ਚੇਨਈ ਵਿਚ 11 ਸਾਲਾ ਬੱਚੀ ਨਾਲ ਜਿਸਮਾਨੀ ਸ਼ੋਸ਼ਣ ਦੇ ਸਬੰਧ ਵਿਚ ਗ੍ਰਿਫ਼ਤਾਰ ਕੀਤੇ ਗਏ ਕੁੱਝ ਮੁਲਜ਼ਮਾਂ ਦੀ ਅਦਾਲਤ ਦੇ ਵਿਹੜੇ ਵਿਚ ਵਕੀਲਾਂ ਨੇ ਕੁੱਟਮਾਰ ਕਰ ਦਿਤੀ..........
ਚੇਨਈ : ਚੇਨਈ ਵਿਚ 11 ਸਾਲਾ ਬੱਚੀ ਨਾਲ ਜਿਸਮਾਨੀ ਸ਼ੋਸ਼ਣ ਦੇ ਸਬੰਧ ਵਿਚ ਗ੍ਰਿਫ਼ਤਾਰ ਕੀਤੇ ਗਏ ਕੁੱਝ ਮੁਲਜ਼ਮਾਂ ਦੀ ਅਦਾਲਤ ਦੇ ਵਿਹੜੇ ਵਿਚ ਵਕੀਲਾਂ ਨੇ ਕੁੱਟਮਾਰ ਕਰ ਦਿਤੀ। ਮਦਰਾਸ ਹਾਈ ਕੋਰਟ ਵਕੀਲ ਸੰਘ ਦੇ ਪ੍ਰਧਾਨ ਜੀ ਮੋਹਨਕ੍ਰਿਸ਼ਨ ਨੇ ਦਸਿਆ ਕਿ ਸੰਘ ਨੇ ਕਥਿਤ ਅਪਰਾਧ ਦੀ ਪ੍ਰਕ੍ਰਿਤੀ ਬਾਰੇ ਵਿਚਾਰ ਕਰਦਿਆਂ ਮਾਮਲੇ ਵਿਚ ਮੁਲਜ਼ਮਾਂ ਵਲੋਂ ਪੈਰਵੀ ਨਾ ਕਰਨ ਦਾ ਫ਼ੈਸਲਾ ਕੀਤਾ ਹੈ। ਕਿਸੇ ਅਪਾਰਟਮੈਂਟ ਵਿਚ ਕੁੜੀ ਨਾਲ ਵਾਰ ਵਾਰ ਕਈ ਵਿਅਕਤੀਆਂ ਦੁਆਰਾ ਜਿਸਮਾਨੀ ਸ਼ੋਸ਼ਣ ਕਰਨ ਦੀ ਘਟਨਾ ਕਾਰਨ ਲੋਕ ਕਾਫ਼ੀ ਗੁੱਸੇ ਵਿਚ ਹਨ।
ਮੁਲਜ਼ਮ ਜਦ ਮਹਿਲਾ ਅਦਾਲ ਦੀਆਂ ਪੌੜੀਆਂ ਤੋਂ ਥੱਲੇ ਆ ਰਹੇ ਸਨ ਤਾਂ ਵਕੀਲਾਂ ਦਾ ਗੁੱਸਾ ਉਨ੍ਹਾਂ 'ਤੇ ਫੁੱਟ ਗਿਆ। ਮੁਲਜ਼ਮਾਂ ਨੂੰ ਨਿਆਇਕ ਹਿਰਾਸਤ ਵਿਚ ਭੇਜ ਦਿਤਾ ਗਿਆ ਹੈ। ਮਹਿਲਾ ਸਿਪਾਹੀ ਮੁਲਜ਼ਮਾਂ ਨੂੰ ਹਮਲੇ ਤੋਂ ਬਚਾਅ ਰਹੀਆਂ ਸਨ। ਇਸ ਘਟਨਾ ਦੀ ਵੀਡੀਉ ਸੋਸ਼ਲ ਮੀਡੀਆ ਵਿਚ ਫੈਲ ਗਈ ਹੈ। ਮੁਲਜ਼ਮਾਂ ਨੂੰ ਲੁਕਾ-ਛਿਪਾ ਕੇ ਅਦਾਲਤ ਅੰਦਰ ਲਿਜਾਇਆ ਗਿਆ ਸੀ ਪਰ ਫਿਰ ਵੀ ਉਨ੍ਹਾਂ ਉਤ ਹਮਲਾ ਹੋ ਗਿਆ। ਇਸ ਤੋਂ ਪਹਿਲਾਂ 17 ਮੁਲਜ਼ਮਾਂ ਨੂੰ ਮਹਿਲਾ ਅਦਾਲਤ ਵਿਚ ਪੇਸ਼ ਕੀਤਾ ਗਿਆ ਜਿਥੇ ਉਨ੍ਹਾਂ ਨੂੰ 31 ਜੁਲਾਈ ਤਕ ਨਿਆਇਕ ਹਿਰਾਸਤ ਵਿਚ ਭੇਜ ਦਿਤਾ ਗਿਆ। (ਏਜੰਸੀ)
