ ਖੋਹ ਲਏ। ਉਨ੍ਹਾਂ ਨੇ ਨੌਜਵਾਨ ਨੂੰ ਬੁਰੀ ਤਰ੍ਹਾਂ ਕੁੱਟਿਆ ਅਤੇ ਉਸ ਤੋਂ ਦੋ ਲੱਖ ਰੁਪਏ ਮੰਗਵਾਉਣ ਨੂੰ ਵੀ ਕਿਹਾ। ਬਦਮਾਸ਼ਾਂ ਦੋਵਾਂ ਦੀ ਕਾਰ ਦੇ ਸਟੀਰੀਓ ਅਤੇ ਸਪੀਕਰ ਵੀ ਲਾਹ ਕੇ ਲੈ ਗਏ। ਪੈਸੇ ਨਾ ਮਿਲਣ ਉਤੇ ਆਖ਼ਿਰਕਾਰ ਰਾਤ ਦੋ ਵਜੇ ਉਹ ਦੋਵਾਂ ਨੂੰ ਛੱਡ ਕੇ ਫ਼ਰਾਰ ਹੋ ਗਏ।

ਐਤਵਾਰ ਸ਼ਾਮ ਨੂੰ ਮੁੱਲਾਂਪੁਰ ਦਾਖਾ ਥਾਣਾ ਪੁਲਿਸ ਨੇ ਐਫਆਈਆਰ ਦਰਜ ਕਰ ਲਈ ਅਤੇ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿਤੀ ਹੈ। ਜਾਣਕਾਰੀ ਦੇ ਮੁਤਾਬਕ ਮਹਾਨਗਰ ਦੇ ਪਾਸ਼ ਇਲਾਕੇ ਦੇ ਨੌਜਵਾਨ ਅਤੇ ਮੁਟਿਆਰ ਸ਼ਨਿਚਰਵਾਰ ਰਾਤ ਸਾਢੇ ਅੱਠ ਵਜੇ ਕਾਰ ਵਿਚ ਸਵਾਰ ਹੋ ਕੇ ਸਾਉਥ ਸਿਟੀ ਵੱਲ ਨਿਕਲੇ। ਕਾਰ ਵਿਚ ਖਾਂਦੇ ਪੀਂਦੇ ਅਤੇ ਘੁੰਮਦੇ ਹੋਏ ਇੱਸੇਵਾਲ ਪਿੰਡ ਵਿਚ ਸੁੰਨਸਾਨ ਜਗ੍ਹਾ ‘ਤੇ ਪਹੁੰਚ ਗਏ। ਉੱਥੇ ਦੋ ਮੋਟਰਸਾਈਕਲਾਂ ਉਤੇ ਸਵਾਰ ਪੰਜ ਨੌਜਵਾਨਾਂ ਨੇ ਇੱਟਾਂ ਮਾਰ ਕੇ ਉਨ੍ਹਾਂ ਦੀ ਕਾਰ ਦੇ ਸ਼ੀਸ਼ੇ ਤੋੜ ਦਿਤੇ ਅਤੇ ਦੋਵਾਂ ਨੂੰ ਜ਼ਬਰਦਸਤੀ ਕਾਰ ਵਿਚੋਂ ਖਿੱਚ ਕੇ ਬਾਹਰ ਕੱਢ ਲਿਆ।

ਇਸ ਤੋਂ ਬਾਅਦ ਬਦਮਾਸ਼ ਦੋਵਾਂ ਨੂੰ ਅਗਵਾਹ ਕਰ ਕੇ ਪਿੰਡ ਦੇ ਇਕ ਫ਼ਾਰਮ ਹਾਊਸ ਵਿਚ ਲੈ ਗਏ। ਉੱਥੇ ਨੌਜਵਾਨ ਨੂੰ ਬੁਰੀ ਤਰ੍ਹਾਂ ਕੁੱਟਿਆ ਮਾਰਿਆ। ਉਨ੍ਹਾਂ ਨੇ ਰਾਤ ਸਾਢੇ ਦਸ ਵਜੇ ਦੇ ਕਰੀਬ ਨੌਜਵਾਨ ਨੂੰ ਕਿਹਾ ਕਿ ਉਹ ਫ਼ੋਨ ਕਰ ਕੇ ਦੋ ਲੱਖ ਰੁਪਏ ਮੰਗਵਾਏ। ਨੌਜਵਾਨ ਨੇ ਅਪਣੇ ਇਕ ਦੋਸਤ ਨੂੰ ਫ਼ੋਨ ਕੀਤਾ ਅਤੇ ਸਾਰੀ ਜਾਣਕਾਰੀ ਦੇ ਕੇ ਪੈਸੇ ਲੈ ਕੇ ਆਉਣ ਨੂੰ ਕਿਹਾ। ਨੌਜਵਾਨ ਨੇ ਪੁਲਿਸ ਨੂੰ ਦੱਸਿਆ ਕਿ ਇਸ ਦੌਰਾਨ ਬਦਮਾਸ਼ਾਂ ਨੇ ਅਪਣੇ ਸੱਤ ਹੋਰ ਸਾਥੀਆਂ ਨੂੰ ਸੱਦ ਲਿਆ। ਉਹ ਰਾਤ ਕਰੀਬ ਡੇਢ ਵਜੇ ਤੱਕ ਮੁਟਿਆਰ ਦੇ ਨਾਲ ਕੁਕਰਮ ਕਰਦੇ ਰਹੇ।

