ਅਪਾਹਜ ਪਤੀ-ਪਤਨੀ ਸਰਕਾਰ ਤੇ ਦਾਨੀ ਸੱਜਣਾਂ ਨੂੰ ਰੋ-ਰੋ ਕੇ ਲਗਾ ਰਹੇ ਮਦਦ ਦੀ ਗੁਹਾਰ
ਨਰਕ ਭਰੀ ਜ਼ਿੰਦਗੀ ਜਿਉਣ ਲਈ ਮਜਬੂਰ ਪਤੀ-ਪਤਨੀ
ਗੁਰਦਾਸਪੁਰ (ਨਿਤਿਨ ਲੂਥਰਾ): ਗੁਰਦਾਸਪੁਰ ਦੇ ਸ਼ਹਿਰ ਬਟਾਲਾ ਦੇ ਗਾਂਧੀ ਕੈਂਪ ਵਿਚ ਰਹਿਣ ਵਾਲੇ ਇਕ ਅਪਾਹਜ ਪਤੀ-ਪਤਨੀ ਨਰਕ ਭਰੀ ਜ਼ਿੰਦਗੀ ਜਿਉਣ ਲਈ ਮਜਬੂਰ ਹੈ। ਇਸ ਦੇ ਬਾਵਜੂਦ ਵੀ ਉਹ ਮਿਹਨਤ ਕਰਕੇ ਅਪਣੇ ਬੱਚਿਆਂ ਲਈ ਵਧੀਆ ਜੀਵਨ ਦੇਣ ਦੀ ਕੋਸ਼ਿਸ਼ ਕਰ ਰਹੇ ਹਨ। ਪਰਿਵਾਰ ਵਿਚ ਪਤੀ-ਪਤਨੀ ਤੋਂ ਇਲਾਵਾ ਉਹਨਾਂ ਦੇ 2 ਬੱਚੇ ਵੀ ਹਨ, ਜਿਨ੍ਹਾਂ ਦੀ ਉਮਰ ਦੋ ਸਾਲ ਤੇ ਪੰਜ ਸਾਲ ਹੈ।
ਵਿਜੈ ਕੁਮਾਰ ਦਿਹਾੜੀ ਕਰਦਾ ਹੈ ਪਰ ਉਸ ਨੂੰ ਦਿਹਾੜੀ ਵਜੋਂ ਕਰੀਬ 50 ਰੁਪਏ ਹੀ ਮਿਲਦੇ ਹਨ। ਪਰਿਵਾਰ ਦਾ ਗੁਜ਼ਾਰਾ ਬਹੁਤ ਮੁਸ਼ਕਿਲ ਨਾਲ ਹੁੰਦਾ ਹੈ। ਉਹਨਾਂ ਦਾ ਕਹਿਣਾ ਹੈ ਕਿ ਉਹਨਾਂ ਨੂੰ ਅਪਾਹਜ ਪੈਨਸ਼ਨ ਲੱਗੀ ਹੋਈ ਹੈ ਪਰ ਸਸਤੇ ਰਾਸ਼ਣ ਲਈ ਉਹਨਾਂ ਦਾ ਕਾਰਡ ਹੁਣ ਨਹੀਂ ਬਣ ਸਕਿਆ। ਪਰਿਵਾਰ ਦਾ ਕਹਿਣਾ ਹੈ ਕਿ ਕਦੀ-ਕਦੀ ਉਹਨਾਂ ਦੇ ਗੁਆਂਢੀ ਜਾਂ ਕੋਈ ਸਮਾਜ ਸੇਵੀ ਸੰਸਥਾ ਉਹਨਾਂ ਦੀ ਮਦਦ ਕਰ ਦਿੰਦੀ ਹੈ ਪਰ ਘਰ ਦੇ ਹਾਲਾਤ ਬਹੁਤ ਮਾੜੇ ਹਨ।
ਮਕਾਨ ਦੀ ਛੱਤ ਡਿੱਗਣ ਵਾਲੀ ਹੈ ਅਤੇ ਪਰਮਜੀਤ ਕੌਰ ਦੇ ਪਿੱਤੇ ਵਿਚ ਪਥਰੀ ਹੈ, ਜਿਸ ਕਾਰਨ ਉਸ ਦੇ ਇਲਾਜ ਲਈ ਵੀ 30 ਹਜ਼ਾਰ ਰੁਪਏ ਦੀ ਲੋੜ ਹੈ। ਉਹਨਾਂ ਦਾ ਕਹਿਣਾ ਹੈ ਕਿ ਇਕ ਦਾਨੀ ਸੱਜਣ ਹਰ ਮਹੀਨੇ ਪਰਿਵਾਰ ਨੂੰ ਆਟੇ ਦੀ ਥੈਲੀ ਦਾਨ ਦਿੰਦਾ ਹੈ।
ਪਤੀ-ਪਤਨੀ ਦਾ ਕਹਿਣਾ ਹੈ ਕਿ ਉਹ ਅਪਣੇ ਬੱਚਿਆਂ ਦਾ ਪਾਲਣ-ਪੋਸ਼ਣ ਸਹੀ ਢੰਗ ਨਾਲ ਕਰਨਾ ਚਾਹੁੰਦੇ ਹਨ ਤੇ ਉਹਨਾਂ ਨੂੰ ਸਫਲ ਇਨਸਾਨ ਬਣਾਉਣਾ ਚਾਹੁੰਦੇ ਹਨ ਪਰ ਇਸ ਦੇ ਲਈ ਉਹਨਾਂ ਕੋਲ ਲੋੜੀਂਦੇ ਸਰੋਤ ਨਹੀਂ ਹਨ। ਅਪਾਹਜ ਜੋੜੇ ਨੇ ਸਰਕਾਰ ਅਤੇ ਸਮਾਜਸੇਵੀਆਂ ਨੂੰ ਮਦਦ ਦੀ ਗੁਹਾਰ ਲਗਾਈ ਹੈ। ਵਿਕਲਾਂਗ ਵਿਜੇ ਕੁਮਾਰ ਦਾ ਨੰਬਰ : 99151-20237 ਹੈ।