ਨੇੜਲੇ ਪਿੰਡ ਗੁੰਮਜਾਲ ਦੇ ਕੋਲ ਬੀਤੀ ਰਾਤ ਵਾਪਰੇ ਇਕ ਭਿਆਨਕ ਸੜਕੇ ਹਾਦਸੇ ਚ ਜਿਥੇ ਤਿੰਨ ਲੋਕਾਂ ਦੀ ਮੌਤ ਹੋ ਗਈ............
ਅਬੋਹਰ : ਨੇੜਲੇ ਪਿੰਡ ਗੁੰਮਜਾਲ ਦੇ ਕੋਲ ਬੀਤੀ ਰਾਤ ਵਾਪਰੇ ਇਕ ਭਿਆਨਕ ਸੜਕੇ ਹਾਦਸੇ ਚ ਜਿਥੇ ਤਿੰਨ ਲੋਕਾਂ ਦੀ ਮੌਤ ਹੋ ਗਈ, ਉਥੇ ਹੀ ਅੱਧਾ ਦਰਜਨ ਤੋਂ ਵੱਧ ਲੋਕ ਜ਼ਖ਼ਮੀ ਹੋ ਗਏ। ਜਾਣਕਾਰੀ ਅਨੁਸਾਰ ਬੀਤੀ ਰਾਤ ਕਰੀਬ 10 ਵਜੇ ਪਿੰਡ ਜੰਡਵਾਲਾ ਹਨੁਵੰਤਾ ਵਾਸੀ ਭੀਮਸੈਨ (40) ਅਪਣੇ ਆਟੋ ਰਿਕਸ਼ਾ ਵਿਚ ਗੰਗਾਨਗਰ ਦੇ 13 ਕਿਊ ਤੋਂ ਪਿੰਡ ਤੂਤਵਾਲਾ ਦੇ ਦਰਜਨ ਭਰ ਮਜ਼ਦੂਰਾਂ ਨੂੰ ਲੈ ਕੇ ਵਾਪਸ ਆ ਰਿਹਾ ਸੀ ਕਿ ਜਦੋਂ ਉਨ੍ਹਾਂ ਦਾ ਟੈੰਪੂ ਪਿੰਡ ਗੁੰਮਜਾਲ ਦੇ ਬੱਸ ਅੱਡੇ ਨੇੜੇ ਪੁੱਜਾ ਤਾਂ ਉਸ ਦਾ ਟਾਇਰ ਖੁਲ੍ਹ ਗਿਆ, ਜਿਸ ਕਾਰਨ ਆਟੋ ਵਿਚ ਸਵਾਰ ਵਿਅਕਤੀ ਜ਼ਖ਼ਮੀ ਹੋ ਗਏ।
ਇਸ ਤੋਂ ਬਾਅਦ ਸਾਰੇ ਲੋਕ ਸੜਕ ਕੰਢੇ ਖੜੇ ਹੋ ਗਏ। ਇਸ ਦੌਰਾਨ ਬਠਿੰਡਾ ਵਲੋਂ ਗੰਗਾਨਗਰ ਜਾ ਰਹੇ ਇਕ ਕਾਰ ਚਾਲਕ ਲਵਜੀਤ ਪੁੱਤਰ ਜਗਦੀਸ਼ ਕੰਬੋਜ ਵਾਸੀ ਗੰਗਾਨਗਰ ਅਤੇ ਕਰਮਜੀਤ ਤੇ ਲਖਵਿੰਦਰ ਟੈਂਪੂ ਸਵਾਰ ਜਖ਼ਮੀਆਂ ਦੀ ਮਦਦ ਲਈ ਰੁਕੇ ਤਾਂ ਇਸ ਦੌਰਾਨ ਗੰਗਾਨਗਰ ਤੋਂ ਆ ਰਹੇ ਪਾਰਸਲ ਨਾਲ ਭਰੇ ਕੈਂਟਰ ਨੇ ਉਨ੍ਹਾਂ ਨੂੰ ਟੱਕਰ ਮਾਰ ਦਿਤੀ, ਜਿਸ ਕਾਰਨ ਆਟੋ ਚਾਲਕ ਭੀਮਸੈਨ, ਆਟੋ 'ਚ ਸਵਾਰ ਕਰਨੈਲ ਸਿੰਘ ਅਤੇ ਕਾਰ ਚਾਲਕ ਲਵਜੀਤ ਸਿੰਘ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ।
ਹਾਦਸੇ ਦੌਰਾਨ ਜ਼ਖ਼ਮੀ ਹੋਏ ਵਿਅਕਤੀਆਂ ਨੂੰ ਇਲਾਜ ਲਈ ਅਬੋਹਰ ਦੇ ਸਰਕਾਰੀ ਹਸਪਤਾਲ ਦਾਖ਼ਲ ਕਰਵਾਇਆ ਗਿਆ। ਘਟਨਾ ਤੋਂ ਬਾਅਦ ਕੈਂਟਰ ਚਾਲਕ ਕੈਂਟਰ ਛੱਡ ਕੇ ਫਰਾਰ ਹੋ ਗਿਆ। ਸੂਚਨਾ ਮਿਲਣ 'ਤੇ ਮੌਕੇ 'ਤੇ ਪਹੁੰਚੀ ਥਾਣਾ ਖੁਈਆਂ ਸਰਵਰ ਪੁਲਿਸ ਨੇ ਦੋਨਾਂ ਵਾਹਨਾਂ ਨੂੰ ਕਬਜ਼ੇ ਵਿਚ ਲੈ ਕੇ ਜਾਂਚ ਸ਼ੁਰੂ ਕਰ ਦਿਤੀ ਹੈ।
