ਪਿਤਾ ਦੀ ਲੰਮੀ ਉਮਰ ਲਈ ਅਪਣਾ ਗੁਰਦਾ ਦੇਵੇਗੀ ਗਗਨਦੀਪ ਕੌਰ
ਨੂਰਪੁਰਬੇਦੀ (ਸਵਰਨ ਸਿੰਘ ਭੰਗੂ, ਬਲਵਿੰਦਰ ਸਿੰਘ ਬੰਟੀ): ਨਜ਼ਦੀਕੀ ਪਿੰਡ ਕੋਲਾਪੁਰ ਦੀ ਗਗਨਦੀਪ ਕੌਰ ਨੇ ਅਪਣੇ ਪਿਤਾ ਦੀ ਉਮਰ ਵਧਾਉਣ ਲਈ, ਇਕ ਗੁਰਦਾ ਦੇਣ ਦਾ ਮਿਸਾਲੀ ਫ਼ੈਸਲਾ ਲਿਆ ਹੈ। ਉਸਦੇ ਪਿਤਾ ਬਲਜੀਤ ਸਿੰਘ (48) ਜੋ ਪੇਸ਼ੇ ਵਜੋਂ ਡਰਾਇਵਰ ਸਨ, ਉਹ ਪਿਛਲੇ 7, 8 ਸਾਲ ਤੋਂ ਗੁਰਦਿਆਂ ਦੀ ਬਿਮਾਰੀ ਤੋਂ ਪੀੜਤ ਹਨ। ਵਧਦੇ ਰੋਗ ਕਾਰਨ ਹੁਣ ਉਨ੍ਹਾਂ ਦੇ ਦੋਨੋ ਗੁਰਦੇ ਖ਼ਰਾਬ ਹੋ ਚੁੱਕੇ ਹਨ। ਉਹ ਡਾਇਲੇਸਿਜ਼ 'ਤੇ ਨਿਰਭਰ ਹਨ।
ਜਦੋਂ ਮਾਹਿਰ ਡਾਕਟਰਾਂ ਨੇ ਪਰਵਾਰ ਨੂੰ ਸਮਝਾਇਆ ਕਿ ਇਸ ਰੋਗ ਦਾ ਇਕੋ ਇਕ ਹੱਲ, ਗੁਰਦਾ ਟਰਾਂਸਪਲਾਂਟੇਸ਼ਨ ਹੈ ਤਾਂ ਮਨੁੱਖੀ ਸਿਹਤ ਦੇ ਭੇਦ ਨੂੰ ਚੰਗੀ ਤਰ੍ਹਾਂ ਸਮਝਦੀ, ਪੀੜਤ ਦੀ ਨਰਸਿੰਗ ਕਰ ਚੁੱਕੀ ਬੇਟੀ ਗਗਨਦੀਪ ਕੌਰ ਨੇ ਅਪਣਾ ਗਰਦਾ ਦੇਣ ਦੀ ਹਾਮੀਂ ਭਰੀ। ਬੀਤੇ 3 ਮਹੀਨੇ ਤੋਂ ਸਮੁੱਚੀ ਕਾਗਜ਼ੀ ਅਤੇ ਗੁਰਦੇ ਦੀ ਮੈਚਿੰਗ ਦੀ ਕਾਰਵਾਈ ਅਮਲ ਵਿਚ ਲਿਆਂਦੀ ਜਾ ਰਹੀ ਹੈ।
ਸਿੱਟੇ ਵਜੋਂ ਡਾਕਟਰ ਜਲਦੀ ਹੀ ਟਰਾਂਸਪਲਾਂਟ ਕਰਨ ਦੇ ਨੇੜੇ ਪਹੁੰਚ ਗਏ ਹਨ। ਇਹ ਟਰਾਂਸਪਲਾਂਟੇਸ਼ਨ ਅਗਲੇ ਹੀ ਹਫ਼ਤੇ ਮੋਹਾਲੀ ਦੇ ਆਈ ਵੀ ਵਾਈ ਹਸਪਤਾਲ ਵਿਚ ਹੋਣਾ ਹੈ। ਗਗਨਦੀਪ ਕੌਰ ਇਹ ਕਹਾਵਤ ਸੱਚ ਕਰ ਰਹੀ ਹੈ ਕਿ 'ਪੁੱਤ ਵੰਡਾਉਣ ਜ਼ਮੀਨਾਂ, ਧੀਆਂ ਦੁੱਖ ਵੰਡਾਉਂਦੀਆਂ ਨੇ'। ਗਗਨਦੀਪ ਕੌਰ ਦੀ ਵੱਡੀ ਭੈਣ ਸ਼ਾਦੀ-ਸ਼ੁਦਾ ਹੈ, ਛੋਟੀ ਭੈਣ ਅਤੇ ਛੋਟਾ ਭਰਾ ਪੜ੍ਹ ਰਹੇ ਹਨ।
