Zira

ਚੰਡੀਗੜ੍ਹ : ਹਾਲ ਹੀ ’ਚ ਚਰਚਾ ’ਚ ਰਹੇ ਕਾਂਗਰਸੀ ਵਿਧਾਇਕ ਕੁਲਬੀਰ ਸਿੰਘ ਜ਼ੀਰਾ ਨੇ ਹੁਣ ਅਕਾਲੀ ਦਲ ਦੇ ਪ੍ਰਧਾਨ ਸੁਖਬੀਰ ਬਾਦਲ ਨੂੰ ਨਿਸ਼ਾਨੇ ’ਤੇ ਲਿਆ ਹੈ। ਜ਼ੀਰਾ ਨੇ ਸੁਖਬੀਰ ਨੂੰ ਘੇਰਦੇ ਹੋਏ ਪੰਜ ਸਵਾਲ ਕੀਤੇ ਹਨ ਅਤੇ ਸੁਖਬੀਰ ਤੋਂ ਜਵਾਬ ਮੰਗਿਆ ਹੈ। ਕੀ ਹਨ ਜ਼ੀਰਾ ਦੇ ਸੁਖਬੀਰ ਨੂੰ ਸਵਾਲ ਤੁਸੀਂ ਵੀ ਦੇਖੋ…ਸਵਾਲ ਨੰਬਰ ਇੱਕ: ਕਿ ਦੂਸਰਿਆਂ ’ਤੇ ਨਸ਼ੇੜੀ ਦਾ ਇਲਜ਼ਾਮ ਲਗਾਉਣ ਵਾਲਾ ਸੁਖਬੀਰ ਸਿੰਘ ਬਾਦਲ ਖੁਦ ਦਾ ਡੋਪ ਟੈਸਟ ਕਰਵਾ ਸਕਦਾ ਹੈ? ਸਵਾਲ ਨੰਬਰ ਦੋ: ਸ਼੍ਰੋਮਣੀ ਅਕਾਲੀ ਦਲ ਦਾ ਪ੍ਰਧਾਨ ਅੰਮ੍ਰਿਤਧਾਰੀ ਹੋਣਾ ਜ਼ਰੂਰੀ ਹੈ ?

ਕੀ ਸੁਖਬੀਰ ਬਾਦਲ ਦੱਸ ਸਕਦੈ ਹਨ ਕਿ ਉਨ੍ਹਾਂ ਨੇ ਜਾਂ ਉਹਨਾਂ ਦੇ ਪਰਿਵਾਰ ਨੇ ਪੰਜ ਤਖ਼ਤ ਸਾਹਿਬਾਨਾਂ ਵਿੱਚੋਂ ਕਿਸ ਤਖ਼ਤ ਤੋਂ ਅੰਮ੍ਰਿਤ ਪਾਨ ਕੀਤਾ ਹੈ? ਜੇਕਰ ਸੁਖਬੀਰ ਸਿੰਘ ਬਾਦਲ ਨੇ ਅੰਮ੍ਰਿਤ ਛਕਿਆ ਹੈ ਤਾਂ ਉਹ ਦਾੜਾ ਬੰਨ੍ਹ ਕੇ ਕਿਉਂ ਰੱਖਦਾ ਹੈ? ਸਵਾਲ ਨੰਬਰ ਤਿੰਨ: ਡੇਰਾ ਸਿਰਸਾ ਮੁਖੀ ਨੂੰ ਜੋ ਸ੍ਰੀ ਅਕਾਲ ਤਖ਼ਤ ਸਾਹਿਬ ਤੋਂ ਮੁਆਫ਼ੀ ਦਿੱਤੀ ਗਈ ਹੈ ਕੀ ਸੁਖਬੀਰ ਸਿੰਘ ਬਾਦਲ ਦੱਸ ਸਕਦੇ ਹਨ ਕਿ ਇਹ ਮੁਆਫ਼ੀਨਾਮਾ ਕਿਸ ਦੇ ਹੁਕਮਾਂ ਅਤੇ ਕਿਸ ਦੇ ਦਬਾਅ ਹੇਠ ਦਿੱਤਾ ਗਿਆ ਹੈ ?

ਸਵਾਲ ਨੰਬਰ ਚਾਰ: ਬੀਤੇ ਦਿਨੀਂ ਸੁਖਬੀਰ ਸਿੰਘ ਬਾਦਲ ਅਤੇ ਅਕਾਲੀ ਆਗੂਆਂ ਨੇ ਜੋ ਸ੍ਰੀ ਹਰਿਮੰਦਰ ਸਾਹਿਬ ਜੋੜੇ ਝਾੜ ਕੇ ਮੁਆਫ਼ੀ ਮੰਗੀ ਹੈ ਦੱਸਿਆ ਜਾਵੇ ਕਿ ਉਹ ਕਿਸ ਗੁਨਾਹ ਦੀ ਮੁਆਫ਼ੀ ਮੰਗੀ ਹੈ? ਸਵਾਲ ਨੰਬਰ ਪੰਜ: ਕੀ ਸੁਖਬੀਰ ਸਿੰਘ ਬਾਦਲ ਇਹ ਦੱਸਣ ਦੀ ਖੈਚਲ ਕਰਨਗੇ ਕਿ ਸੇਵਾ ਸਿੰਘ ਸੇਖਵਾਂ, ਰਣਜੀਤ ਸਿੰਘ ਬ੍ਰਹਮਪੁਰਾ, ਰਤਨ ਸਿੰਘ ਅਜਨਾਲਾ, ਸੁਖਦੇਵ ਸਿੰਘ ਢੀਂਡਸਾ ਟਕਸਾਲੀ ਅਕਾਲੀ ਹਨ ਜਾਂ ਸੁੱਚਾ ਸਿੰਘ ਲੰਗਾਹ ਵਰਗੇ ਟਕਸਾਲੀ ਹਨ?

 ਸੁਖਬੀਰ ਬਾਦਲ ਅੱਗੇ ਇਹ ਸਵਾਲ ਪਹਿਲਾਂ ਵੀ ਕਈ ਵਾਰ ਰੱਖੇ ਜਾ ਚੁੱਕੇ ਹਨ ਪਰ ਉਹਨਾਂ ਵੱਲੋਂ ਇਹਨਾਂ ਦੇ ਜਵਾਬ ਗੋਲ-ਮੋਲ ਹੀ ਦਿੱਤੇ ਜਾਂਦੇ ਹਨ। ਜ਼ੀਰਾ ਨੂੰ ਇਹਨਾਂ ਸਵਾਲਾਂ ਦੇ ਜਵਾਬ ਮਿਲਣਾ ਤਾਂ ਸ਼ਾਇਦ ਮੁਸ਼ਕਲ ਹੀ ਹੈ ਪਰ ਦੇਖਣਾ ਹੋਵੇਗਾ ਸੁਖਬੀਰ ਹੁਣ ਜ਼ੀਰਾ ਜਵਾਬ ਕਿਵੇਂ ਅਤੇ ਕਦੋਂ ਦਿੰਦੇ ਹਨ?