ਸਲੋਹ (ਲੰਡਨ) : ਬਰਤਾਨੀਆ ਦੇ ਸ਼ਾਹੀ ਪਰਵਾਰ ਦੇ ਅਤਿ ਨਜ਼ਦੀਕੀ ਉਘੀ ਸਿੱਖ ਸ਼ਖ਼ਸੀਅਤ ਹਰਬਿੰਦਰ ਸਿੰਘ ਰਾਣਾ ਦਲੀਪ ਸਿੰਘ ਟਰੱਸਟ ਅਤੇ ਐਗਲੋ ਸਿੱਖ ਹੈਰੀਟੇਜ ਟਰਾਇਲ ਦੇ ਡਾਇਰੈਕਟਰ ਸ. ਹਰਬਿੰਦਰ ਸਿੰਘ ਰਾਣਾ ਦਾ ਬੀਤੇ ਦਿਨ ਦਿਲ ਦੀ ਧੜਕਣ ਬੰਦ ਹੋਣ ਕਾਰਨ ਮੌਤ ਹੋ ਗਈ। ਸਲੋਹ ਤੋਂ ਸ. ਰਾਣਾ ਦੇ ਸਹੁਰੇ ਪਰਵਾਰ ਵਲੋਂ ਸ. ਗੁਰਮੀਤ ਸਿੰਘ ਭੁੱਲਰ ਨੇ ਦਸਿਆ ਕਿ ਸ. ਰਾਣਾ ਅਪਣੀ ਬੇਟੀ ਦੇ ਘਰ ਲੰਡਨ ਵਿਚ ਸਨ, ਜਿਥੇ ਉਹ  ਰੋਜ਼ਾਨਾ ਦੀ ਤਰ੍ਹਾਂ ਸਰੀਰਕ ਕਸਰਤ ਕਰ ਰਹੇ ਸਨ ਤੇ ਦਿਲ ਦਾ ਦੌਰਾ ਪੈਣ ਨਾਲ ਮੌਤ ਹੋ ਗਈ ਲੱਗਦੀ ਹੈ।

ਸ. ਭੁੱਲਰ ਨੇ ਦਸਿਆ ਕਿ ਕੁੱਝ ਦਿਨਾਂ ਬਾਅਦ ਪੋਸਟ ਮਾਰਟਮ ਹੋਣ ਤੋਂ ਬਾਅਦ ਮੌਤ ਦੇ ਕਾਰਨਾਂ ਦਾ ਅਸਲ ਪਤਾ ਲੱਗ ਸਕੇਗਾ। ਉਨ੍ਹਾਂ ਸ. ਰਾਣਾ ਦੇ ਅਚਾਨਕ ਚਲੇ ਜਾਣ ਨਾਲ ਪਰਵਾਰ ਤੇ ਬਰਤਾਨੀਆ ਸਿੱਖਾਂ ਨੂੰ ਨਾ ਪੂਰਾ ਹੋਣ ਵਾਲਾ ਘਾਟਾ ਪਿਆ ਹੈ। ਸ. ਰਾਣਾ ਬੀਤੇ ਕਈ ਦਹਾਕਿਆਂ ਤੋਂ ਬਰਤਾਨੀਆ ਵਿਚ ਸਿੱਖ ਵਿਰਾਸਤ ਨੂੰ ਸੰਭਾਲਣ, ਅਤੇ ਪੰਜਾਬ ਦੇ ਇਤਿਹਾਸਕ ਤਾਲਮੇਲ ਨੂੰ ਜਿਊਂਦਾ ਰੱਖਣ ਲਈ ਯਤਨਸ਼ੀਲ ਸਨ।

