'ਵਾਹਿਗੁਰੂ ਬਾਬਾ' ਵਜੋਂ ਜਾਣੇ ਜਾਂਦੇ ਮੈਰਾਥਨ ਦੌੜਾਕ ਹਾਰੇ ਜ਼ਿੰਦਗੀ ਦੀ ਜੰਗ
ਕੋਰੋਨਾ ਵਾਇਰਸ ਕਾਰਨ ਭਾਰਤੀ ਮੂਲ ਦੇ ਮੈਰਾਥਨ ਦੌੜਾਕ ਅਮਰੀਕ ਸਿੰਘ ਦੀ ਮੌਤ ਹੋ ਗਈ।
ਚੰਡੀਗੜ੍ਹ: ਕੋਰੋਨਾ ਵਾਇਰਸ ਕਾਰਨ ਭਾਰਤੀ ਮੂਲ ਦੇ ਮੈਰਾਥਨ ਦੌੜਾਕ ਅਮਰੀਕ ਸਿੰਘ ਦੀ ਮੌਤ ਹੋ ਗਈ। ਦੁਨੀਆ ਦੇ ਸਭ ਤੋਂ ਪੁਰਾਣੇ ਮੈਰਾਥਨ ਦੌੜਾਕ 109 ਸਾਲਾ ਫੌਜਾ ਸਿੰਘ ਦੇ ਸਭ ਤੋਂ ਚੰਗੇ ਦੋਸਤ ਅਤੇ ਰਨਿੰਗ ਸਾਥੀ 89 ਸਾਲਾ ਅਮਰੀਕ ਨੇ 22 ਅਪ੍ਰੈਲ ਨੂੰ ਬਰਮਿੰਘਮ ਸਿਟੀ ਹਸਪਤਾਲ ਵਿਚ ਆਖਰੀ ਸਾਹ ਲਿਆ।
ਹਸਪਤਾਲ ਵਿਚ ਡਾਕਟਰਾਂ ਨੂੰ ਉਹਨਾਂ ਨੂੰ ਬਚਾਉਣ ਦੇ ਨਾਲ-ਨਾਲ ਉਹਨਾਂ ਦੇ ਸ਼ਬਦਾਂ ਨੂੰ ਸਮਝਣ ਲਈ ਵੀ ਸੰਘਰਸ਼ ਕਰਨਾ ਪਿਆ। ਉਹ ਸ਼ਬਦ, ਜੋ ਉਹਨਾਂ ਦੀ ਜ਼ਿੰਦਗੀ ਦੇ ਆਖਰੀ ਸ਼ਬਦ ਸਾਬਿਤ ਹੋਏ। ਅਮਰੀਕ ਸਿੰਘ ਦੇ ਪੋਤੇ 34 ਸਾਲਾ ਪਮਨ ਸਿੰਘ ਨੇ ਦੱਸਿਆ ਕਿ ਉਹਨਾਂ ਦੇ ਦਾਦਾ ਜੀ ਦੇ ਆਖਰੀ ਸ਼ਬਦ 'ਵਾਹਿਗੁਰੂ' ਸੀ।
ਗਲਾਸਗੋ ਵਿਚ ਰਹਿ ਰਹੇ ਅਮਰੀਕ ਸਿੰਘ ਅਪਣੇ ਪਿੱਛੇ 650 ਤੋਂ ਜ਼ਿਆਦਾ ਮੈਡਲ ਛੱਡ ਗਏ, ਜੋ ਉਹਨਾਂ ਨੇ ਦੁਨੀਆ ਭਰ ਦੀਆਂ ਕਈ ਦੌੜਾਂ ਵਿਚ ਜਿੱਤੇ ਸਨ।
ਮੀਡੀਆ ਰਿਪੋਰਟ ਅਨੁਸਾਰ ਅਮਰੀਕ ਸਿੰਘ ਨੇ 46 ਸਾਲ ਦੀ ਉਮਰ ਵਿਚ ਦੌੜਨਾ ਸ਼ੁਰੂ ਕੀਤਾ ਸੀ ਅਤੇ ਉਹਨਾਂ ਨੇ 26 ਵਾਰ ਲੰਡਨ ਮੈਰਾਥਨ ਵਿਚ ਹਿੱਸਾ ਲਿਆ ਸੀ।
