Pat Singh Cheung

ਸਿੱਖ ਧਰਮ ਦੀ ਲੰਗਰ ਪ੍ਰਥਾ ਅਤੇ ਸੇਵਾ ਤੋਂ ਪ੍ਰਭਾਵਤ ਹੋ ਕੇ ਵੱਖ ਵੱਖ ਧਰਮਾਂ, ਦੇਸ਼ਾਂ ਅਤੇ ਪ੍ਰਾਂਤਾਂ ਦੇ ਲੋਕ ਸਿੱਖ ਧਰਮ ਵਿਚ ਸ਼ਾਮਲ ਹੋ ਰਹੇ ਹਨ ਅਤੇ ਸਿੱਖੀ ਸਰੂਪ ਧਾਰ ਕੇ ਸਿੱਖੀ ਦਾ ਪ੍ਰਚਾਰ ਵੀ ਕਰ ਰਹੇ ਹਨ। ਇਸੇ ਤਰ੍ਹਾਂ ਨਿਜੇਲ ਨਾਂਅ ਦੀ ਇਕ ਜਮਾਇਕਨ ਲੜਕੀ ਨੇ ਸਿੱਖ ਕੌਮ ਦੇ ਸਿਧਾਂਤਾਂ ਤੋਂ ਪ੍ਰਭਾਵਿਤ ਹੋ ਕੇ ਅਪਣੇ ਨਾਂਅ ਅਤੇ ਅਤੇ ਅਪਣੀ ਪਛਾਣ ਨੂੰ ਬਦਲ ਕੇ ਸਿੱਖ ਬਣਨ ਦਾ ਫੈਸਲਾ ਲਿਆ ਹੈ। ਨਿਊਯਾਰਕ ਦੀ ਇਸ ਵਾਸੀ ਜਮਾਇਕਨ ਨੂੰ ਕਮਲਜੀਤ ਕੌਰ ਦੇ ਨਾਂਅ ਨਾਲ ਵੀ ਜਾਣਿਆ ਜਾਂਦਾ ਹੈ। ਇਹ ਪੰਜਾਬੀ ਪਰਵਾਸੀਆਂ ਦੀ ਤੀਜੀ ਪੀੜ੍ਹੀ ਨੂੰ ਬਹੁਤ ਹੈਰਾਨ ਕਰਦਾ ਹੈ ਕਿਉਂਕਿ ਵਿਦੇਸ਼ਾਂ ਵਿਚ ਜ਼ਿਆਦਾਤਰ ਬੱਚੇ ਅਪਣੀ ਮਾਂ ਬੋਲੀ ਦੀ ਪਛਾਣ ਨਾਲ ਜੂਝਦੇ ਹਨ।

ਸਿੱਖ ਧਰਮ ਵਿਚ ਲੰਗਰ ਅਤੇ ਸੇਵਾ ਅਜਿਹੇ ਸਿਧਾਂਤ ਹਨ ਜੋ ਹੋਰ ਧਰਮਾਂ ਦੇ ਲੋਕਾਂ ਨੂੰ ਸਿੱਖ ਬਣਨ ਲਈ ਆਕਰਸ਼ਿਤ ਕਰਦੇ ਹਨ। ਕੈਨੇਡਾ ਵਿਚ ਰਹਿ ਰਹੇ ਪੈਟ ਸਿੰਘ ਦਾ ਕਹਿਣਾ ਹੈ ਕਿ ਕਰੀਬ ਚਾਰ ਸਾਲ ਪਹਿਲਾਂ ਇਕ ਦਿਨ ਉਹ ਗੁਰਦੁਆਰਾ ਸਾਹਿਬ ਕੋਲੋਂ ਲੰਘ ਰਿਹਾ ਸੀ ਤਾਂ ਉਸ ਨੇ ਲੋਕਾਂ ਦੀ ਲਾਈਨ ਲੱਗੀ ਦੇਖੀ ਜਦੋਂ ਉਸ ਨੇ ਅੱਗੇ ਜਾ ਕੇ ਦੇਖਿਆ ਤਾਂ ਕੁੱਝ ਸਿੱਖ ਲੋਕ ਸਿਰ 'ਤੇ ਪਟਕਾ ਬੰਨ੍ਹ ਕੇ ਲੋਕਾਂ ਨੂੰ ਲੰਗਰ ਵੰਡ ਰਹੇ ਸਨ ਤਾਂ ਉਹ ਬਹੁਤ ਪ੍ਰਭਾਵਿਤ ਹੋਇਆ ਅਤੇ ਖ਼ੁਦ ਵੀ ਸੇਵਾ ਕਰਨ ਲੱਗ ਪਿਆ। ਪੈਟ ਸਿੰਘ ਨੇ ਇਕ ਸਿੱਖ ਧਰਮ ਦੀ ਕਈ ਪਹਿਲੂਆਂ ਨੂੰ ਅਪਣਾਇਆ ਹੈ। ਪੈਟ ਸਿੰਘ ਦਾ ਕਹਿਣਾ ਹੈ ਕਿ ਉਹ ਧਾਰਮਿਕ ਗ੍ਰੰਥਾਂ ਨੂੰ ਸਮਝਣ ਲਈ ਪੰਜਾਬੀ ਵੀ ਸਿੱਖ ਰਿਹਾ ਹੈ।