ਉਨ੍ਹਾਂ ਦੀ ਅਗਵਾਈ ਵਿਚ ਮਹਾਰਾਜਾ ਦਲੀਪ ਸਿੰਘ ਦਾ ਆਦਮ ਕੱਦ ਬੁੱਤ ਥੈਟਫ਼ੋਰਡ ਨੌਰਇੱਚ ਵਿਖੇ ਲਗਾਇਆ ਗਿਆ ਸੀ ਅਤੇ ਹਰ ਸਾਲ ਮਹਾਰਾਜਾ ਦਲੀਪ ਸਿੰਘ ਦੀ ਯਾਦ ਵਿਚ ਥੈਟਫ਼ੋਰਡ ਵਿਖੇ ਵਿਸ਼ੇਸ਼ ਸਮਾਗਮ ਕਰਵਾਏ ਜਾਂਦੇ ਸਨ। ਸ.ਰਾਣਾ ਬਰਤਾਨੀਆ ਦੇ ਸ਼ਾਹੀ ਪਰਵਾਰ ਦੇ ਨਜ਼ਦੀਕੀਆਂ ਵਿਚੋਂ ਇਕ ਸਨ ਤੇ 2006 ਵਿਚ ਪ੍ਰਿੰਸ ਚਾਰਲਸ ਦੀ ਪੰਜਾਬ ਫੇਰੀ ਮੌਕੇ ਉਨ੍ਹਾਂ ਦੇ ਗਾਈਡ ਸਨ ਤੇ 2012 ਵਿਚ ਬਰਤਾਨੀਆ ਦੀ ਰਾਣੀ ਦੇ ਗੋਲਡਨ ਜੁਬਲੀ ਸਮਾਗਮ ਵਿਚ ਸ. ਰਾਣਾ ਉਨ੍ਹਾਂ ਦੀ ਸ਼ਾਹੀ ਕਿਸ਼ਤੀ ਵਿਚ ਸ਼ਾਮਲ ਹੋਣ ਵਾਲੇ ਬਰਤਾਨੀਆ ਦੇ ਇਕੱਲੇ ਸਿੱਖ ਸਨ।

ਸ.ਰਾਣਾ ਦੀ ਅਗਵਾਈ ਵਿਚ ਐਂਗਲੋ ਸਿੱਖ ਹੈਰੀਟੇਜ ਟਰਾਇਲ ਵਲੋਂ ਬਰਤਾਨੀਆ ਵਿਚ ਸਿੱਖ ਵਿਰਾਸਤ ਦੀ ਖੋਜ ਅਤੇ ਸੰਭਾਲ ਕਰਨ ਤੋਂ ਇਲਾਵਾ ਕਈ ਭੁੱਲੇ ਵਿਸਰੇ ਇਤਿਹਾਸ ਨੂੰ ਲੋਕਾਂ ਸਾਹਮਣੇ ਲਿਆਂਦਾ। ਸ. ਰਾਣਾ ਦੀ ਅਚਾਨਕ ਮੌਤ 'ਤੇ ਬ੍ਰਿਟਿਸ਼ ਸਿੱਖ ਕੌਂਸਲ ਯੂਕੇ ਦੇ ਜਨਰਲ ਸਕੱਤਰ ਸ. ਤਰਸੇਮ ਸਿੰਘ ਦਿਉਲ, ਸ. ਜੋਗਾ ਸਿੰਘ ਬਰਮਿੰਘਮ, ਸ.ਅਮਰਜੀਤ ਸਿੰਘ ਭੱਚੂ, ਗੁਰਦਵਾਰਾ ਸ੍ਰੀ ਗੁਰੂ ਸਿੰਘ ਸਭਾ ਸਲੋਹ ਦੇ ਮੁਖੀ ਸ. ਜੋਗਿੰਦਰ ਸਿੰਘ ਬੱਲ, ਬੀਬੀ ਕਮਲਜੀਤ ਕੌਰ ਆਦਿ ਨੇ ਡੂੰਘੇ ਦੁੱਖ ਦਾ ਪ੍ਰਗਟਾਵਾ ਕੀਤਾ ਗਿਆ।