Team India beat hosts Malaysia 4-2 goals

ਇਪੋਹ (ਮਲੇਸ਼ੀਆ) : ਭਾਰਤੀ ਹਾਕੀ ਟੀਮ ਨੇ 28ਵੇਂ ਸੁਲਤਾਨ ਅਜਲਾਨ ਸ਼ਾਹ ਕੱਪ ਹਾਕੀ ਟੂਰਨਾਮੈਂਟ 'ਚ ਆਪਣੇ ਤੀਜੇ ਮੈਚ 'ਚ ਮੰਗਲਵਾਰ ਨੂੰ ਮੇਜ਼ਬਾਨ ਮਲੇਸ਼ੀਆ ਨੂੰ 4-2 ਨਾਲ ਹਰਾ ਦਿਤਾ। ਟੂਰਨਾਮੈਂਟ 'ਚ ਭਾਰਤ ਦੀ ਇਹ ਦੂਜੀ ਜਿੱਤ ਹੈ। ਉਸ ਨੇ ਪਹਿਲੇ ਮੈਚ 'ਚ ਜਾਪਾਨ ਨੂੰ 2-0 ਨਾਲ ਹਰਾਇਆ ਸੀ। ਦੂਜੇ ਮੁਕਾਬਲੇ 'ਚ ਦੱਖਣ ਕੋਰੀਆ ਨਾਲ 1-1 ਤੋਂ ਡਰਾਅ ਖੇਡਿਆ ਸੀ। ਇਸ ਜਿੱਤ ਨਾਲ ਭਾਰਤੀ ਟੀਮ 3 ਮੈਚਾਂ 'ਚ 7 ਅੰਕਾਂ ਨਾਲ ਸੂਚੀ 'ਚ ਦੱਖਣ ਕੋਰੀਆ ਨਾਲ ਸੰਯੁਕਤ ਰੂਪ 'ਚ ਟਾਪ 'ਤੇ ਹੈ।

 

 

ਭਾਰਤੀ ਟੀਮ ਵੱਲੋਂ ਇਸ ਮੈਚ 'ਚ ਸੁਮਿਤ ਨੇ 17ਵੇਂ, ਸੁਮਿਤ ਕੁਮਾਰ ਨੇ 27ਵੇਂ, ਵਰੁਣ  ਕੁਮਾਰ ਨੇ 37ਵੇਂ ਅਤੇ ਮਨਦੀਪ ਸਿੰਘ ਨੇ 58ਵੇਂ ਮਿੰਟ 'ਚ ਗੋਲ ਕੀਤਾ। ਮਲੇਸ਼ੀਆ ਲਈ ਰੇਜੀ ਰਹੀਮ ਨੇ 21ਵੇਂ ਅਤੇ ਤਾਜੁਦੀਨ ਤੇਂਗਕੁ ਨੇ 57ਵੇਂ ਮਿੰਟ 'ਚ ਗੋਲ ਕੀਤਾ। 

 

 

ਦੋਵੇਂ ਟੀਮਾਂ ਪਹਿਲੇ ਕੁਆਰਟਰ 'ਚ ਕੋਈ ਗੋਲ ਨਾ ਕਰ ਸਕੀਆਂ। ਦੂਜੇ ਕੁਆਰਟਰ 'ਚ ਭਾਰਤ ਵੱਲੋਂ 17ਵੇਂ ਮਿੰਟ 'ਚ ਸੁਮਿਤ ਨੇ ਗੋਲ ਕੀਤਾ। ਮਲੇਸ਼ੀਆ ਵੱਲੋਂ ਰਹੀਮ ਨੇ ਪੈਨਲਟੀ ਕਾਰਨਰ ਨੂੰ ਗੋਲ 'ਚ ਬਦਲ ਕੇ ਸਕੋਰ 1-1 ਕਰ ਦਿੱਤਾ। ਇਸ ਤੋਂ ਬਾਅਦ 27ਵੇਂ ਮਿੰਟ 'ਚ ਸੁਮਿਤ ਕੁਮਾਰ ਨੇ ਮੈਦਾਨੀ ਗੋਲ ਕਰ ਕੇ ਸਕੋਰ 2-1 ਕਰ ਦਿੱਤਾ। ਹਾਫ਼ ਟਾਈਮ ਤਕ ਇਹ ਸਕੋਰ ਕਾਇਮ ਰਿਹਾ। ਹਾਫ਼ ਟਾਈਮ ਤੋਂ ਬਾਅਦ 37ਵੇਂ ਮਿੰਟ 'ਚ ਵਰੁਣ ਨੇ ਪੈਨਲਟੀ ਕਾਰਨਰ ਨੂੰ ਗੋਲ 'ਚ ਬਦਲ ਕੇ ਸਕੋਰ 3-1 ਕਰ ਦਿੱਤਾ। 

 

 

ਚੌਥੇ ਅਤੇ ਅੰਤਮ ਕੁਆਰਟਰ ਤੇ 57ਵੇਂ ਮਿੰਟ 'ਚ ਤੇਂਗਕੁ ਨੇ ਮੈਦਾਨੀ ਗੋਲ ਕਰ ਕੇ ਮਲੇਸ਼ੀਆ ਦੇ ਸਕੋਰ ਨੂੰ 2-3 ਕਰ ਦਿੱਤਾ। ਇਸ ਤੋਂ ਬਾਅਦ ਅਗਲੇ ਹੀ ਮਿੰਟ 'ਚ ਮਨਦੀਪ ਨੇ ਸ਼ਾਨਦਾਰ ਗੋਲ ਕਰ ਕੇ ਸਕੋਰ ਨੂੰ 4-2 ਕਰ ਕੇ ਟੀਮ ਨੂੰ ਸ਼ਾਨਦਾਰ ਜਿੱਤ ਦਿਵਾ ਦਿੱਤਾ।