Kartarpur Corridor

ਅਟਾਰੀ: ਸੂਤਰਾਂ ਮੁਤਾਬਕ ਕਰਤਾਰਪੁਰ ਕਾਰੀਡੋਰ ਕਿਵੇਂ ਕੰਮ ਕਰੇਗਾ ਇਸ 'ਤੇ ਭਾਰਤ ਅਤੇ ਪਾਕਿਸਤਾਨ ਦੇ ਅਧਿਕਾਰੀਆਂ ਦੇ ਵਿੱਚਕਾਰ ਅਟਾਰੀ ਵਿੱਚ ਹੋਈ ਤੀਸਰੇ ਦੌਰ ਦੀ ਬੈਠਕ ਵਿੱਚ ਕੁਝ ਗੱਲਾਂ ‘ਤੇ ਸਹਿਮਤੀ ਬਣੀ ਹੈ। ਸ਼ਰਧਾਲੂਆਂ ਨੂੰ ਵੀਜ਼ੇ ਦੀ ਜ਼ਰੂਰਤ ਨਹੀਂ,  OCI ਕਾਰਡ ਵਾਲੇ ਵੀ ਜਾ ਸਕਦੇ ਹਨ। ਧਰਮ ਦੇ ਆਧਾਰ ‘ਤੇ ਕੋਈ ਭੇਦਭਾਵ ਨਹੀਂ ਹੋਵੇਗਾ। ਪ੍ਰਤੀ ਦਿਨ ਪੰਜ ਹਜ਼ਾਰ ਅਤੇ ਇਸ ਤੋਂ ਜ਼ਿਆਦਾ ਸ਼ਰਧਾਲੂਆਂ ਨੂੰ ਇਜ਼ਾਜਤ ਮਿਲੇਗੀ। ਕਾਰੀਡੋਰ ਪੂਰਾ ਸਾਲ, ਹਰ ਦਿਨ, ਖੁੱਲ੍ਹਾ ਰਹੇਗਾ।  ਸ਼ਰਧਾਲੂ ਜਥਿਆਂ ਵਿੱਚ ਜਾਂ ਇਕੱਲੇ ਵੀ ਜਾ ਸਕਦੇ ਹਨ।  

ਰਾਵੀ ਨਦੀ ‘ਤੇ ਪੁੱਲ ਬਣੇਗਾ ਅਤੇ ਜਦੋਂ ਤੱਕ ਅਜਿਹਾ ਨਹੀਂ ਹੁੰਦਾ ਅਸਥਾਈ ਸਰਵਿਸ ਰੋਡ ਹੋਵੇਗਾ। ਐਮਰਜੈਂਸੀ ਦੀ ਹਾਲਤ ਵਿੱਚ ਬਚਾਅ ਦੇ ਤਰੀਕੇ ਹੋਣਗੇ। BSF ਅਤੇ ਪਾਕਿਸਤਾਨ ਰੇਂਜਰਸ ਦੇ ਵਿੱਚਕਾਰ ਗੱਲਬਾਤ ਦੀ ਸਿੱਧੀ ਲਾਈਨ ਹੋਵੇਗੀ, ਹਾਲਾਂਕਿ ਸੂਤਰਾਂ ਦੇ ਮੁਤਾਬਕ ਇਨ੍ਹਾਂ ਸਮਝੌਤਿਆਂ ਉੱਤੇ ਦਸਤਖਤ ਨਹੀਂ ਹੋ ਸਕੇ, ਕਿਉਂਕਿ ਪਾਕਿਸਤਾਨ ਨੇ ਭਾਰਤ ਵਲੋਂ ਸ਼ਰਧਾਲੂਆਂ ਦੇ ਨਾਲ ਭਾਰਤੀ ਪ੍ਰੋਟੋਕਾਲ ਅਧਿਕਾਰੀਆਂ ਨੂੰ ਕਰਤਾਰਪੁਰ ਵਿੱਚ ਹੋਣ ਨੂੰ ਇਜ਼ਾਜਤ ਨਹੀਂ ਦਿੱਤੀ ਅਤੇ ਸ਼ਰਧਾਲੂਆਂ ਤੋਂ ਫੀਸ ਲੈਣ ਦੀ ਵੀ ਗੱਲ ‘ਤੇ ਅੜਿਆ ਹੋਇਆ ਹੈ।