ਪੀੜਤ ਨੌਜਵਾਨ ਦਾ ਇਲਜ਼ਾਮ ਹੈ ਕਿ ਉਸ ਦਾ ਦੋਸਤ ਘਟਨਾ ਸਥਾਨ ਉਤੇ ਜਾਣ ਦੀ ਬਜਾਏ ਸਿੱਧਾ ਥਾਣਾ ਦਾਖਾ ਗਿਆ। ਉਸ ਨੇ ਉੱਥੇ ਮੌਜੂਦ ਪੁਲਿਸ ਮੁਲਾਜ਼ਮਾਂ ਨੂੰ ਘਟਨਾ ਦੀ ਸਾਰੀ ਜਾਣਕਾਰੀ ਦਿਤੀ ਪਰ ਕਰੀਬ ਡੇਢ ਘੰਟੇ ਤੱਕ ਪੁਲਿਸ ਉਸ ਦੇ ਨਾਲ ਨਹੀਂ ਗਈ। ਜਦੋਂ ਰਾਤ ਕਰੀਬ 12 ਵਜੇ ਪੁਲਿਸ ਵਾਲੇ ਗਏ ਪਰ ਉਹ ਘਟਨਾ ਸਥਾਨ ਤੱਕ ਨਹੀਂ ਪੁੱਜੇ ਅਤੇ ਖ਼ਾਲੀ ਹੱਥ ਵਾਪਸ ਪਰਤ ਆਏ। ਉੱਧਰ, ਦੇਰ ਰਾਤ ਕਰੀਬ ਢਾਈ ਵਜੇ ਦੋ ਬਦਮਾਸ਼ਾਂ ਨੂੰ ਛੱਡ ਕੇ ਬਾਕੀ ਉੱਥੋਂ ਚਲੇ ਗਏ। ਉਹ ਦੋਵੇਂ ਬਦਮਾਸ਼ ਤੱਦ ਗਏ ਜਦੋਂ ਨੌਜਵਾਨ ਨੇ ਕੋਲ ਪਈ ਸ਼ਰਾਬ ਦੀ ਖ਼ਾਲੀ ਬੋਤਲ ਇਕ ਬਦਮਾਸ਼ ਦੇ ਸਿਰ ਉਤੇ ਮਾਰ ਦਿਤੀ।

ਐਤਵਾਰ ਦੁਪਹਿਰ ਪੀੜਤ ਨੌਜਵਾਨ ਅਪਣੇ ਨਾਲ ਦੇਰ ਰਾਤ ਕੁੱਟਮਾਰ ਅਤੇ ਲੁੱਟ ਦੀ ਰਿਪੋਰਟ ਲਿਖਵਾਉਣ ਥਾਣੇ ਪਹੁੰਚਿਆ ਤਾਂ ਪੁਲਿਸ ਮੁਲਾਜ਼ਮਾਂ ਨੂੰ ਰਾਤ ਦੀ ਸੂਚਨਾ ਦੀ ਯਾਦ ਆਈ। ਦੇਰ ਸ਼ਾਮ ਪੁਲਿਸ ਅਧਿਕਾਰੀਆਂ ਨੂੰ ਘਟਨਾ ਦੀ ਜਾਣਕਾਰੀ ਦਿਤੀ ਗਈ। ਇਸ ਤੋਂ ਬਾਅਦ ਮੁਟਿਆਰ ਨੂੰ ਮੈਡੀਕਲ ਜਾਂਚ ਲਈ ਹਸਪਤਾਲ ਲਿਜਾਇਆ ਗਿਆ ਪਰ ਮਹਿਲਾ ਡਾਕਟਰ ਦੇ ਨਾ ਹੋਣ ਦੇ ਕਾਰਨ ਹੁਣ ਸੋਮਵਾਰ ਸਵੇਰੇ ਮੈਡੀਕਲ ਕਰਵਾਇਆ ਗਿਆ। ਉੱਧਰ, ਦੇਰ ਰਾਤ ਨੌਜਵਾਨ-ਮੁਟਿਆਰ ਨੂੰ ਘਟਨਾ ਸਥਾਨ ਉਤੇ ਲਿਜਾਇਆ ਗਿਆ, ਪੁਲਿਸ ਉੱਥੋਂ ਸਬੂਤ ਇਕੱਠਾ ਕਰ ਰਹੀ ਹੈ।

ਸ਼ਨਿਚਰਵਾਰ ਰਾਤ ਨੂੰ ਕੌਣ ਕਿਹੜੇ ਪੁਲਿਸ ਕਰਮਚਾਰੀ ਡਿਊਟੀ ਉਤੇ ਸਨ ਇਸ ਦੀ ਜਾਂਚ ਕਰਵਾਈ ਜਾਵੇਗੀ ਫਿਰ ਉਨ੍ਹਾਂ ਦੇ ਵਿਰੁਧ ਕਾਰਵਾਈ ਕੀਤੀ ਜਾਵੇਗੀ।