Farmers unions protested

ਸ੍ਰੀ ਮੁਕਤਸਰ ਸਾਹਿਬ : ਪੰਜਾਬ ਦੀਆਂ ਸੱਤ ਸੰਘਰਸ਼ਸ਼ੀਲ ਕਿਸਾਨ ਜੱਥੇਬੰਦੀਆਂ ਦੇ ਸਾਂਝੇ ਮੋਰਚੇ ਦੇ ਸੱਦੇ ਤੇ ਡਿਪਟੀ ਕਮਿਸ਼ਨਰ ਦਫ਼ਤਰ ਸ੍ਰੀ ਮੁਕਤਸਰ ਸਾਹਿਬ ਵਿਖੇ ਤਿੰਨ ਕਿਸਾਨ ਜਥੇਬੰਦੀਆਂ ਨੇ ਧਰਨਾ ਦਿਤਾ। ਪੰਜਾਬ ਅਤੇ ਕੇਂਦਰ ਸਰਕਾਰ ਖਿਲਾਫ਼ ਜੰਮ ਕੇ ਨਾਅਰੇਬਾਜ਼ੀ ਕੀਤੀ। ਸ਼ਹਿਰ ਵਿਚ ਰੋਸ ਮੁਜ਼ਾਹਰਾ ਕਰਕੇ ਭਾਰਤੀ ਸਟੇਟ ਬੈਂਕ ਆਫ਼ ਇੰਡੀਆ ਦੇ ਅੱਗੇ ਆ ਕੇ ਮੁਜ਼ਾਹਰਾ ਸਮਾਪਤ ਕੀਤਾ। ਭਾਰਤੀ ਕਿਸਾਨ ਯੂਨੀਅਨ ਏਕਤਾ ਉਗਰਾਹਾਂ ਦੇ ਜ਼ਿਲ੍ਹਾ ਪ੍ਰਧਾਨ ਪੂਰਨ ਸਿੰਘ ਦੋਦਾ, ਕਿਰਤੀ ਕਿਸਾਨ ਯੂਨੀਅਨ ਦੇ ਜ਼ਿਲ੍ਹਾ ਪ੍ਰਧਾਨ ਬਲਵਿੰਦਰ ਸਿੰਘ ਭੁੱਟੀਵਾਲਾ,

ਕ੍ਰਾਂਤੀਕਾਰੀ ਕਿਸਾਨ ਯੂਨੀਅਨ ਦੇ ਕਨਵੀਰ ਟਹਿਲ ਸਿੰਘ ਹੁਸਨਰ ਨੇ ਸਾਂਝੇ ਤੌਰ ‘ਤੇ ਦਿਤੇ ਬਿਆਨ ਵਿਚ ਕਿਹਾ ਕਿ ਕਰਜ਼ਾਈ ਕਿਸਾਨਾਂ ਲਈ ਗਲੇ ਦਾ ਫਾਹਾ ਬਣੇ ਬੈਂਕਾਂ ਅਤੇ ਆੜ੍ਹਤੀਆਂ ਵਲੋਂ ਲਏ ਖ਼ਾਲੀ ਚੈੱਕ ਵਾਪਸ ਕਰਵਾਉਣ, ਗ੍ਰਿਫ਼ਤਾਰੀ ਵਾਰੰਟ ਵਾਪਸ ਕਰਵਾਉਣ, ਕੁਰਕੀ ਨਿਲਾਮੀ ਵਾਪਸ ਅਤੇ ਖ਼ਤਮ ਕਰਵਾਉਣ ਤੱਕ ਸੰਘਰਸ਼ ਜਾਰੀ ਰਹੇਗਾ। ਸੂਬਾ ਖਜ਼ਾਨਚੀ ਸਰਮੁੱਖ ਸਿੰਘ ਸੇਲਬਰਾ ਕ੍ਰਾਂਤੀਕਾਰੀ ਯੂਨੀਅਨ ਸੂਬਾ ਕਮੇਟੀ ਮੈਂਬਰ ਬਲਵਿੰਦਰ ਸਿੰਘ ਥਾਂਦੇਵਾਲਾ,

