Unilever dry shampoos recalled due to benzene

 

ਨਵੀਂ ਦਿੱਲੀ: ਮਸ਼ਹੂਰ ਕੰਪਨੀ ਯੂਨੀਲੀਵਰ ਦੇ ਕਈ ਸ਼ੈਂਪੂ ਬ੍ਰਾਂਡਾਂ 'ਚ ਕੈਂਸਰ ਪੈਦਾ ਕਰਨ ਵਾਲਾ ਕੈਮੀਕਲ ਪਾਇਆ ਗਿਆ ਹੈ। ਕੰਪਨੀ ਨੇ ਅਮਰੀਕੀ ਬਾਜ਼ਾਰ ਤੋਂ Dove, Nexxus, Suave, TIGI ਅਤੇ TRESemmé ਐਰੋਸੋਲ ਡਰਾਈ ਸ਼ੈਂਪੂ ਵਾਪਸ ਮੰਗਵਾਏ ਹਨ। ਇਕ ਰਿਪੋਰਟ ਮੁਤਾਬਕ ਇਹਨਾਂ ਵਿਚ ਬੈਂਜੀਨ ਦੀ ਮੌਜੂਦਗੀ ਪਾਈ ਗਈ ਹੈ।

ਇਹ ਰਸਾਇਣ ਕੈਂਸਰ ਦਾ ਕਾਰਨ ਬਣ ਸਕਦਾ ਹੈ। ਯੂਐਸ ਫੂਡ ਐਂਡ ਡਰੱਗ ਐਡਮਨਿਸਟ੍ਰੇਸ਼ਨ ਅਨੁਸਾਰ ਇਹ ਉਤਪਾਦ ਅਕਤੂਬਰ 2021 ਤੋਂ ਪਹਿਲਾਂ ਤਿਆਰ ਕੀਤੇ ਗਏ ਸਨ ਅਤੇ ਦੇਸ਼ ਭਰ ਦੇ ਰਿਟੇਲਰਾਂ ਨੂੰ ਵੰਡੇ ਗਏ ਸਨ। ਇਹਨਾਂ ਵਿਚ ਡਵ ਡ੍ਰਾਈ ਸ਼ੈਂਪੂ ਵਾਲੀਅਮ ਅਤੇ ਫੁੱਲਨੈੱਸ, ਡਵ ਡਰਾਈ ਸ਼ੈਂਪੂ ਫਰੈਸ਼ ਕੋਕੋਨਟ, ਨੈਕਸਸ ਡ੍ਰਾਈ ਸ਼ੈਂਪੂ ਰਿਫਰੈਸ਼ਿੰਗ ਮਿਸਟ ਅਤੇ ਸੂਏਵ ਪ੍ਰੋਫੈਸ਼ਨਲਜ਼ ਡ੍ਰਾਈ ਸ਼ੈਂਪੂ ਰਿਫ੍ਰੈਸ਼ ਅਤੇ ਰੀਵਾਈਵ ਸ਼ਾਮਲ ਹਨ।

ਬੈਂਜੀਨ ਮਨੁੱਖਾਂ ਵਿਚ ਕੈਂਸਰ ਦਾ ਕਾਰਨ ਬਣ ਸਕਦੀ ਹੈ। FDA ਨੇ ਆਪਣੇ ਰੀਕਾਲ ਨੋਟਿਸ 'ਚ ਕਿਹਾ ਹੈ ਕਿ ਬੈਂਜੀਨ ਕਈ ਤਰੀਕਿਆਂ ਨਾਲ ਮਨੁੱਖੀ ਸਰੀਰ 'ਚ ਦਾਖਲ ਹੋ ਸਕਦੀ ਹੈ। ਇਹ ਗੰਧ ਦੁਆਰਾ, ਮੂੰਹ ਰਾਹੀਂ ਅਤੇ ਚਮੜੀ ਰਾਹੀਂ ਸਰੀਰ ਵਿਚ ਦਾਖਲ ਹੋ ਸਕਦਾ ਹੈ। ਇਸ ਨਾਲ ਲਿਊਕੇਮੀਆ ਅਤੇ ਬਲੱਡ ਕੈਂਸਰ ਹੋ ਸਕਦਾ ਹੈ। FDA ਦਾ ਕਹਿਣਾ ਹੈ ਕਿ ਲੋਕਾਂ ਨੂੰ ਅਜਿਹੇ ਉਤਪਾਦਾਂ ਦੀ ਵਰਤੋਂ ਬੰਦ ਕਰਨੀ ਚਾਹੀਦੀ ਹੈ ਅਤੇ ਆਪਣੇ ਪੈਸੇ ਵਾਪਸ ਲੈਣ ਲਈ UnileverRecall.com ਦੀ ਵੈੱਬਸਾਈਟ 'ਤੇ ਜਾਣਾ ਚਾਹੀਦਾ ਹੈ। ਯੂਨੀਲੀਵਰ ਨੇ ਇਸ 'ਤੇ ਤੁਰੰਤ ਕੋਈ ਟਿੱਪਣੀ ਨਹੀਂ ਕੀਤੀ।

ਡ੍ਰਾਈ ਸ਼ੈਂਪੂ ਕੀ ਹੈ?

ਤੁਸੀਂ ਆਪਣੇ ਵਾਲਾਂ ਨੂੰ ਗਿੱਲੇ ਕੀਤੇ ਬਿਨਾਂ ਸਾਫ਼ ਕਰਨ ਲਈ ਡ੍ਰਾਈ ਸ਼ੈਂਪੂ ਦੀ ਵਰਤੋਂ ਕਰ ਸਕਦੇ ਹੋ। ਇਹ ਪਾਊਡਰ ਜਾਂ ਸਪਰੇਅ ਦੇ ਰੂਪ ਵਿਚ ਆਉਂਦੇ ਹਨ। ਕਲੀਵਲੈਂਡ ਕਲੀਨਿਕ ਅਨੁਸਾਰ ਇਹ ਸਟਾਰਚ ਜਾਂ ਅਲਕੋਹਲ-ਅਧਾਰਤ ਸ਼ੈਂਪੂ ਵਾਲਾਂ ਵਿਚੋਂ ਜਮ੍ਹਾਂ ਹੋਏ ਤੇਲ ਅਤੇ ਗਰੀਸ ਨੂੰ ਹਟਾ ਦਿੰਦੇ ਹਨ ਅਤੇ ਉਹਨਾਂ ਨੂੰ ਸੰਘਣਾ ਦਿਖਾਉਂਦੇ ਹਨ। ਕੁਝ ਡ੍ਰਾਈ ਸ਼ੈਂਪੂ ਵਿਚ ਐਰੋਸੋਲ ਸਪਰੇਅ ਹੁੰਦਾ ਹੈ।