Corona Virus Covid Pandemic Effect On Brain Jyot Jeet

ਚੰਡੀਗੜ੍ਹ: ਅਜੇ ਤਕ ਲੋਕ ਇਹੀ ਜਾਣਦੇ ਹਨ ਕਿ ਕੋਰੋਨਾ ਵਾਇਰਸ ਸਿਰਫ ਸਰੀਰ ਤੇ ਅਸਰ ਕਰਦਾ ਹੈ। ਸਾਹ ਲੈਣ ਵਿਚ ਤਕਲੀਫ ਹੋਣਾ, ਖੰਘ, ਜ਼ੁਕਾਮ ਤੇ ਹੋਰ ਵੀ ਕਈ ਲੱਛਣਾਂ ਦੇ ਨਾਲ ਕੋਰੋਨਾ ਵਾਇਰਸ ਨੂੰ ਭਾਂਪਿਆ ਜਾਂਦਾ ਹੈ। ਪਰ ਜੋਤਜੀਤ ਵੱਲੋਂ ਇਕ ਵੀਡੀਓ ਸਾਂਝੀ ਕੀਤੀ ਗਈ ਹੈ ਜਿਸ ਦੇ ਵਿਚ ਜੋਤਜੀਤ ਨੇ ਦਸਿਆ ਕਿ ਕੋਰੋਨਾ ਵਾਇਰਸ ਸਿਰਫ ਸਰੀਰ ਤੇ ਹੀ ਨਹੀਂ ਸਗੋਂ ਦਿਮਾਗ਼ ਤੇ ਵੀ ਉੰਨਾ ਹੀ ਅਸਰ ਪਾਉਂਦਾ ਹੈ।

ਉਸ ਨੇ ਅਪਣੀ ਵੀਡੀਓ ਵਿਚ ਦਸਿਆ ਕਿ ਉਸ ਨੂੰ ਜਦੋਂ ਕੋਰੋਨਾ ਹੋ ਗਿਆ ਸੀ ਤਾਂ ਉਸ ਦੇ ਸਾਰੇ ਸਰੀਰ ਵਿਚ ਭਿਆਨਕ ਦਰਦ, ਅੱਖਾਂ ਦੇ ਪਿਛਲੇ ਹਿੱਸੇ ਵਿਚ ਦਰਦ, ਜ਼ੁਕਾਮ, ਖੰਘ, ਛਾਤੀ ਵਿਚ ਦਰਦ, ਹੁੰਦਾ ਸੀ। ਪਰ ਇਹ ਆਮ ਲੱਛਣ ਹਨ ਇਹਨਾਂ ਬਾਰੇ ਤਾਂ ਹਰ ਕੋਈ ਜਾਣਦਾ ਹੈ ਤੇ ਇਹਨਾਂ ਨੂੰ ਲੋਕਾਂ ਨੇ ਪੜ੍ਹਿਆ ਵੀ ਹੈ। ਪਰ ਇਸ ਦੇ ਨਾਲ ਹੀ ਕੋਰੋਨਾ ਵਾਇਰਸ ਦੇ ਬਹੁਤ ਹੀ ਅਜੀਬ ਲੱਛਣ ਵੀ ਸਾਹਮਣੇ ਆਏ ਜਿਸ ਨਾਲ ਉਸ ਦੀ ਹਾਲਤ ਹੋਰ ਵੀ ਗੰਭੀਰ ਹੋ ਗਈ।