ਕਿਰਤੀ ਕਿਸਾਨ ਯੂਨੀਅਨ ਦੇ ਜਨਰਲ ਸਕੱਤਰ ਗੁਰਭਗਤ ਸਿੰਘ ਭਲਾਈਆਣਾ ਨੇ ਪੰਜਾਬ ਸਰਕਾਰ ਅਤੇ ਕੇਂਦਰ ਸਰਕਾਰ ਤੇ ਦੋਸ਼ ਲਾਉਂਦਿਆਂ ਕਿਹਾ ਕਿ ਜਿਥੇ ਪੰਜਾਬ ਸਰਕਾਰ ਕਿਸਾਨਾਂ ਦਾ ਸਮੁੱਚਾ ਕਰਜ਼ਾ ਮਾਫ਼ ਕਰਨ ਤੋਂ ਭੱਜ ਚੁੱਕੀ ਹੈ, ਉੱਥੇ ਹੀ ਸਗੋਂ ਐਲਾਨ ਕੀਤੀ ਪੰਜ ਏਕੜ ਤੱਕ ਨਿਗੁਣੀ ਰਾਸ਼ੀ 2 ਲੱਖ ਦੇਣ ਤੋਂ ਵੀ ਭੱਜ ਚੁੱਕੀ ਹੈ। ਸਰਕਾਰ ਇਕੱਲਾ ਫ਼ਸਲੀ ਕਰਜ਼ਾ ਮਾਫ਼ ਕਰਨ ਤੱਕ ਸੀਮਤ ਹੋ ਗਈ ਹੈ। ਇਹ ਕਰਜ਼ਾ ਵੀ ਅਪਣੇ ਚਹੇਤਿਆਂ ਤੱਕ ਹੀ ਸਿਮਟ ਕੇ ਰਹਿ ਗਿਆ ਹੈ।

ਕੇਂਦਰ ਸਰਕਾਰ ਨੇ ਕਿਸਾਨਾਂ ਦੇ ਅੱਛੇ ਦਿਨ ਆਉਣ ਅਤੇ 15, 15 ਲੱਖ ਰੁਪਏ ਖਾਤੇ ਵਿਚ ਪਾਉਣ, ਡਾ. ਸੁਆਮੀ ਨਾਥਨ ਰਿਪੋਟ ਨੂੰ ਲਾਗੂ ਕਰਨਾ ਇਕ ਜੁੰਮਲਾ ਹੀ ਸਾਬਿਤ ਹੋਈ ਹੈ। ਉਹਨਾਂ ਮੰਗ ਕੀਤੀ ਕਿ ਕਿਸਾਨ ਮਜ਼ਦੂਰਾਂ ਦਾ ਸਾਰਾ ਕਰਜ਼ ਮਾਫ਼ ਕੀਤਾ ਜਾਵੇ। ਕਰਜ਼ਾ ਕਾਨੂੰਨ ਤੇ ਖੇਤੀ ਨੀਤੀ ਮਜ਼ਦੂਰ ਕਿਸਾਨਾਂ ਪੱਖੀ ਬਣਾਇਆ ਜਾਵੇ। ਖੁਦਕੁਸ਼ੀਆਂ ਕਰ ਚੁੱਕੇ ਕਿਸਾਨਾਂ ਦੇ ਪਰਵਾਰਾਂ ਨੂੰ ਦਸ-ਦਸ ਲੱਖ ਰੁਪਏ ਦਾ ਮੁਆਵਜ਼ਾ ਦਿਤਾ ਜਾਵੇ ਅਤੇ ਪਰਿਵਾਰ ਦੇ ਇਕ ਇਕ ਜੀਅ ਨੂੰ ਸਰਕਾਰੀ ਨੌਕਰੀ ਦਿਤੀ ਜਾਵੇ।

