ਬੇਰੂਤ : ਸੀਰੀਆ ਵਿਚ ਜੇਹਾਦੀਆਂ ਦੇ ਕਬਜ਼ੇ ਵਾਲੇ ਉਤਰ ਪਛਮੀ ਖੇਤਰ ਵਿਚ ਸਰਕਾਰੀ ਬਲਾਂ ਵਲੋਂ ਕੀਤੇ ਗਏ ਹਵਾਈ ਹਮਲਿਆਂ ਵਿਚ 17 ਆਮ ਨਾਗਰਿਕਾਂ ਅਤੇ 11 ਜੇਹਾਦੀਆਂ ਦੀ ਮੌਤ ਹੋਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਯੁੱਧ ਦੀ ਨਿਗਰਾਨੀ ਕਰਨ ਵਾਲੀ ਸੀਰੀਅਨ ਆਬਜ਼ਰਵੇਟਰੀ ਫ਼ਾਰ ਹਿਊਮਨ ਰਾਈਟਸ ਨੇ ਕਿਹਾ ਹੈ ਕਿ ਇਦਲਿਬ ਸੂਬੇ ਦੇ ਜਬਲ ਅਲ-ਜਾਵੀਆ ਖੇਤਰ ਵਿਚ ਸਰਕਾਰੀ ਬਲਾਂ ਵਲੋਂ ਕੀਤੇ ਗਏ ਹਮਲਿਆਂ ਵਿਚ 11 ਨਾਗਰਿਕਾਂ ਦੀ ਮੌਤ ਹੋ ਗਈ ਹੈ।
ਇਸ ਸੰਸ਼ਥਾ ਨੇ ਕਿਹਾ ਕਿ ਚਾਰ ਹੋਰ ਨਾਗਰਿਕ ਇਦਲਿਬ ਦੇ ਨੇੜਲੇ ਇਲਾਕਿਆਂ ਅਤੇ ਪਿੰਡਾਂ ਵਿਚ ਹੋਏ ਹਵਾਈ ਹਮਲਿਆਂ ਵਿਚ ਮਾਰੇ ਗਏ ਹਨ ਜਦਕਿ ਇਕ ਨਾਗਰਿਕ ਦੀ ਮੌਤ ਇਦਲਿਬ ਦੇ ਸੂਬਾਈ ਰਾਜਧਾਨੀ ਦੇ ਨੇੜੇ ਹੋਈ ਹੈ। ਨੇੜਲੇ ਹਾਮਾ ਸੂਬੇ ਦੇ ਉਤਰ ਵਿਚ ਹੋਏ ਰਾਕਟ ਹਮਲਿਆਂ ਵਿਚ ਲਗਭਗ 11 ਜੇਹਾਦੀ ਮਾਰੇ ਗਏ।
ਦੂਜੇ ਪਾਸੇ ਇਸ ਸੰਸਥਾ ਨੇ ਦਾਅਵਾ ਕੀਤਾ ਹੈ ਕਿ ਪਿਛਲੇ 48 ਘੰਟਿਆਂ ਦੌਰਾਨ ਸਰਕਾਰੀ ਬਲਾਂ ਅਤੇ ਜੇਹਾਦੀਆਂ ਵਿਚਾਲੇ ਹੋਈ ਲੜਾਈ ਵਿਚ ਲਗਭਗ 130 ਲੜਾਕਿਆਂ ਦੀ ਮੌਤ ਹੋ ਗਈ ਹੈ। ਇਦਲਿਬ ਖੇਤਰ ਵਿਚ ਸਰਕਾਰ ਅਤੇ ਉਸ ਦਾ ਸਹਿਯੋਗੀ ਰੂਸ ਅਪ੍ਰੈਲ ਮਹੀਨੇ ਤੋਂ ਹੀ ਬੰਬਾਰੀ ਕਰ ਰਹੇ ਸਨ। ਇਸ ਖੇਤਰ ਵਿਤ ਲਗਭਗ 30 ਲੱਖ ਲੋਕ ਰਹਿੰਦੇ ਹਨ। ਸੰਸਥਾ ਨੇ ਕਿਹਾ ਕਿ ਇਸ ਇਲਾਕੇ ਵਿਚ ਮੰਗਲਵਾਰ ਤੋਂ ਬੰਬਾਰੀ ਵਿਚ ਵਾਧਾ ਹੋਇਆ ਹੈ ਜਿਸ ਕਾਰਨ ਸਰਕਾਰ ਵਿਰੋਧੀ 89 ਲੜਾਕੇ ਮਾਰੇ ਗਏ ਹਨ ਜਦਕਿ ਸਰਕਾਰੀ ਬਲਾਂ ਦੇ 41 ਲੋਕ ਮਾਰੇ ਗਏ ਹਨ।