ਬਰਫ਼ ਵਿਚ ਜੰਮ ਚੁੱਕੀਆਂ ਸੀ ਬਿੱਲੀਆਂ ਦੀਆਂ ਪੂੰਛਾਂ, ਇੰਜ ਬਚੀ ਜਾਨ!
ਲੋਕ ਕੈਨਡਾਲ ਡਿਵਿਸ਼ਚ ਨੂੰ ਦੇ ਰਹੇ ਨੇ ਹੀਰੋ ਦਾ ਖਿਤਾਬ
ਅਲਬਰਟਾ : ਪੱਛਮੀ ਦੇਸ਼ਾਂ ਅੰਦਰ ਹੋ ਰਹੀ ਭਾਰੀ ਬਰਫ਼ਬਾਰੀ ਨੇ ਜਿੱਥੇ ਆਮ ਲੋਕਾਂ ਨੂੰ ਪ੍ਰੇਸ਼ਾਨੀ 'ਚ ਪਾਇਆ ਹੋਇਆ ਹੈ ਉਥੇ ਹੀ ਇਹ ਬਰਫ਼ਬਾਰੀ ਦੂਸਰੇ ਜੀਵ-ਜੰਤੂਆਂ ਦੀ ਜਾਨ ਦਾ ਖੌਅ ਬਣੀ ਹੋਈ ਹੈ। ਇਸੇ ਤਰ੍ਹਾਂ ਦਾ ਹੀ ਇਕ ਮਾਮਲਾ ਕੈਨੇਡਾ ਵਿਚ ਸਾਹਮਣੇ ਆਇਆ ਹੈ ਜਿੱਥੇ ਤਿੰਨ ਬਿੱਲੀਆਂ ਭਾਰੀ ਬਰਫਬਾਰੀ ਦੌਰਾਨ ਬਰਫ਼ ਵਿਚ ਫਸ ਗਈਆਂ।
ਇਨ੍ਹਾਂ ਬਿੱਲੀਆਂ ਦੀਆਂ ਪੂਛਾਂ ਬਰਫ਼ 'ਚ ਜੰਮ ਚੁੱਕੀਆਂ ਸਨ ਜਿਸ ਕਾਰਨ ਉਨ੍ਹਾਂ ਦਾ ਬਰਫ਼ ਉਤੋਂ ਇਧਰ-ਉਧਰ ਹਿੱਲਣਾ ਵੀ ਮੁਸ਼ਕਲ ਹੋ ਚੁੱਕਾ ਸੀ। ਇਸੇ ਦੌਰਾਨ ਇਕ ਆਇਲ ਵਰਕਰ ਦੀ ਨਜ਼ਰ ਇਨ੍ਹਾਂ ਬਿੱਲੀਆਂ 'ਤੇ ਪਈ।
ਉਸ ਨੇ ਇਨ੍ਹਾਂ ਬਿੱਲੀਆਂ ਨੂੰ ਕਾਫ਼ੀ ਮੁਸ਼ੱਕਤ ਤੋਂ ਬਾਅਦ ਬਚਾਅ ਲਿਆ। ਬਿੱਲੀਆਂ ਦੀ ਇਸ ਤਰ੍ਹਾਂ ਜਾਨ ਬਚਾਉਣ ਖ਼ਾਤਰ ਉਸ ਨੂੰ ਲੋਕ ਹੀਰੋ ਦਾ ਖ਼ਿਤਾਬ ਦੇ ਰਹੇ ਹਨ।
ਜਾਣਕਾਰੀ ਅਨੁਸਾਰ ਕੈਨਡਾਲ ਡਿਵਿਸ਼ਚ ਨਾਂ ਦਾ ਇਹ ਕਾਮਾ ਅਲਬਰਟਾ ਸੂਬੇ ਦੇ ਟੋਮਾਹਾਵਕ ਇਲਾਕੇ 'ਚ ਘੁੰਮ ਰਿਹਾ ਸੀ। ਇਸੇ ਦੌਰਾਨ ਉਸ ਦੀ ਨਜ਼ਰ ਬਰਫ਼ 'ਚ ਫਸ ਚੁੱਕੀਆਂ ਤਿੰਨ ਬਿਲੀਆਂ 'ਤੇ ਪਈ। ਬਿੱਲੀਆਂ ਦੀਆਂ ਪੂਛਾਂ ਬਰਫ਼ ਵਿਚ ਜੰਮ ਚੁੱਕੀਆਂ ਸਨ।
ਕੈਨਡਾਲ ਡਿਵਿਸ਼ਚ ਨੇ ਅਪਣੀ ਗੱਡੀ ਵਿਚੋਂ ਕੋਫ਼ੀ ਵਾਲੀ ਕੇਤਲੀ ਕੱਢ ਕੇ ਉਸ ਵਿਚਲੀ ਗਰਮ ਕੋਫ਼ੀ ਨੂੰ ਹੋਲੀ ਹੋਲੀ ਬਰਫ਼ 'ਤੇ ਡੋਲਣਾ ਸ਼ੁਰੂ ਕਰ ਦਿਤਾ। ਇਸ ਤਰ੍ਹਾਂ ਬਿੱਲੀਆਂ ਕੋਲ ਜੰਮੀ ਬਰਫ਼ ਪਿਘਲਣ ਕਾਰਨ ਉਨ੍ਹਾਂ ਦੀਆਂ ਪੂਛਾਂ ਬਰਫ਼ ਵਿਚੋਂ ਨਿਕਲ ਗਈਆਂ।
ਕੈਨਡਾਲ ਡਿਵਿਸ਼ਚ ਬਿੱਲੀਆਂ ਨੂੰ ਬਰਫ਼ ਵਿਚੋਂ ਕੱਢਣ ਬਾਅਦ ਅਪਣੇ ਘਰ ਲੈ ਗਿਆ ਜਿੱਥੇ ਉਨ੍ਹਾਂ ਨੂੰ ਕੁੱਝ ਖਾਣ ਨੂੰ ਦਿਤਾ ਜਿਸ ਤੋਂ ਬਾਅਦ ਬਿੱਲੀਆਂ ਦੀ ਜਾਨ 'ਚ ਜਾਨ ਆਈ।
ਉਸ ਨੇ ਲੋਕਾਂ ਨੂੰ ਇਨ੍ਹਾਂ ਬਿੱਲੀਆਂ ਨੂੰ ਅਪਣੇ ਪਾਸ ਰੱਖ ਲੈਣ ਦੀ ਅਪੀਲ ਕੀਤੀ। ਇਸ ਤੋਂ ਬਾਅਦ ਇਕ ਵਿਅਕਤੀ ਨੇ ਇਨ੍ਹਾਂ ਤਿੰਨਾਂ ਬਿੱਲੀਆਂ ਨੂੰ ਅਪਣੇ ਘਰ 'ਚ ਰੱਖ ਲਿਆ ਤਾਂ ਜੋ ਉਹ ਹਮੇਸ਼ਾ ਇਕੱਠੀਆਂ ਰਹਿ ਸਕਣਾ।