PM Modi addresses Indian community in Japan

ਕੋਬੇ: ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਕਿਹਾ ਕਿ ਕਾਰ ਤੋਂ ਬੁਲੇਟ ਟ੍ਰੇਨ ਤਕ ਭਾਰਤ-ਜਾਪਾਨ ਸਬੰਧਾਂ ਨੇ ਲੰਮੀ ਦੂਰੀ ਤੈਅ ਕੀਤੀ ਹੈ। ਉਨ੍ਹਾਂ ਕਿਹਾ ਕਿਹਾ ਕਿ ਦੋਹਾਂ ਦੇਸ਼ਾਂ ਨੇ ਕਾਰ ਬਣਾਉਣ ਲਈ ਆਪਸ ਵਿਚ ਸਹਿਯੋਗ ਸ਼ੁਰੂ ਕੀਤਾ ਅਤੇ ਹੁਣ ਦੋਵੇਂ ਮਿਲ ਕੇ ਬੁਲੇਟ ਟ੍ਰੇਨ ਬਣਾ ਰਹੇ ਹਨ। ਉਹ ਕੋਬੇ ਸ਼ਹਿਰ ਵਿਚ ਭਾਰਤੀਆਂ ਨੂੰ ਸੰਬੋਧਨ ਕਰ ਰਹੇ ਸਨ। ਉਨ੍ਹਾਂ ਕਿਹਾ ਕਿ ਜਾਪਾਨ ਨੇ ਭਾਰਤ ਦੇ ਆਰਥਕ ਵਿਕਾਸ ਵਿਚ ਅਹਿਮ ਭੂਮਿਕਾ ਨਿਭਾਈ ਹੈ। ਭਾਰਤ ਅਗਲੇ ਪੰਜ ਸਾਲਾਂ ਵਿਚ ਪੰਜ ਲੱਖ ਕਰੋੜ ਡਾਲਰ ਦੀ ਅਰਥਵਿਵਸਥਾ ਬਣਨ ਦਾ ਟੀਚਾ ਲੈ ਕੇ ਚੱਲ ਰਿਹਾ ਹੈ।

ਉਨ੍ਹਾਂ ਕਿਹਾ ਕਿ ਦੋਹਾਂ ਦੇਸ਼ਾਂ ਦੇ ਸਬੰਧ ਪਹਿਲਾਂ ਤੋਂ ਬਿਹਤਰ ਹੋਣ ਵਾਲੇ ਹਨ। ਉਨ੍ਹਾਂ ਕਿਹਾ, 'ਅਜਿਹਾ ਸਮਾਂ ਵੀ ਸੀ ਜਦ ਅਸੀਂ ਕਾਰ ਬਣਾਉਣ ਲਈ ਇਕੱਠੇ ਹੋਏ ਸਨ ਅਤੇ ਹੁਣ ਅਸੀਂ ਬੁਲੇਟ ਟਰੇਨ ਬਣਾਉਣ ਲਈ ਇਕੱਠੇ ਹੋਏ ਹਾਂ। ਅੱਜ ਭਾਰਤ ਵਿਚ ਅਜਿਹਾ ਕੋਈ ਹਿੱਸਾ ਨਹੀਂ ਜਿਥੇ ਜਾਪਾਨ ਦੇ ਪ੍ਰਾਜੈਕਟ ਜਾਂ ਨਿਵੇਸ਼ ਨੇ ਅਪਣੀ ਛਾਪ ਨਾ ਛੱਡੀ ਹੋਵੇ। ਇਸ ਤਰ੍ਹਾਂ ਭਾਰਤ ਦੀ ਪ੍ਰਤਿਭਾ ਨੇ ਜਾਪਾਨ ਨੂੰ ਮਜ਼ਬੂਤ ਕਰਨ ਵਿਚ ਵੀ ਯੋਗਦਾਨ ਦਿਤਾ ਹੈ। ਉਨ੍ਹਾਂ ਕਿਹਾ ਕਿ ਭਾਰਤ ਦੁਨੀਆਂ ਵਿਚ ਮੌਕਿਆਂ ਦਾ ਗੇਟਵੇਅ ਬਣਿਆ ਹੈ ਅਤੇ ਸੱਭ ਦੇ ਵਿਸ਼ਵਾਸ ਨੇ ਭਾਰਤ ਨੂੰ ਤਾਕਤ ਦਿਤੀ ਹੈ।