ਸਮੁੱਚੀਆਂ ਪਰਵਾਰਕ ਸਥਿਤੀਆਂ ਨੂੰ ਸਮਝਦਿਆਂ, ਗਗਨਦੀਪ ਕੌਰ ਨੇ ਇਹ ਦੂਰ ਅੰਦੇਸ਼ ਫ਼ੈਸਲਾ ਲਿਆ ਹੈ। ਇਲਾਕਾ ਭਰ ਦੇ ਸਿਆਣੇ ਲੋਕ ਇਸ ਲੜਕੀ ਦੇ ਹੌਸਲੇ ਦੀ ਦਾਦ ਦੇ ਰਹੇ ਹਨ ਅਤੇ ਸਫ਼ਲ ਟਰਾਂਸਪਲਾਂਟੇਸ਼ਨ ਦੀ ਕਾਮਨਾ ਕਰਦੇ ਹਨ। ਇਲਾਕਾ ਨਿਵਾਸੀ ਇਸ ਪੱਖੋਂ ਵੀ ਫਿਕਰਮੰਦ ਜਾਪੇ ਕਿ ਨਿਹਾਇਤ ਗਰੀਬ ਪਰਵਾਰ ਲੱਖਾਂ ਰੁਪਏ ਦਾ ਖ਼ਰਚ ਕਿਵੇਂ ਕਰੇਗਾ। ਗਗਨਦੀਪ ਕੌਰ ਅਨੁਸਾਰ ਡਾਕਟਰਾਂ ਨੇ ਪਰਵਾਰ ਨੂੰ ਘੱਟੋ ਘੱਟ 7, 8 ਲੱਖ ਰੁਪਏ ਦਾ ਇੰਤਜ਼ਾਮ ਕਰਨ ਲਈ ਕਿਹਾ ਹੈ।
ਉਸ ਅਨੁਸਾਰ ਪਰਵਾਰ ਦਾ ਫਿਕਰ ਇਹ ਰਾਸ਼ੀ ਜੁਟਾਉਣਾ ਹੀ ਨਹੀਂ ਸਗੋਂ ਬਾਅਦ ਵਿਚ ਪ੍ਰਤੀ ਮਹੀਨਾ 25, 30 ਹਜ਼ਾਰ ਰੁਪਏ ਲਾਗਤ ਦੀ ਦਵਾਈ ਦਾ ਫਿਕਰ ਵੀ ਹੈ। ਪਰਵਾਰ ਵਿਚ ਕੋਈ ਹੋਰ ਕਮਾਉਣ ਵਾਲਾ ਵੀ ਨਹੀਂ ਹੈ। ਗਗਨ ਦੀ ਮਾਤਾ ਵੀ ਦਮੇਂ ਦੀ ਮਰੀਜ਼ ਹੈ। ਗਗਨਦੀਪ ਕੌਰ ਅਤੇ ਉਸਦੇ ਪਰਵਾਰ ਨੇ ਸਮਾਜ-ਸੇਵੀ ਸੰਸਥਾਵਾਂ ਅਤੇ ਸਮਾਜ ਦੇ ਸਮਰੱਥ ਦਿਆਲੂਆਂ ਨੂੰ ਅਪੀਲ ਕੀਤੀ ਹੈ ਕਿ ਪਰਵਾਰ ਦੇ ਇਸ ਦੁੱਖ ਵਿਚ ਉਹਨਾਂ ਦੀ ਵੱਧ ਤੋਂ ਵੱਧ ਆਰਥਕ ਸਹਾਇਤਾ ਕੀਤੀ ਜਾਵੇ
ਤਾਂ ਕਿ ਪਰਵਾਰ ਦੇ ਦੋਨੋ ਜੀਅ ਤੰਦਰੁਸਤ, ਜੀਵਨ ਜੀਅ ਸਕਣ। ਜ਼ਿਕਰਯੋਗ ਹੈ ਕਿ ਗਗਨਦੀਪ ਕੌਰ, ਜੀ ਐਨ ਐਮ ਕਰ ਕੇ ਪਟਿਆਲੇ ਦੇ ਇਕ ਨਿੱਜੀ ਹਸਪਤਾਲ ਵਿਚ ਨੌਕਰੀ ਕਰ ਰਹੀ ਹੈ। ਗਗਨਦੀਪ ਕੌਰ ਅਨੁਸਾਰ ਉਸਦੇ ਇਸ ਫ਼ੈਸਲੇ ਵਿਚ ਬਹੁਤ ਵੱਡਾ ਤਿਆਗ ਛੁਪਿਆ ਹੈ ਜਿਸਦਾ ਉਸਨੂੰ ਅਹਿਸਾਸ ਹੈ ਪਰ ਹਾਲ ਦੀ ਘੜੀ ਉਸਦਾ ਮੁੱਖ ਮਨੋਰਥ ਅਪਣੇ ਪਿਤਾ ਜੀ ਦੀ ਜਾਨ ਬਚਾਉਣਾ ਹੈ। '
ਸਪੋਕਸਮੈਨ' ਨਾਲ ਉਕਤ ਦੁਖੀ ਵਾਰਤਾ ਸਾਂਝੀ ਕਰਦਿਆਂ ਉਸਨੇ ਕਿਹਾ ਕਿ ਨੂਰਪੁਰਬੇਦੀ ਦੇ ਸਟੇਟ ਬੈਂਕ ਆਫ਼ ਇੰਡੀਆ ਵਿਚ ਉਨ੍ਹਾਂ ਦੇ ਪਿਤਾ ਬਲਜੀਤ ਸਿੰਘ ਦਾ ਖਾਤਾ ਨੰ: 65144795056 ਹੈ ਜਿਸਦਾ ਆਈ ਆਈ ਐਫ਼ ਐਸ ਕੋਡ S29N0050166 ਹੈ। ਉਨ੍ਹਾਂ 2 ਜੀਵਨ ਬਚਾਉਣ ਲਈ ਦਾਨੀਆਂ ਨੂੰ ਵਾਰ ਵਾਰ ਅਪੀਲ ਕੀਤੀ ਹੈ।