ਨਵੀਂ ਦਿੱਲੀ : ਟੀਮ ਇੰਡੀਆ ਦੇ ਆਲਰਾਊਡਰ ਹਾਰਦਿਕ ਪਾਂਡਿਆ ਔਖੇ ਦੌਰ ਵਿਚੋਂ ਲੰਘ ਰਹੇ ਹਨ। ਕ੍ਰਿਕੇਟਰ ਨੇ ਅਪਣੀ ਟੀਮ ਦੇ ਸਾਥੀ ਕੇਐਲ ਰਾਹੁਲ ਦੇ ਨਾਲ 'ਕਾਫ਼ੀ ਵਿਦ ਕਰਨ' ਸ਼ੋਅ ਵਿਚ ਔਰਤਾਂ ਵਿਰੁਧ ਗਲਤ ਬਿਆਨ ਦੇ ਕੇ ਵਿਵਾਦਾਂ ਨੂੰ ਅਵਾਜ਼ ਦਿਤੀ। ਇਸ ਦਾ ਨਤੀਜਾ ਵੀ ਪਾਂਡਿਆ ਨੂੰ ਭੁਗਤਣਾ ਪਿਆ ਅਤੇ ਆਸਟਰੇਲੀਆ ਅਤੇ ਨਿਊਜੀਲੈਂਡ ਦੌਰੇ ਤੋਂ ਉਨ੍ਹਾਂ ਨੂੰ ਮੁਅੱਤਲ ਕਰ ਦਿਤਾ ਗਿਆ। ਬੀਸੀਸੀਆਈ ਦੇ ਅਗਲੇ ਫ਼ੈਸਲੇ ਤੱਕ ਉਹ ਮੁਅੱਤਲ ਰਹਿਣਗੇ। 25 ਸਾਲ ਦੇ ਹਾਰਦਿਕ ਪਾਂਡਿਆ ਬਾਰੇ ਉਨ੍ਹਾਂ ਦੇ ਪਿਤਾ ਨੇ ਵੱਡਾ ਖੁਲਾਸਾ ਕੀਤਾ ਹੈ।

ਪਿਤਾ ਨੇ ਦੱਸਿਆ ਕਿ ਹਾਰਦਿਕ ਬਹੁਤ ਨਿਰਾਸ਼ ਹਨ ਅਤੇ ਉਨ੍ਹਾਂ ਨੇ ਅਪਣੇ ਆਪ ਨੂੰ ਕਮਰੇ ਵਿਚ ਕੈਦ ਕਰ ਲਿਆ ਹੈ। ਮੀਡੀਆ ਨਾਲ ਗੱਲਬਾਤ ਵਿਚ ਹਾਰਦਿਕ ਦੇ ਪਿਤਾ ਨੇ ਕਿਹਾ, ਮੇਰਾ ਪੁੱਤਰ ਬਹੁਤ ਨਿਰਾਸ਼ ਹੈ। ਟੀਵੀ ਸ਼ੋਅ ਉਤੇ ਦਿਤੇ ਬਿਆਨਾਂ ਦਾ ਉਸ ਨੂੰ ਦੁਖ ਹੈ। ਉਸ ਨੇ ਵਿਸ਼ਵਾਸ ਦਿਵਾਇਆ ਹੈ ਕਿ ਭਵਿੱਖ ਵਿਚ ਉਹ ਕਦੇ ਅਜਿਹੀ ਗਲਤੀ ਨਹੀਂ ਕਰਨਗੇ। ਅਸੀਂ ਵੀ ਤੈਅ ਕੀਤਾ ਹੈ ਕਿ ਉਸ ਨਾਲ ਇਸ ਵਿਸ਼ੇ ਉਤੇ ਗੱਲਬਾਤ ਨਹੀਂ ਕਰਨਗੇ। ਪਿਤਾ ਨੇ ਦੱਸਿਆ, ਜਦੋਂ ਤੋਂ ਹਾਰਦਿਕ ਆਸਟਰੇਲੀਆ ਤੋਂ ਮੁੜਿਆ ਹੈ ਉਦੋਂ ਤੋਂ ਕਮਰੇ ਤੋਂ ਬਾਹਰ ਨਹੀਂ ਨਿਕਲਿਆ। ਉਹ ਕਿਸੇ ਦੇ ਫੋਨ ਕਾਲ ਵੀ ਨਹੀਂ ਲੈ ਰਿਹਾ।

ਉਸ ਨੂੰ ਪਤੰਗ ਉਡਾਉਣ ਦਾ ਸ਼ੌਕ ਹੈ, ਪਰ ਇਸ ਵਾਰ ਨਿਰਾਸ਼ਾ ਦੇ ਚਲਦੇ ਉਸ ਨੇ ਮਕਰ ਸੰਕਰਾਂਤੀ ਉਤੇ ਪਤੰਗ ਵੀ ਨਹੀਂ ਉਡਾਈ। ਸਾਨੂੰ ਬੀਸੀਸੀਆਈ ਦੇ ਫ਼ੈਸਲੇ ਦਾ ਇੰਤਜ਼ਾਰ ਹੈ। ਦੱਸ ਦਈਏ ਕਿ ਇਸ ਤੋਂ ਪਹਿਲਾਂ ਪਾਂਡਿਆ ਦੇ ਪਿਤਾ ਨੇ ਅਪਣੇ ਪੁੱਤਰ ਦਾ ਬਚਾਅ ਕਰਦੇ ਹੋਏ ਕਿਹਾ ਸੀ ਕਿ ਹਾਰਦਿਕ ਨੇ ਜੋ ਕੁੱਝ ਵੀ ਕਿਹਾ, ਉਹ ਮਸਤੀ ਭਰੇ ਅੰਦਾਜ਼ ਵਿਚ ਕਿਹਾ ਸੀ। ਉਸ ਨੂੰ ਗੰਭੀਰਤਾ ਨਾਲ ਲੈਣ ਦੀ ਜ਼ਰੂਰਤ ਨਹੀਂ ਹੈ। ਹਾਰਦਿਕ ਨੇ ਦਰਸ਼ਕਾਂ ਦਾ ਮਨੋਰੰਜਨ ਕੀਤਾ। ਹਾਲਾਂਕਿ ਸ਼ੋਅ ਵਿਚ ਹਾਰਦਿਕ ਨੇ ਜੋ ਖੁਲਾਸੇ ਕੀਤੇ ਉਸ ਨਾਲ ਕ੍ਰਿਕਟਰਾਂ ਦੇ ਅਕਸ ਨੂੰ ਨੁਕਸਾਨ ਪਹੁੰਚਿਆ ਹੈ।