ਨਵੀਂ ਦਿੱਲੀ : ਭਾਰਤੀ ਕ੍ਰਿਕਟ ਟੀਮ ਦੇ ਕਈ ਖਿਡਾਰੀਆਂ ਨੇ ਦੀਵਾਲੀ ਦੇ ਜਸ਼ਨ ਦੀਆਂ ਤਸਵੀਰਾਂ ਨੂੰ ਸੋਸ਼ਲ ਮੀਡੀਆ 'ਤੇ ਸ਼ੇਅਰ ਕੀਤਾ। ਖਿਡਾਰੀਆਂ ਦੇ ਫੈਨਜ਼ ਨੇ ਉਨ੍ਹਾਂ ਦੀਆਂ ਤਸਵੀਰਾਂ ਨੂੰ ਕਾਫ਼ੀ ਪਸੰਦ ਵੀ ਕੀਤਾ, ਪਰ ਭਾਰਤੀ ਟੀਮ ਦੇ ਤੇਜ਼ ਗੇਂਦਬਾਜ਼ ਇਸ਼ਾਂਤ ਸ਼ਰਮਾ ਆਪਣੀ ਇਕ ਤਸਵੀਰ ਨੂੰ ਲੈ ਕੇ ਸੋਸ਼ਲ ਮੀਡੀਆ 'ਤੇ ਟਰੋਲ ਹੋ ਗਏ।
ਦਰਅਸਲ ਇਸ਼ਾਂਤ ਸ਼ਰਮਾ ਨੇ ਸੋਮਵਾਰ ਨੂੰ ਇੰਸਟਾਗ੍ਰਾਮ 'ਤੇ ਇਕ ਤਸਵੀਰ ਸ਼ੇਅਰ ਕੀਤੀ, ਜਿਸ 'ਚ ਉਹ ਆਪਣੇ ਪਰਵਾਰ ਨਾਲ ਨਜ਼ਰ ਆ ਰਹੇ ਹਨ। ਲੋਕਾਂ ਨੇ ਬਾਰੀਕੀ ਨਾਲ ਇਸ ਤਸਵੀਰ ਨੂੰ ਵੇਖਿਆ ਅਤੇ ਫਿਰ ਇਸ ਤਸਵੀਰ 'ਚ ਕੁਝ ਅਜਿਹਾ ਵਿਖਾਈ ਦਿੱਤਾ, ਜਿਸ ਕਾਰਨ ਇਸ਼ਾਂਤ ਨੂੰ ਲੋਕਾਂ ਦੇ ਗੁੱਸੇ ਦਾ ਸਾਹਮਣਾ ਕਰਨਾ ਪਿਆ। ਦਰਅਸਲ ਇਸ਼ਾਂਤ ਦੀ ਇਸ ਤਸਵੀਰ 'ਚ ਉਨ੍ਹਾਂ ਦੇ ਘਰ ਅੰਦਰ ਬਣੇ ਮੰਦਰ ਨੇੜੇ ਆਸਾਰਾਮ ਬਾਪੂ ਦੀ ਤਸਵੀਰ ਨਜ਼ਰ ਆ ਰਹੀ ਹੈ, ਜੋ ਇਸ ਸਮੇਂ ਬਲਾਤਕਾਰ ਦੇ ਦੋਸ਼ 'ਚ ਜੋਧਪੁਰ ਜੇਲ 'ਚ ਬੰਦ ਹਨ।
ਇਸ਼ਾਂਤ ਦੀ ਇਸ ਤਸਵੀਰ ਨੂੰ ਵੇਖ ਲੋਕ ਉਨ੍ਹਾਂ 'ਤੇ ਭੜਕ ਗਏ। ਇਸ਼ਾਂਤ ਸ਼ਰਮਾ ਨੂੰ ਸੋਸ਼ਲ ਮੀਡੀਆ 'ਤੇ ਇੰਨੀ ਖਰੀ-ਖੋਟੀ ਸੁਣਾਈ ਗਈ ਕਿ ਉਨ੍ਹਾਂ ਨੇ ਪ੍ਰੇਸ਼ਾਨ ਹੋ ਕੇ ਤਸਵੀਰ ਡਿਲੀਟ ਕਰ ਦਿੱਤੀ। ਇਸ ਤੋਂ ਬਾਅਦ ਇਸ਼ਾਂਤ ਨੇ ਉਸੇ ਫ਼ੋਟੋ ਨੂੰ ਕਰਾਪ ਕਰ ਕੇ ਦੁਬਾਰਾ ਪੋਸਟ ਕੀਤਾ।