ਬਜ਼ੁਰਗਾਂ ਨੂੰ ਡਿੱਗਣ ਤੋਂ ਬਚਾਏਗੀ ਇਹ ਨਕਲੀ ਪੂੰਛ
ਜਾਪਾਨੀ ਵਿਗਿਆਨੀਆਂ ਨੇ ਇਕ ਅਜਿਹੀ ਡਿਵਾਈਸ ਤਿਆਰ ਕੀਤੀ ਹੈ, ਜਿਸ ਨਾਲ ਕਮਜ਼ੋਰ ਕਿਸਮ ਦੇ ਬਜ਼ੁਰਗਾਂ ਨੂੰ ਚੱਲਣ ਫਿਰਨ ਵਿਚ ਮਦਦ ਮਿਲੇਗੀ।
ਜਪਾਨ: ਸਾਇੰਸ ਨੇ ਇੰਨੀ ਜ਼ਿਆਦਾ ਤਰੱਕੀ ਕਰ ਲਈ ਹੈ ਕਿ ਨਿੱਤ ਦਿਨ ਨਵੀਂਆਂ ਤੋਂ ਨਵੀਆਂ ਖੋਜਾਂ ਬਾਰੇ ਪੜ੍ਹਨ ਸੁਣਨ ਨੂੰ ਮਿਲਦੀਆਂ ਹਨ। ਹੁਣ ਜਾਪਾਨੀ ਵਿਗਿਆਨੀਆਂ ਨੇ ਇਕ ਅਜਿਹੀ ਡਿਵਾਈਸ ਤਿਆਰ ਕੀਤੀ ਹੈ, ਜਿਸ ਨਾਲ ਕਮਜ਼ੋਰ ਕਿਸਮ ਦੇ ਬਜ਼ੁਰਗਾਂ ਨੂੰ ਚੱਲਣ ਫਿਰਨ ਵਿਚ ਮਦਦ ਮਿਲੇਗੀ ਅਤੇ ਉਹ ਡਿੱਗਣੋਂ ਬਚ ਸਕਣਗੇ। ਜਪਾਨੀ ਵਿਗਿਆਨੀਆਂ ਵੱਲੋਂ ਇਕ ਨਕਲੀ ਪੂੰਛ ਬਣਾਈ ਗਈ ਹੈ ਜੋ ਇਨਸਾਨ ਨੂੰ ਬੈਲੈਂਸ ਬਣਾਉਣ ਵਿਚ ਮਦਦ ਕਰਦੀ ਹੈ
ਸੀ ਹਾਰਸ ਯਾਨੀ ਸਮੁੰਦਰੀ ਘੋੜੇ ਦੀ ਪੂੰਛ ਤੋਂ ਪ੍ਰੇਰਿਤ ਹੋ ਕੇ ਤਿਆਰ ਕੀਤੀ ਗਈ ਇਸ ਨਕਲੀ ਪੂੰਛ ਦਾ ਨਾਮ ਆਰਕਿਊ ਰੱਖਿਆ ਗਿਆ ਹੈ। ਇਸ ਡਿਵਾਈਸ ਨੂੰ ਲੱਕ ਨਾਲ ਬੰਨ੍ਹ ਕੇ ਵਰਤਿਆ ਜਾ ਸਕਦਾ ਹੈ। ਮਾਹਿਰਾਂ ਦਾ ਕਹਿਣਾ ਹੈ ਕਿ ਇਹ ਪੂੰਛ ਭਾਰੀ ਸਮਾਨ ਉਠਾਉਣ ਦੌਰਾਨ ਡਿੱਗਣ ਦੇ ਖ਼ਤਰੇ ਨੂੰ ਘੱਟ ਕਰੇਗੀ। ਜਪਾਨ ਵਿਚ ਬਜ਼ੁਰਗਾਂ ਦੀ ਵਧਦੀ ਗਿਣਤੀ ਦੇ ਕਾਰਨ ਅਜਿਹੇ ਆਵਿਸ਼ਕਾਰ ਉਥੇ ਕਾਫ਼ੀ ਹਰਮਨ ਪਿਆਰੇ ਹਨ।