ਉਨ੍ਹਾਂ ਕਿਹਾ ਕਿ ਦੁਨੀਆਂ ਦੇ ਸੱਭ ਤੋਂ ਵੱਡੇ ਲੋਕਤੰਤਰ ਨੇ ਉਨ੍ਹਾਂ ਉਤੇ ਪਹਿਲਾਂ ਨਾਲੋਂ ਵੀ ਜ਼ਿਆਦਾ ਭਰੋਸਾ ਪ੍ਰਗਟ ਕੀਤਾ ਹੈ। ਉਨ੍ਹਾਂ ਖ਼ੁਦ ਨੂੰ ਦੁਬਾਰਾ ਪ੍ਰਧਾਨ ਮੰਤਰੀ ਚੁਣੇ ਜਾਣ ਨੂੰ ਸਚਾਈ ਦੀ ਜਿੱਤ ਕਰਾਰ ਦਿਤਾ। ਮੋਦੀ ਨੇ ਕਿਹਾ ਕਿ ਦੁਨੀਆਂ ਅੱਜ ਭਾਰਤ ਨੂੰ ਸੰਭਾਵਨਾਵਾਂ ਦੇ ਗੇਟਵੇਅ ਵਜੋਂ ਵੇਖਦੀ ਹੈ। ਉਨ੍ਹਾਂ ਕਿਹਾ ਕਿ ਭਾਤਰ ਨੇ ਇਸ ਪ੍ਰਧਾਨ ਸੇਵਕ ਉਤੇ ਵਿਸ਼ਵਾਸ ਪ੍ਰਗਟ ਕੀਤਾ। ਮੋਦੀ ਦੇ ਇਸ ਭਾਸ਼ਨ ਮਗਰੋਂ ਜੈ ਸ੍ਰੀ ਰਾਮ ਦੇ ਨਾਹਰੇ ਵੀ ਲੱਗੇ। ਮੋਦੀ ਨੇ ਅਪਣੀ ਜਿੱਤ ਵਿਚ ਪ੍ਰਵਾਸੀ ਭਾਰਤੀਆਂ ਦੇ ਯੋਗਦਾਨ ਲਈ ਵੀ ਧਨਵਾਦ ਦਿਤਾ।

ਦੱਸ ਦਈਏ ਕਿ ਇਕ ਮਈ ਨੂੰ ਨਵੇਂ ਸਮਰਾਟ ਨਾਰੂਹਿਤੋ ਦੇ ਅਹੁਦਾ ਸੰਭਾਲਣ ਨਾਲ ਹੀ ਜਾਪਾਨ ਵਿਚ ਰੀਵਾ ਯੁੱਗ ਦੀ ਸ਼ੁਰੂਆਤ ਹੋ ਗਈ। ਜਾਪਾਨ ਵਿਚ ਸਮਰਾਟ ਦੇ ਬਦਲਣ ਨਾਲ ਹੀ ਯੁੱਗ ਬਦਲ ਜਾਂਦਾ ਹੈ। ਰੀਵਾ ਨਵੇਂ ਯੁੱਗ ਲਈ ਵਰਤਿਆ ਜਾਣ ਵਾਲਾ ਸ਼ਬਦ ਹੈ। ਰੀ ਦਾ ਅਰਥ ਹੈ ਚੰਗਾ ਅਤੇ ਵਾ ਦਾ ਅਰਥ ਹੈ ਭਾਈਚਾਰਾ। ਜਾਪਾਨੀ ਭਾਸ਼ਾ ਵਿਚ ਇਹ ਸ਼ਬਦ ਸ਼ਾਂਤੀ ਲਈ ਵਰਤਿਆ ਜਾਂਦਾ ਹੈ।