ਜਦੋਂ ਉਹ ਬੈਠੇ ਹੁੰਦੇ ਸੀ ਜਾਂ ਸੁੱਤੇ ਹੁੰਦੇ ਸੀ ਤਾਂ ਉਹਨਾਂ ਨੂੰ ਲਗਦਾ ਸੀ ਜਿਵੇਂ ਭੂਚਾਲ ਆ ਰਿਹਾ ਹੋਵੇ, ਇਕ ਦਮ ਲੰਬਾ ਸਾਹ ਲੈਣਾ, ਫਿਰ ਸਾਰੇ ਸਰੀਰ ਵਿਚ ਬਹੁਤ ਜ਼ਬਰਦਸਤ ਘਬਰਾਹਟ ਹੁੰਦੀ ਸੀ। ਕਦੇ-ਕਦੇ ਉਹਨਾਂ ਨੂੰ ਲਗਦਾ ਸੀ ਕਿ ਹਰ ਚੀਜ਼ ਉੱਪਰ-ਹੇਠਾਂ ਹੋ ਰਹੀ ਹੈ। ਉਹਨਾਂ ਨੂੰ ਇੰਝ ਲਗਦਾ ਸੀ ਕਿ ਉਹਨਾਂ ਦਾ ਅਪਣੇ ਦਿਮਾਗ਼ ਤੇ ਕੰਟਰੋਲ ਹੀ ਨਹੀਂ ਹੈ ਤੇ ਕੋਰੋਨਾ ਦਿਮਾਗ਼ ਤੇ ਹਾਵੀ ਹੋ ਰਿਹਾ ਹੈ।

ਇਸ ਦੇ ਨਾਲ ਹੀ ਇਕ ਬਹੁਤ ਭਿਆਨਕ ਲੱਛਣ ਸੀ ਉਹ ਸੀ ਭੁੱਲਣਾ, ਉਹਨਾਂ ਨੂੰ ਕੁੱਝ ਵੀ ਯਾਦ ਨਹੀਂ ਸੀ ਰਹਿੰਦਾ ਕਿ ਉਹਨਾਂ ਨੇ ਦਵਾਈ ਕਿਹੜੀ ਲਈ ਹੈ, ਕੀ ਖਾਧਾ ਹੈ, ਕਿਸ ਨਾਲ ਗੱਲ ਕੀਤੀ ਹੈ। ਜੇ ਡਾਕਟਰ ਉਹਨਾਂ ਨੂੰ ਪੁੱਛਦੇ ਸਨ ਕਿ ਉਹਨਾਂ ਨੂੰ ਹੋਰ ਕੀ-ਕੀ ਹੋ ਰਿਹਾ ਹੈ ਉਹ ਵੀ ਉਹਨਾਂ ਨੂੰ ਭੁੱਲ ਜਾਂਦਾ ਸੀ ਕਿ ਉਹਨਾਂ ਨੂੰ ਕੁੱਝ ਹੋ ਰਿਹਾ ਹੈ ਜਾਂ ਨਹੀਂ।

ਉਹਨਾਂ ਨੇ ਕੋਰੋਨਾ ਵਾਇਰਸ ਤੋਂ ਬਚਣ ਲਈ ਇਹ ਸੋਚ ਲਿਆ ਕਿ ਕੋਰੋਨਾ ਵਾਇਰਸ ਦੇ ਡਰ ਨੂੰ ਉਹ ਅਪਣੇ ਆਪ ਤੇ ਹਾਵੀ ਨਹੀਂ ਹੋਣ ਦੇਣਗੇ। ਇਸ ਦੇ ਨਾਲ ਹੀ ਉਹਨਾਂ ਨੇ ਸਮੇਂ-ਸਮੇਂ ਤੇ ਡਾਕਟਰ ਨਾਲ ਗੱਲਬਾਤ ਜਾਰੀ ਰੱਖੀ ਤੇ ਉਹਨਾਂ ਨੂੰ ਅਪਣੀ ਸਿਹਤ ਦੀ ਹਰ ਅਪਡੇਟ ਦਿੱਤੀ। ਜੋਤਜੀਤ ਸਿੰਘ ਨੇ ਅੱਗੇ ਦਸਿਆ ਕਿ ਵਿਅਕਤੀ ਨੂੰ ਪਾਣੀ ਕਿਸੇ ਵੀ ਹਾਲਤ ਵਿਚ ਵੱਧ ਤੋਂ ਵੱਧ ਪੀਣਾ ਚਾਹੀਦਾ ਹੈ ਇਸ ਨਾਲ ਸਿਹਤ ਵਿਚ ਐਨਰਜੀ ਰਹਿੰਦੀ ਹੈ ਤੇ ਵਿਅਕਤੀ ਦੇ ਬਿਮਾਰ ਹੋਣ ਦੇ ਮੌਕੇ ਘਟ ਹੁੰਦੇ ਹਨ।