2 youths raped a minor girl

ਸਰਦੂਲਗੜ੍ਹ (ਪੀਟੀਆਈ) : ਸਕੂਲ ਜਾ ਰਹੀ ਨਬਾਲਗ ਵਿਦਿਆਰਥਣ ਨੂੰ ਦੋ ਨੌਜਵਾਨਾਂ ਨੇ ਜ਼ਬਰਨ ਕਾਰ ਵਿਚ ਬਿਠਾਇਆ ਅਤੇ ਫਿਰ ਉਸ ਨੂੰ ਖੇਤ ਵਿਚ ਬਣੀ ਮੋਟਰ ਦੇ ਕੋਲ ਲੈ ਗਏ। ਉਥੇ ਦੋਵਾਂ ਨੇ ਮਿਲ ਕੇ ਵਿਦਿਆਰਥਣ ਨੂੰ ਹਵਸ ਦਾ ਸ਼ਿਕਾਰ ਬਣਾਇਆ। ਇਸ ਤੋਂ ਬਾਅਦ ਨੌਜਵਾਨਾਂ ਨੇ ਧਮਕੀ ਦੇ ਕੇ ਵਿਦਿਆਰਥਣ ਨੂੰ ਛੱਡ ਦਿਤਾ। ਵਿਦਿਆਰਥਣ ਨੇ ਹੁਣ ਮਾਮਲੇ ਦੀ ਸ਼ਿਕਾਇਤ ਪੁਲਿਸ ਵਿਚ ਦਿੱਤੀ ਹੈ।

ਪੁਲਿਸ ਨੂੰ ਦਿਤੇ ਬਿਆਨਾਂ ਵਿਚ ਵਿਦਿਆਰਥਣ ਨੇ ਦੱਸਿਆ ਕਿ ਉਹ ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ ਵਿਚ 10ਵੀ ਜਮਾਤ ਦੀ ਵਿਦਿਆਰਥਣ ਹੈ। ਕੁਝ ਦਿਨ ਪਹਿਲਾਂ ਉਹ ਸਕੂਲ ਜਾ ਰਹੀ ਸੀ। ਇਸ ਦੌਰਾਨ ਰਸਤੇ ਵਿਚ ਉਸ ਦਾ ਵਾਕਫ਼ ਪਿੰਡ ਫਤਿਹਪੁਰ ਅਮ੍ਰਿਤਪਾਲ ਸਿੰਘ ਅਤੇ ਇਕ ਹੋਰ ਨੌਜਵਾਨ ਖੜ੍ਹਾ ਸੀ। ਇਸ ਦੌਰਾਨ ਅਮ੍ਰਿਤਪਾਲ ਅਤੇ ਉਸ ਦੇ ਦੋਸਤ ਨੇ ਉਸ ਨੂੰ ਜ਼ਬਰਨ ਕਾਰ ਵਿਚ ਬੈਠਾ ਲਿਆ।

ਵਿਦਿਆਰਥਣ ਦੇ ਮੁਤਾਬਕ ਉਹ ਕਾਰ ਨੂੰ ਸਿੱਧਾ ਫਤਿਹਪੁਰ ਪਿੰਡ ਵਿਚ ਸਥਿਤ ਖੇਤਾਂ ਦੇ ਵਿਚ ਬਣੀ ਮੋਟਰ ਦੇ ਕੋਲ ਲੈ ਗਏ। ਉਥੇ ਦੋਵਾਂ ਨੇ ਵਿਦਿਆਰਥਣ ਨਾਲ ਸਮੂਹਿਕ ਕੁਕਰਮ ਕੀਤਾ। ਬਾਅਦ ਵਿਚ ਦੋਵਾਂ ਨੇ ਕਾਰ ‘ਤੋਂ ਉਸ ਨੂੰ ਝੁਨੀਰ ਬਸ ਅੱਡੇ ਦੇ ਕੋਲ ਛੱਡ ਦਿਤਾ। ਦੋਵਾਂ ਨੇ ਉਸ ਨੂੰ ਧਮਕੀ ਦਿਤੀ ਕਿ ਜੇਕਰ ਉਸ ਨੇ ਇਸ ਸਬੰਧ ਵਿਚ ਕਿਸੇ ਨੂੰ ਦੱਸਿਆ ਤਾਂ ਉਹ ਉਸ ਨੂੰ ਅਤੇ ਉਸ ਦੇ ਪਰਵਾਰ ਨੂੰ ਜਾਨ ਤੋਂ ਮਾਰ ਦੇਣਗੇ।

ਵਿਦਿਆਰਥਣ ਜਦੋਂ ਘਰ ਪਹੁੰਚੀ ਤਾਂ ਉਸ ਨੇ ਸਾਰੀ ਗੱਲ ਅਪਣੀ ਮਾਂ ਨੂੰ ਦੱਸੀ। ਬਾਅਦ ਵਿਚ ਉਨ੍ਹਾਂ ਨੇ ਮਾਮਲੇ ਦੀ ਸ਼ਿਕਾਇਤ ਪੁਲਿਸ ਵਿਚ ਦਿਤੀ। ਸਬ ਡਿਵੀਜ਼ਨ ਸਰਦੂਲਗੜ ਦੇ ਡੀਐਸਪੀ ਸੰਜੀਵ ਗੋਇਲ ਨੇ ਦੱਸਿਆ ਕਿ ਵਿਦਿਆਰਥਣ ਦੇ ਬਿਆਨਾਂ ਦੇ ਆਧਾਰ ‘ਤੇ ਅਮ੍ਰਿਤਪਾਲ ਅਤੇ ਉਸ ਦੇ ਦੋਸਤ ਕੁਲਦੀਪ ਸਿੰਘ ਦੇ ਖਿਲਾਫ਼ ਕੇਸ ਦਰਜ ਕਰ ਲਿਆ ਗਿਆ ਹੈ। ਦੋਵਾਂ ਦੋਸ਼ੀਆਂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ ਹੈ।