ਉਹਨਾਂ ਦੇ ਪੋਤੇ ਨੇ ਦੱਸਿਆ ਕਿ ਹਰ ਸਾਲ ਦੀ ਤਰ੍ਹਾਂ ਅਮਰੀਕ ਸਿੰਘ 12 ਫਰਵਰੀ ਤੋਂ 13 ਮਾਰਚ ਤੱਕ ਆਪਣੇ ਜੱਦੀ ਪਿੰਡ ਵਿਚ ਸੇਵਾ ਕਰਨ ਗਏ ਸੀ। ਅਮਰੀਕ ਸਿੰਘ ਦਾ ਅਸਲ ਪਿੰਡ ਪੰਜਾਬ ਦੇ ਜਲੰਧਰ ਵਿਚ ਹੈ। ਉਹਨਾਂ ਨੇ ਆਪਣੇ ਜੱਦੀ ਪਿੰਡ ਵਿਚ ਅੱਖਾਂ ਦਾ ਚੈਕਅਪ ਕੈਂਪ ਲਗਾਇਆ, ਬੇਘਰੇ ਲੋਕਾਂ ਅਤੇ ਗਰੀਬ ਬੱਚਿਆਂ ਦੀ ਪੜ੍ਹਾਈ ਲਈ ਦਾਨ ਇਕੱਠਾ ਕੀਤਾ।
ਮੈਡੀਕਲ ਕੈਂਪ ਵਿਚ ਵੀ ਉਹ ਮਰੀਜ਼ਾਂ ਦੀਆਂ ਬੈੱਡ ਸ਼ੀਟਾਂ ਨੂੰ ਬਦਲਦੇ ਸਨ, ਉਹਨਾਂ ਨੂੰ ਬਾਥਰੂਮ ਵਿਚ ਲਿਜਾਣ ਲਈ ਸਹਾਇਤਾ ਕਰਦੇ ਸਨ। ਸਕੌਟਲੈਂਡ ਵਿਚ ਉਹ ਜੋ ਦਾਨ ਇਕੱਠਾ ਕਰਦੇ ਸੀ, ਉਸ ਨੂੰ ਭਾਰ ਵਿਚ ਅਪਣੇ ਪਿੰਡ ਦੇ ਗਰੀਬ ਬੱਚਿਆਂ ਵਿਚ ਵੰਡ ਦਿੰਦੇ ਸੀ। ਭਾਰਤ ਜਾਣ ਤੋਂ ਪਹਿਲਾਂ ਉਹ ਬੱਚਿਆਂ ਲਈ ਨਵੇਂ ਕੱਪੜੇ ਵੀ ਖਰੀਦਦੇ ਸੀ।
ਉਹਨਾਂ ਦੇ ਪੋਤੇ ਨੇ ਦੱਸਿਆ ਕਿ 13 ਮਾਰਚ ਨੂੰ ਉਹ ਭਾਰਤ ਤੋਂ ਬਰਮਿੰਘਮ ਪਰਤੇ ਸੀ ਅਤੇ ਅਪਣੀ ਧੀ ਦੇ ਘਰ ਰੁਕੇ ਸੀ। ਉਹ ਪੂਰੀ ਤਰ੍ਹਾਂ ਠੀਕ ਲੱਗ ਰਹੇ ਸੀ। ਹਾਲਾਂਕਿ ਸ਼ੁਰੂਆਤ ਵਿਚ ਉਹਨਾਂ ਦੀ ਸਿਹਤ ਨੂੰ ਲੈ ਕੇ ਕੁਝ ਸਮੱਸਿਆ ਸੀ। 12 ਅਪ੍ਰੈਲ ਨੂੰ ਉਹਨਾਂ ਵਿਚ ਵਾਇਰਸ ਦੇ ਲੱਛਣ ਦਿਖਾਈ ਦੇਣ ਲੱਗੇ ਤੇ ਉਹਨਾਂ ਦੀ ਰਿਪੋਰਟ ਵੀ ਪਾਜ਼ੀਟਿਵ ਆਈ। 10 ਦਿਨ ਬਾਅਦ ਉਹ ਦੁਨੀਆ ਨੂੰ ਅਲਵਿਦਾ ਕਹਿ ਗਏ।