ਨਵੀਂ ਦਿੱਲੀ : ਭਾਰਤ ਦੇ ਦੋ ਵਾਰ ਦੇ ਓਲੰਪਿਕ ਮੈਡਲ ਜੇਤੂ ਸਾਬਕਾ ਅੰਤਰਰਾਸ਼ਟਰੀ ਹਾਕੀ ਖਿਡਾਰੀ ਰਘਬੀਰ ਸਿੰਘ ਭੋਲਾ ਦਾ 92 ਸਾਲ ਦੀ ਉਮਰ ਵਿਚ ਦਿਹਾਂਤ ਹੋ ਗਿਆ। ਉਨ੍ਹਾਂ ਨੇ 1956 ਮੇਲਬੋਰਨ ਅਤੇ 1960 ਰੋਮ ਓਲੰਪਿਕ ਵਿਚ ਕ੍ਰਮਵਾਰ ਸੋਨਾ ਅਤੇ ਸਿਲਵਰ ਮੈਡਲ ਜਿੱਤੇ ਸਨ। ਉਨ੍ਹਾਂ ਦੇ ਪਰਿਵਾਰ ਨੇ ਦੱਸਿਆ ਕਿ ਭੋਲਾ ਨੇ ਸੋਮਵਾਰ ਨੂੰ ਆਖਰੀ ਸਾਹ ਲਏ। ਉਨ੍ਹਾਂ ਦੇ ਪਰਿਵਾਰ ਵਿਚ ਪਤਨੀ ਕਮਲਾ ਭੋਲਾ, ਤਿੰਨ ਬੇਟੀਆਂ ਅਤੇ ਤਿੰਨ ਦੋਹਤੀਆਂ ਹਨ।

 ਆਈਓਏ ਨੇ ਅਪਣੇ ਟਵਿਟਰ ਹੈਂਡਲ ਉਤੇ ਲਿਖਿਆ, 'ਆਈਓਏ ਦਿੱਗਜ ਹਾਕੀ ਖਿਡਾਰੀ ਆਰਐਸ ਭੋਲਾ ਦੇ ਦਿਹਾਂਤ ਉਤੇ ਦੁੱਖ ਪ੍ਰਗਟ ਕਰਦਾ ਹੈ। ਦੋ ਵਾਰ ਦੇ ਓਲੰਪਿਕ ਮੈਡਲ ਜੇਤੂ, ਅਰਜੁਨ ਇਨਾਮ ਜੇਤੂ ਅਤੇ ਜਨੂਨੀ ਹਾਕੀ ਖਿਡਾਰੀ,  ਆਰਐਸ ਭੋਲਾ ਨੇ ਆਖਰੀ ਸਾਹ ਲਏ।'ਅੰਤਰਰਾਸ਼ਟਰੀ ਹਾਕੀ ਫੈਡਰੇਸ਼ਨ (ਐਫਆਈਐਚ) ਦੇ ਪ੍ਰਮੁੱਖ ਅਤੇ ਆਈਓਏ ਪ੍ਰਧਾਨ ਨਰਿੰਦਰ ਬਤਰਾ ਨੇ ਭੋਲਾ ਨੂੰ ਸ਼ਰਧਾਂਜਲੀ ਦਿਤੀ। ਬਤਰਾ ਨੇ ਬਿਆਨ ਵਿਚ ਕਿਹਾ, 'ਗਰੁਪ ਕਪਤਾਨ (ਸੇਵਾਮੁਕਤ) ਰਘਬੀਰ ਸਿੰਘ ਭੋਲਾ ਦੇ ਦਿਹਾਂਤ ਦੀ ਖਬਰ ਤੋਂ ਮੈਂ ਹੈਰਾਨ ਹਾਂ।

ਮੈਂ ਉਨ੍ਹਾਂ ਦੀ ਆਤਮਾ ਦੀ ਸ਼ਾਂਤੀ ਦੀ ਅਰਦਾਸ ਕਰਦਾ ਹਾਂ ਅਤੇ ਉਨ੍ਹਾਂ ਦੇ ਪਰਿਵਾਰ ਅਤੇ ਪੂਰੇ ਹਾਕੀ ਜਗਤ ਦੇ ਪ੍ਰਤੀ ਮੇਰੀ ਹਮਦਰਦੀ ਹੈ।' ਉਨ੍ਹਾਂ ਨੇ ਕਿਹਾ, 'ਉਹ ਮੈਲਬੋਰਨ ਵਿਚ 1956 ਵਿਚ ਓਲੰਪਿਕ ਸੋਨਾ ਅਤੇ ਰੋਮ ਵਿਚ 1960 ਵਿਚ ਓਲੰਪਿਕ ਸਿਲਵਰ ਮੈਡਲ ਜਿੱਤਣ ਵਾਲੀ ਭਾਰਤੀ ਪੁਰਸ਼ ਹਾਕੀ ਟੀਮ ਦੇ ਮੈਂਬਰ ਸਨ। ਉਨ੍ਹਾਂ ਨੇ ਖਿਡਾਰੀ, ਅੰਪਾਇਰ ਅਤੇ ਟੀਮ ਮੈਨੇਜਰ ਦੇ ਰੂਪ ਵਿਚ ਹਾਕੀ ਨੂੰ ਸ਼ਾਨਦਾਰ ਯੋਗਦਾਨ ਦਿਤਾ।'

ਖੇਡ ਨੂੰ ਅਲਵਿਦਾ ਕਹਿਣ ਤੋਂ ਬਾਅਦ ਵੀ ਭੋਲਾ ਆਈਐਚਐਫ ਦੀ ਚੋਣ ਕਮੇਟੀ ਦੇ ਮੈਂਬਰ ਰਹੇ। ਉਹ ਐਫਆਈਐਚ ਦੇ ਅੰਤਰਰਾਸ਼ਟਰੀ ਅੰਪਾਇਰ, ਭਾਰਤੀ ਹਾਕੀ ਟੀਮ ਦੇ ਮੈਨੇਜਰ, ਟੀਵੀ ਕਮੇਂਟੇਟਰ ਅਤੇ ਓਲੰਪਿਕ ਖੇਡਾਂ ਵਿਚ ਸਰਕਾਰੀ ਸੁਪਰਵਾਇਜ਼ਰ ਵੀ ਰਹੇ। ਉਨ੍ਹਾਂ ਨੇ 1954 ਤੋਂ 1960 ਤੱਕ ਭਾਰਤੀ ਹਵਾਈ ਫੌਜ ਅਤੇ ਫੌਜ ਦੀ ਹਾਕੀ ਟੀਮਾਂ ਦੀ ਕਪਤਾਨੀ ਕੀਤੀ। ਫੌਜ ਦੇ ਵੱਖਰੇ ਵਿਭਾਗਾਂ ਦੇ ਵਿਚ ਹੋਈ ਚੈਂਪੀਅਨਸ਼ਿਪ ਵਿਚ ਉਨ੍ਹਾਂ ਦੀ ਟੀਮ ਤਿੰਨ ਵਾਰ ਜੇਤੂ ਰਹੀ ਅਤੇ ਦੋ ਵਾਰ ਰਾਸ਼ਟਰੀ ਚੈਂਪੀਅਨਸ਼ਿਪ ਜਿੱਤੀ। ਉਨ੍ਹਾਂ ਨੂੰ 2000 ਵਿਚ ਅਰਜੁਨ ਇਨਾਮ ਨਾਲ ਨਵਾਜ਼ਿਆ ਗਿਆ ਸੀ।