ਪਰ ਦੂਜੇ ਪਾਸੇ ਲੁਧਿਆਣਾ ਦੇ ਪਰਵਾਸੀ ਗੁਰਮੀਤ ਗਿੱਲ ਨੂੰ ਉਸਦੇ ਪਰਿਵਾਰ ਨੇ ਕਰੀਬ 10 ਸਾਲਾਂ ਤੋਂ ਬੇਦਖਲ ਕਰ ਦਿੱਤਾ ਹੈ ਕਿਉਂਕਿ ਉਸ ਨੇ ਇਕ ਗੋਰੀ ਨਾਲ ਵਿਆਹ ਕਰਵਾਇਆ ਹੈ। ਉਸ ਦੀ ਪਤਨੀ ਦਾ ਨਾਂਅ ਲੌਰੀ ਵਿਲੀਅਮਜ਼ ਹੈ। ਲੌਰੀ ਵਿਲੀਅਮਜ਼ ਦਾ ਕਹਿਣਾ ਹੈ ਕਿ ਉਹ ਇਕ ਪੰਜਾਬੀ ਸਿੱਖ ਨਾਲ ਵਿਆਹੀ ਹੈ। ਲੌਰੀ ਦਾ ਕਹਿਣਾ ਹੈ ਕਿ ਉਹਨਾਂ ਨੇ ਅਪਣੇ ਬੱਚਿਆਂ ਨੂੰ ਪੰਜਾਬੀ ਸੱਭਿਆਚਾਰ ਅਤੇ ਸਿੱਖੀ ਸਿਧਾਂਤਾ ਨਾਲ ਪਾਲਿਆ ਹੈ। ਉਸਦਾ ਕਹਿਣਾ ਹੈ ਕਿ ਉਹ ਦੋਵੇਂ ਪ੍ਰਮਾਤਮਾ ਨੂੰ ਬਰਾਬਰ ਮੰਨਦੇ ਹਨ।

ਲੌਰੀ ਦਾ ਕਹਿਣਾ ਹੈ ਕਿ ਉਸਦਾ ਸਬੰਧ ਈਸਾਈ ਪਿਛੋਕੜ ਨਾਲ ਹੈ ਪਰ ਉਸਨੂੰ ਯਕੀਨ ਹੈ ਕਿ ਉਹਨਾਂ ਦੋਵਾਂ ਦੀ ਪ੍ਰਾਰਥਨਾ ਇਕੋ ਰੱਬ ਤੱਕ ਪਹੁੰਚਦੀ ਹੈ। ਉਸ ਦੇ ਮਨ ਵਿਚ ਗੁਰਮੀਤ ਦੇ ਪਰਿਵਾਰ ਲਈ ਬਹੁਤ ਆਦਰ ਅਤੇ ਸਤਿਕਾਰ ਹੈ ਕਿਉਂਕਿ ਉਹਨਾਂ ਨੇ ਇਕ ਬਹੁਤ ਵਧੀਆ ਇਨਸਾਨ ਨੂੰ ਜਨਮ ਦਿੱਤਾ ਹੈ। ਲੌਰੀ ਦਾ ਕਹਿਣਾ ਹੈ ਕਿ ਉਹ ਗੁਰਮੀਤ ਦੇ ਪਰਿਵਾਰ ਦਾ ਦਿਲ ਜਿੱਤਣਾ ਚਾਹੁੰਦੀ ਹੈ।

ਵਿਚਾਰਨਯੋਗ ਗੱਲ ਇਹ ਹੈ ਕਿ ਜਿੱਥੇ ਸਿੱਖ ਸਿਧਾਂਤਾਂ ਨੂੰ ਮੰਨਣ ਵਾਲੇ ਦੂਜੇ ਧਰਮਾਂ ਤੋਂ ਪਰਵਰਤਿਤ ਹੋ ਰਹੇ ਲੋਕਾਂ ਦਾ ਸਵਾਗਤ ਕਰਦੇ ਹਨ ਤਾਂ ਫਿਰ ਅਪਣੇ ਹੀ ਭਾਈਚਾਰੇ ਦੇ ਦੂਜੇ ਧਰਮਾਂ ਦੇ ਜੀਵਨਸਾਥੀਆਂ ਦਾ ਸਵਾਗਤ ਕਰਨ ਵਿਚ ਫਾਡੀ ਕਿਉਂ ਹਨ। ਜੇ ਕਿਤੇ ਉਹਨਾਂ ਦਾ ਵੀ ਪਿਆਰ ਨਾਲ ਸਵਾਗਤ ਕੀਤਾ ਜਾਵੇ ਤਾਂ ਉਹ ਸਿੱਖ ਧਰਮ ਵਿਚ ਪਰਵੇਸ਼ ਕਰਨ ਤੋਂ ਗੁਰੇਜ਼ ਨਹੀਂ ਕਰਨਗੇ।