ਮਹਿੰਗਾਈ ਨੂੰ ਠੱਲ ਪਾਉਣ ਲਈ ਡੀਜ਼ਲ ਅਤੇ ਪਟਰੌਲ ਨੂੰ ਜੀਐਸਟੀ ਦੇ ਘੇਰੇ ਵਿਚ ਲਿਆਂਦਾ ਜਾਵੇ। ਖੇਤੀ ਸੰਦਾਂ, ਖਾਦਾਂ ਅਤੇ ਸਪਰੇਆਂ ਤੇ ਜੀਐਸਟੀ ਟੈਕਸ ਖ਼ਤਮ ਕੀਤਾ ਜਾਵੇ। ਪੜ੍ਹੇ ਅਤੇ ਅਨਪੜ੍ਹ ਸਾਰੇ ਬੇਰੁਜ਼ਗਾਰਾਂ ਨੂੰ ਰੋਜਗਾਰ ਦਿਤਾ ਜਾਵੇ। ਕਿਸਾਨਾਂ ਨੂੰ ਮਨਰੇਗਾ ਨਾਲ ਜੋੜਿਆ ਜਾਵੇ। ਅਵਾਰਾ ਪਸ਼ੂਆਂ ਦਾ ਪੱਕਾ ਹੱਲ ਕੀਤਾ ਜਾਵੇ। ਜਿਨਸਾ ਦੇ ਭਾਅ ਡਾ. ਸੁਆਮੀ ਨਾਥਨ ਰਿਪੋਟ ਮੁਤਾਬਿਕ ਦਿਤੇ ਜਾਣ। ਟਿਊਬਵੈਲ ਦੀ ਬਿਜਲੀ ਦਿਨ ਵੇਲੇ ਅੱਠ ਘੰਟੇ ਦਿਤੀ ਜਾਵੇ। ਝੋਨਾ ਲਾਉਣ ਲਈ ਮੋਟਰਾਂ ਦੀ ਬਿਜਲੀ ਦੀ ਸਪਲਾਈ ਪਹਿਲੀ ਜੂਨ ਤੋਂ ਦਿਤੀ ਜਾਵੇ।

ਬਿਜਲੀ ਦਰਾਂ ਵਿਚ ਕੀਤਾ ਵਾਧਾ ਵਾਪਸ ਲਿਆ ਜਾਵੇ। ਖੇਤੀ ਮੋਟਰਾਂ ਤੇ ਮੀਟਰ ਲਾਉਣੇ ਬੰਦ ਕੀਤੇ ਜਾਣ ਅਤੇ ਲੋਡ ਵਾਧਾ ਫ਼ੀਸ ਖ਼ਤਮ ਕੀਤੀ ਜਾਵੇ। ਇਸ ਸਮੇਂ ਮਾਸਟਰ ਗੁਰਦਿੱਤਾ ਸਿੰਘ ਭਾਗਸਰ, ਰਾਜਾ ਸਿੰਘ ਮਹਾਂਬੱਧਰ, ਗੁਰਪਾਸ ਸਿੰਘ ਸਿੰਘੇਵਾਲਾ, ਮਲਕੀਤ ਸਿੰਘ ਗੱਗੜ, ਅਜਾਇਬ ਸਿੰਘ ਮੱਲਣ, ਮਨੋਹਰ ਸਿੰਘ ਸਿੱਖਵਾਲਾ, ਜੋਗਿੰਦਰ ਸਿੰਘ ਬੁੱਟਰਸ਼ਰੀਂਹ, ਗੁਰਤੇਜ਼ ਸਿੰਘ ਥਾਂਦੇਵਾਲਾ, ਪ੍ਰਤਾਪ ਸਿੰਘ ਥਾਂਦੇਵਾਲਾ ਅਤੇ ਦਰਸ਼ਨ ਸਿੰਘ ਭੁੱਟੀਵਾਲਾ ਆਦਿ ਸ਼ਾਮਿਲ ਸਨ।