ਲੁਣਾਵਾੜਾ ਦੇ ਦੇਵੀ ਖੋਡਿਆਰ ਮੰਦਰ 'ਚ ਸਾਹਮਣੇ ਆਈ ਘਟਨਾ
ਗੁਜਰਾਤ- ਗੁਜਰਾਤ ਦੇ ਮਹਿਸਾਗਰ ਜ਼ਿਲ੍ਹੇ ਦੇ ਲੁਣਾਵਾੜਾ ਇਲਾਕੇ ਤੋਂ ਆਸਥਾ ਦਾ ਅਜਿਹਾ ਮਾਮਲਾ ਸਾਹਮਣੇ ਆਇਆ ਹੈ ਜਿੱਥੇ ਦੇਵੀ ਖੋਡਿਆਰ ਦੇ ਮੰਦਰ ਵਿਚ ਮਗਰਮੱਛ ਘੁੰਮਦਾ ਦਿਖਾਈ ਦਿੱਤਾ ਤਾਂ ਲੋਕਾਂ ਨੇ ਉਸ ਦੀ ਪੂਜਾ ਕਰਨੀ ਸ਼ੁਰੂ ਕਰ ਦਿੱਤੀ ਦਰਅਸਲ ਸ਼ਨੀਵਾਰ ਰਾਤ ਮੰਦਰ ਵਿਚ ਹੋਈ ਚੋਰੀ ਤੋਂ ਬਾਅਦ ਐਤਵਾਰ ਸਵੇਰੇ ਜਦੋਂ ਲੋਕ ਦਰਸ਼ਨ ਕਰਨ ਪੁੱਜੇ ਤਾਂ ਮੰਦਰ ਦਾ ਦਰਵਾਜ਼ਾ ਖੁੱਲ੍ਹਾ ਸੀ ਅਤੇ ਅੰਦਰ ਮਗਰਮੱਛ ਘੁੰਮ ਰਿਹਾ ਸੀ।
ਸਥਾਨਕ ਲੋਕਾਂ ਦਾ ਮੰਨਣਾ ਹੈ ਕਿ ਦੇਵੀ ਖੋਡਿਆਰ ਦਾ ਵਾਹਨ ਮਗਰਮੱਛ ਹੈ ਅਜਿਹੇ ਵਿਚ ਮੰਦਰ ਦੇ ਗਰਭਗ੍ਰਹਿ ਤੱਕ ਮਗਰਮੱਛ ਦਾ ਆਉਣਾ ਕਿਸੇ ਦੈਵੀ ਸ਼ਕਤੀ ਦਾ ਨਤੀਜਾ ਹੈ। ਦੇਖਦੇ ਹੀ ਦੇਖਦੇ ਵੱਡੀ ਗਿਣਤੀ ਵਿਚ ਲੋਕ ਫੁੱਲਾਂ ਅਤੇ ਪੈਸਿਆਂ ਨਾਲ ਮਗਰਮੱਛ ਦੀ ਪੂਜਾ ਕਰਨ ਲੱਗੇ। ਉਧਰ ਜਿਵੇਂ ਹੀ ਵਣ ਵਿਭਾਗ ਦੇ ਅਧਿਕਾਰੀਆਂ ਨੂੰ ਮੰਦਰ ਵਿਚ ਮਗਰਮੱਛ ਵੜ ਜਾਣ ਦਾ ਪਤਾ ਲੱਗਿਆ ਤਾਂ ਉਹ ਮਗਰਮੱਛ ਦੇ ਰੈਸਕਿਊ ਲਈ ਪਹੁੰਚ ਗਏ। ਵਣ ਵਿਭਾਗ ਮੁਲਾਜ਼ਮਾਂ ਦਾ ਕਹਿਣਾ ਹੈ ਕਿ ਮੰਦਰ ਦੇ ਨੇੜੇ ਹੀ ਤਲਾਬ ਹੈ ਜਿੱਥੋਂ ਇਹ ਮਗਰਮੱਛ ਆਇਆ ਹੈ
ਪਰ ਜਿਵੇਂ ਹੀ ਵਣ ਵਿਭਾਗ ਮੁਲਾਜ਼ਮ ਮਗਰਮੱਛ ਨੂੰ ਫੜਨ ਲੱਗੇ ਤਾਂ ਲੋਕਾਂ ਦੀ ਭੀੜ ਉਨ੍ਹਾਂ ਨੂੰ ਇਹ ਕਹਿ ਕੇ ਰੋਕਣ ਲੱਗ ਗਈ ਕਿ ਇਹ ਉਨ੍ਹਾਂ ਦੀ ਆਸਥਾ ਦਾ ਵਿਸ਼ਾ ਹੈ। ਕਾਫ਼ੀ ਮਸ਼ੱਕਤ ਮਗਰੋਂ ਅਧਿਕਾਰੀਆਂ ਨੇ ਲੋਕਾਂ ਨੂੰ ਸਮਝਾਇਆ ਅਤੇ 6 ਫੁੱਟ ਲੰਬੇ ਮਗਰਮੱਛ ਨੂੰ ਮੰਦਰ ਵਿਚੋਂ ਫੜ ਕੇ ਨੇੜਲੇ ਤਲਾਬ ਵਿਚ ਛੱਡ ਦਿੱਤਾ। ਦੱਸ ਦਈਏ ਕਿ ਦੇਸ਼ ਦੇ ਲੋਕਾਂ ਵਿਚ ਇਸ ਤਰ੍ਹਾਂ ਦੀ ਅੰਨ੍ਹੀ ਆਸਥਾ ਦੇ ਮਾਮਲੇ ਪਹਿਲਾਂ ਵੀ ਕਈ ਵਾਰ ਸਾਹਮਣੇ ਆ ਚੁੱਕੇ ਹਨ। ਲੋਕਾਂ ਵਿਚ ਜਾਗਰੂਕਤਾ ਦੀ ਘਾਟ ਕਾਰਨ ਇਹ ਸਿਲਸਿਲਾ ਹਾਲੇ ਵੀ ਇਵੇਂ ਜਿਵੇਂ ਜਾਰੀ ਹੈ।