ਭਾਰਤ ਦੇ ਮੁਤਾਬਕ ਕਾਰੀਡੋਰ ‘ਤੇ ਇਸ ਪਾਸੇ ਦਾ ਕੰਮ ਸਤੰਬਰ 2019 ਤੱਕ ਪੂਰਾ ਹੋ ਜਾਵੇਗਾ ਤਾਂਕਿ ਯਾਤਰਾ ਗੁਰੂ ਨਾਨਕ ਦੇਵ ਦੀਆਂ 550ਵੇਂ ਪ੍ਰਕਾਸ਼ ਪੁਰਬ ਉੱਤੇ ਸ਼ੁਰੂ ਹੋ ਸਕੇ। ਦੱਸ ਦਈਏ ਕਿ ਭਾਰਤ ਨੇ ਜੰਮੂ-ਕਸ਼ਮੀਰ ਨੂੰ ਵਿਸ਼ੇਸ਼ ਰਾਜ ਦਾ ਦਰਜਾ ਦੇਣ ਵਾਲੇ ਸੰਵਿਧਾਨ ਦੇ ਧਾਰਾ 370  ਦੇ ਜਿਆਦਾਤਰ ਪ੍ਰਾਵਧਾਨ 5 ਅਗਸਤ ਨੂੰ ਖਤਮ ਕਰ ਦਿੱਤੇ ਸਨ ਅਤੇ ਰਾਜ ਨੂੰ 2 ਕੇਂਦਰ ਸ਼ਾਸਿਤ ਪ੍ਰਦੇਸ਼ਾਂ ਵਿੱਚ ਵੰਡ ਦਿੱਤਾ ਸੀ। ਇਸ ਤੋਂ ਬਾਅਦ ਦੋਨਾਂ ਦੇਸ਼ਾਂ ਦੇ ਵਿੱਚ ਇਹ ਦੂਜੀ ਬੈਠਕ ਹੈ।

ਪਾਕਿਸਤਾਨ ਅਤੇ ਭਾਰਤ ਗੁਰੂ ਨਾਨਕ ਦੇਵ ਜੀ ਦੇ 550ਵੇ ਪੁਰਬ ਦੇ ਮੌਕੇ ‘ਤੇ 12 ਨਵੰਬਰ ਨੂੰ ਲਾਹੌਰ ਤੋਂ ਕਰੀਬ 125 ਕਿਲੋਮੀਟਰ ਦੂਰ ਨਾਰੋਵਾਲ ਵਿੱਚ ਲਾਂਘੇ ਦੇ ਉਦਘਾਟਨ ਦੇ ਸੰਬੰਧ ਵਿੱਚ ਤੌਰ-ਤਰੀਕਿਆਂ ਉੱਤੇ ਵਿਚਾਰ ਕਰ ਰਹੇ ਹਨ। ਕਰਤਾਰਪੁਰ ਲਾਂਘੇ ਨੂੰ ਲੈ ਕੇ ਪਿਛਲੇ ਕੁਝ ਮਹੀਨਿਆਂ ‘ਚ ਕਈ ਦੌਰ ਦੀਆਂ ਬੈਠਕਾਂ ਹੋਈਆਂ ਹਨ ਜਿਨ੍ਹਾਂ ਵਿੱਚ ਦੋਨਾਂ ਪੱਖਾਂ  ਦੇ ਵਿਸ਼ੇਸ਼ ਮੈਂਬਰਾਂ ਨੇ ਵੱਖਰੇ ਤਕਨੀਕੀ ਪਹਿਲੂਆਂ ਉੱਤੇ ਵੀ ਗੱਲ ਕੀਤੀ ਹੈ। ਦੋਨਾਂ ਦੇਸ਼ਾਂ ਦੇ ਨੁਮਾਇੰਦਿਆਂ ਨੇ ਜੁਲਾਈ ਵਿੱਚ ਅਟਾਰੀ-ਵਾਘਾ ਸਰਹੱਦ ‘ਤੇ ਪਾਕਿਸਤਾਨ ਵੱਲ ਇੱਕ ਬੈਠਕ ਕੀਤੀ ਸੀ।

 ਜਿਸ ਵਿੱਚ ਕਰਤਾਰਪੁਰ ਲਾਂਘੇ ਦੇ ਤੌਰ - ਤਰੀਕਿਆਂ ‘ਤੇ ਗੱਲਬਾਤ ਕੀਤੀ ਗਈ ਸੀ। ਇਹ ਲਾਂਘਾ 1947 ਤੋਂ ਬਾਅਦ ਤੋਂ ਦੋਨਾਂ ਗੁਆਂਢੀ ਦੇਸ਼ਾਂ ਦੇ ਵਿੱਚ ਪਹਿਲਾ ਬਿਨ੍ਹਾ ਵੀਜਾ ਅਜ਼ਾਦ ਲਾਂਘਾ ਵੀ ਹੋਵੇਗਾ। ਪਾਕਿਸਤਾਨ ਭਾਰਤੀ ਸਰਹੱਦ ਤੋਂ ਲੈ ਕੇ ਗੁਰਦੁਆਰਾ ਦਰਬਾਰ ਸਾਹਿਬ ਤੱਕ ਲਾਂਘੇ ਦੀ ਉਸਾਰੀ ਕਰ ਰਿਹਾ ਹੈ ਜਦਕਿ ਡੇਰਾ ਬਾਬਾ ਨਾਨਕ ਤੋਂ ਲੈ ਕੇ ਸਰਹੱਦ ਤੱਕ ਦੂਜੇ ਹਿੱਸੇ ਦੀ ਉਸਾਰੀ ਭਾਰਤ ਕਰੇਗਾ।