ਚੰਡੀਗੜ੍ਹ (ਸ.ਸ.ਸ) : ਅਦਲੀਵਾਲ ਦੇ ਨਿੰਰਕਾਰੀ ਭਵਨ ਵਿਚ ਹੋਏ ਧਮਾਕੇ  ਦੇ ਕਥਿਤ ਦੋਸ਼ੀ ਬਿਕਰਮਜੀਤ ਸਿੰਘ ਨੂੰ ਪੁਲਿਸ ਵੱਲੋਂ ਹਿਰਾਸਤ ਵਿਚ ਲੈਣ ਤੋਂ ਬਾਅਦ ਅੱਜ ਇੱਕ ਨਵਾਂ ਖੁਲਾਸਾ ਹੋਇਆ ਹੈ। ਅੱਜ ਸਪੋਕਸਮੈਨ ਟੀਵੀ ਵਲੋ ਜਦ ਬਿਕਰਮਜੀਤ ਸਿੰਘ ਦੇ ਘਰ ਦਾ ਦੌਰਾ ਕੀਤਾ ਗਿਆ ਤਾਂ ਪਤਾ ਲਗਾ ਕਿ ਬਿਕਰਮਜੀਤ ਸਿੰਘ ਨੂੰ ਪੁਲੀਸ ਨੇ ਐਤਵਾਰ ਰਾਤ ਨੂੰ ਹੀ ਚੁਕ ਲਿਆ ਸੀ। ਬਿਕਰਮਜੀਤ ਦੇ ਪਰਿਵਾਰਿਕ ਮੈਂਬਰਾਂ ਦਾ ਕਹਿਣਾ ਹੈ ਕਿ ਪੁਲਿਸ ਨੇ ਹੁਣ ਤੱਕ ਘਰ ਦੀ 4 ਵਾਰ ਤਲਾਸ਼ੀ ਲੈ ਲਈ ਹੈ। ਉਨ੍ਹਾਂ ਕਿਹਾ ਕਿ ਪੁਲਿਸ ਵਾਰ ਵਾਰ ਉਨ੍ਹਾਂ ਨੂੰ ਤੰਗ ਕਰ ਰਹੀ ਹੈ ਜਦਕਿ ਉਨ੍ਹਾਂ ਦਾ ਪੁੱਤਰ ਬੇਕਸੂਰ ਹੈ।

ਬਿਕਰਮ ਸਿੰਘ ਦੀ ਗ੍ਰਿਫਤਾਰੀ ਤੋਂ ਬਾਅਦ ਉਨ੍ਹਾਂ ਦੇ ਘਰ ਸੋਗ ਦਾ ਮਹੌਲ ਹੈ ਅਤੇ ਰਿਸ਼ਤੇਦਾਰ ਭਾਰੀ ਗਿਣਤੀ ਵਿਚ ਇਕੱਠੇ ਹੋ ਗਏ ਹਨ, ਪਿੰਡ ਵਾਸੀਆਂ ਅਤੇ ਪਰਿਵਾਰਿਕ ਮੈਂਬਰਾਂ ਦਾ ਕਹਿਣਾ ਹੈ ਕਿ ਪੁਲਿਸ ਨੇ ਐਤਵਾਰ ਰਾਤ ਨੂੰ ਹੀ ਬਿਕਰਮ ਨੂੰ ਹਿਰਾਸਤ ਵਿਚ ਲੈ ਲਿਆ ਸੀ ਜਦ ਕਿ ਪੁਲਿਸ ਬਾਰ ਬਾਰ ਬਿਆਨ ਬਦਲ ਕੇ  ਵਖ ਵਖ ਥਾਵਾਂ ਤੋ ਫੜਿਆ ਦਸ ਰਹੀ ਹੈ। ਉਧਰ ਅਵਤਾਰ ਸਿੰਘ ਖਾਲਸਾ ਜੋ ਕਿ ਪੇਸ਼ੇ ਵਜੋ ਆਰ ਐਮ ਪੀ ਡਾਕਟਰ ਹੈ, ਸਪੋਕੇਸਮੈਨ ਟੀਵੀ ਵੱਲੋਂ ਉਸਦੇ ਘਰ ਦਾ ਵੀ ਦੌਰਾ ਕੀਤਾ ਗਿਆ। ਅਵਤਾਰ ਸਿੰਘ ਘਰ 'ਤੇ ਪੁਲਿਸ ਵਾਲਿਆਂ ਨੇ ਤਿੱਖੀ ਨਜ਼ਰ ਰੱਖੀ ਹੋਈ ਹੈ।

ਮੀਡੀਆ ਦੇ ਸਵਾਲਾਂ  ਤੋਂ  ਬਚਦੇ ਨਜਰ ਆ ਰਹੇ ਪੁਲੀਸ ਵਾਲੇ ਕਹਿੰਦੇ  ਹਨ ਕਿ ਅਸੀ ਜਦ ਘਰ ਆਏ ਤਾਂ ਦਰਵਾਜੇ ਖੁਲੇ ਸਨ। ਦੱਸ ਦੇਈਏ ਅਵਤਾਰ ਸਿੰਘ ਅਜੇ ਪੁਲਿਸ ਦੀ ਗ੍ਰਿਫਤ ਤੋਂ ਬਾਹਰ ਹੈ ਅਤੇ ਪੁਲਿਸ ਉਸਦੀ ਤਲਾਸ਼ ਕਰ ਰਹੀ ਹੈ।