ਬਜ਼ੁਰਗਾਂ ਦੀ ਵਧਦੀ ਗਿਣਤੀ ਨੂੰ ਲੈ ਕੇ ਜਪਾਨ ਸਰਕਾਰ ਵੀ ਚਿੰਤਾ ਜਤਾ ਚੁੱਕੀ ਹੈ ਅਤੇ ਇਸ ਨੂੰ ਰਾਸ਼ਟਰੀ ਐਮਰਜੈਂਸੀ ਐਲਾਨ ਕੀਤਾ ਗਿਆ ਹੈ। ਕੀਯੋ ਯੂਨੀਵਰਸਿਟੀ ਦੇ ਮਾਹਿਰਾਂ ਦਾ ਕਹਿਣਾ ਹੈ ਕਿ 71 ਸੈਂਟੀਮੀਟਰ ਲੰਬੀ ਇਸ ਪੂੰਛ ਨੂੰ ਆਰਟੀਫਿਸ਼ਲ ਮਾਸਪੇਸ਼ੀਆਂ ਨਾਲ ਬਣਾਇਆ ਗਿਆ ਹੈ। ਸਹੂਲਤ ਮੁਤਾਬਕ ਇਸ ਦੀ ਲੰਬਾਈ ਨੂੰ ਵੱਡਾ ਜਾਂ ਛੋਟਾ ਕੀਤਾ ਜਾ ਸਕਦਾ ਹੈ।
ਇਸ ਨੂੰ ਬਣਾਉਣ ਵਿਚ ਇਕ ਬਾਡੀ ਟ੍ਰੈਕਰ ਦੀ ਵਰਤੋਂ ਕੀਤੀ ਗਈ ਹੈ ਜੋ ਕਿਸੇ ਵਿਅਕਤੀ ਦੇ ਗ੍ਰੈਵਿਟੀ ਸੈਂਟਰ ਦਾ ਪਤਾ ਕਰੇਗੀ। ਜੇਕਰ ਕਿਸੇ ਵਿਅਕਤੀ ਦਾ ਗ੍ਰੈਵਟੀ ਸੈਂਟਰ ਉਸ ਤੋਂ ਦੂਰ ਹੁੰਦਾ ਹੈ ਯਾਨੀ ਉਹ ਡਿੱਗਣ ਦੀ ਸਥਿਤੀ ਵਿਚ ਹੋਵੇਗਾ ਤਾਂ ਇਹ ਪੂੰਛ ਉਸੇ ਹਿਸਾਬ ਨਾਲ ਬੈਲੇਂਸ ਬਣਾ ਕੇ ਉਸ ਨੂੰ ਡਿੱਗਣੋਂ ਬਚਾਏਗੀ। ਖ਼ੈਰ ਜਪਾਨੀ ਤਾਂ ਇਸ ਨਕਲੀ ਪੂੰਛ ਨੂੰ ਲੈ ਕੇ ਕਾਫ਼ੀ ਉਤਸ਼ਾਹਿਤ ਹਨ ਪਰ ਕੀ ਇਹ ਹੋਰਨਾਂ ਦੇਸ਼ਾਂ ਵਿਚ ਵੀ ਹਰਮਨ ਪਿਆਰੀ ਹੋ ਸਕੇਗੀ। ਇਸ ਬਾਰੇ ਕੁੱਝ ਨਹੀਂ ਕਿਹਾ ਜਾ ਸਕਦਾ।
Punjabi News ਨਾਲ ਜੁੜੀ ਹੋਰ ਅਪਡੇਟ ਲਗਾਤਾਰ ਹਾਸਲ ਕਰਨ ਲਈ ਸਾਨੂੰ Facebook ਤੇ ਲਾਈਕ Twitter ਤੇ follow ਕਰੋ।