ਨਕਲੀ ਸ਼ਰਾਬ ਨਾਲ ਮਰਨ ਵਾਲਿਆਂ ਦੀ ਗਿਣਤੀ ਵਧ ਕੇ 107 ਤਕ ਪਹੁੰਚ ਗਈ ਹੈ ਅਤੇ ਇਹ ਅੰਕੜਾ ਵਧਦਾ ਹੀ ਜਾ ਰਿਹਾ ਹੈ। ਜਦ ਵਿਰੋਧੀ ਧਿਰ 'ਚੋਂ ਅਵਾਜ਼ ਉਠੀ ਕਿ ਕਦੇ ਸੋਚਿਆ ਹੀ ਨਹੀਂ ਸੀ ਕਿ ਪੰਜਾਬ ਵਿਚੋਂ ਇਸ ਤਰ੍ਹਾਂ ਦੀ ਖ਼ਬਰ ਵੀ ਆਵੇਗੀ ਤਾਂ ਸ਼ਰਮਿੰਦਗ਼ੀ ਦਾ ਅਹਾਸ ਸਮਝ ਵਿਚ ਆਇਆ। ਅੱਜ ਤੋਂ ਪਹਿਲਾਂ ਜ਼ਿਆਦਾਤਰ ਨਕਲੀ ਅਤੇ ਸਸਤੀ ਸ਼ਰਾਬ ਨਾਲ ਮਰਨ ਵਾਲਿਆਂ ਦੀਆਂ ਖ਼ਬਰਾਂ ਯੂ.ਪੀ. ਅਤੇ ਬਿਹਾਰ ਤੋਂ ਆਉਂਦੀਆਂ ਸਨ ਪਰ ਪੰਜਾਬ ਵਿਚ ਇਸ ਤਰ੍ਹਾਂ ਹੁੰਦਾ ਕਦੇ ਨਹੀਂ ਸੀ ਸੁਣਿਆ। ਕਦੇ ਸੋਚਿਆ ਵੀ ਨਹੀਂ ਸੀ ਕਿ ਪੰਜਾਬ ਵਿਚ ਗੁੰਡਾਗਰਦੀ, ਸਿਰ ਚੜ੍ਹ ਕੇ ਸਭਿਆਚਾਰ ਅਤੇ ਗੀਤਾਂ ਵਿਚ ਝਲਕੇਗੀ।
File Photo
ਕਦੇ ਸੋਚਿਆ ਨਹੀਂ ਸੀ ਕਿ ਵਿਆਹ-ਸ਼ਾਦੀਆਂ ਮੌਕੇ ਨੱਚਣ ਲਈ ਕੁੜੀਆਂ ਬੁਲਾਈਆਂ ਜਾਣਗੀਆਂ ਅਤੇ ਫਿਰ ਸ਼ਰਾਬੀ ਹਾਲਤ ਵਿਚ ਲੋਕ ਉਨ੍ਹਾਂ ਕੁੜੀਆਂ ਨੂੰ ਅਪਣੀਆਂ ਬੰਦੂਕਾਂ ਨਾਲ ਹਲਾਲ ਕਰਨਗੇ। ਕਦੇ ਸੋਚਿਆ ਨਹੀਂ ਸੀ ਕਿ ਕਦੇ ਪੰਜਾਬ ਦੇ ਉੱਚ ਘਰਾਣਿਆਂ ਦੇ ਨਾਮ ਚਿੱਟੇ ਦੇ ਵਪਾਰ ਨਾਲ ਦਾਗ਼ੀ ਹੋਣਗੇ। ਕਦੇ ਸੋਚਿਆ ਨਹੀਂ ਸੀ ਕਿ ਪੰਜਾਬ ਵਿਚ ਪਾਣੀ ਦੇ ਨਾਲ ਨਾਲ ਚਿੱਟਾ, ਸ਼ਰਾਬ ਅਤੇ ਨਸ਼ਿਆਂ ਦਾ ਦਰਿਆ ਵੀ ਵੱਗਣ ਲੱਗ ਜਾਏਗਾ। ਅੱਜ ਸੱਭ ਤੋਂ ਜ਼ਿਆਦਾ ਅਫ਼ਸੋਸ ਇਸ ਗੱਲ ਦਾ ਹੈ ਕਿ ਸਾਡੇ ਸਿਆਸੀ, ਧਾਰਮਕ ਅਤੇ ਅਮੀਰ ਘਰਾਣਿਆਂ ਦੇ ਨਾਂ ਨਾਲ ਰੇਤਾ, ਨਸ਼ਾ ਅਤੇ ਸ਼ਰਾਬ ਮਾਫ਼ੀਆ ਦੇ ਨਾਮ ਜੁੜ ਚੁੱਕੇ ਹਨ।
File Photo
ਸਿਆਸਤਦਾਨਾਂ ਅਤੇ ਪੁਲਿਸ ਦੀ ਸਾਂਝ ਦਾ ਐਸਾ ਜਾਲ ਵਿਛ ਗਿਆ ਹੈ ਕਿ ਇਸ ਨੂੰ ਰੋਕਣ ਲਈ ਪੱਕੇ ਇਰਾਦੇ ਅਤੇ ਠੋਸ ਕਦਮ ਚੁੱਕਣ ਦੀ ਲੋੜ ਹੈ। ਪੰਜਾਬ ਸਰਕਾਰ, ਦਿੱਲੀ ਸਰਕਾਰ ਤੋਂ ਨਸੀਹਤ ਨਹੀਂ ਲੈਣ ਵਾਲੀ ਅਤੇ ਲਵੇ ਵੀ ਕਿਉਂ, ਜਦ ਦਿੱਲੀ ਦੇ ਮੁਕਾਬਲੇ ਪੰਜਾਬ ਵਿਚ ਕੋਰੋਨਾ 'ਤੇ ਕੰਟਰੋਲ ਕਰ ਕੇ ਉਸ ਨੇ ਸਿੱਧ ਕਰ ਦਿਤਾ ਹੈ ਕਿ ਕਿਸ ਵਿਚ ਕਿੰਨੀ ਕਾਬਲੀਅਤ ਹੈ? ਪੰਜਾਬ ਨੂੰ ਅੱਜ ਇਕ ਦਿਨ ਵਿਚ 600 ਕੋਰੋਨਾ ਪਾਜ਼ੇਟਿਵ ਕੇਸ ਕਹਿਰ ਜਾਪ ਰਹੇ ਹਨ ਪਰ ਦਿੱਲੀ ਵਿਚ ਰੋਜ਼ਾਨਾ ਹਜ਼ਾਰਾਂ ਕੇਸ ਆ ਰਹੇ ਹਨ। ਇਸ ਕਰ ਕੇ ਪੰਜਾਬ ਦੇ ਮੁੱਖ ਮੰਤਰੀ, ਦਿੱਲੀ ਦੇ ਮੁੱਖ ਮੰਤਰੀ ਦੀ ਨਸੀਹਤ ਕਿਉਂ ਸੁਣਨ?
Alcohol
ਵਿਰੋਧੀ ਧਿਰ ਨੂੰ ਯਾਦ ਹੋਵੇਗਾ 2015 ਵਿਚ ਅਬੋਹਰ ਵਿਚ ਸ਼ਿਵ ਲਾਲ ਡੋਡਾ ਵਲੋਂ ਇਕ ਦਲਿਤ ਨੌਜਵਾਨ ਦੇ ਟੁਕੜੇ ਟੁਕੜੇ ਕਰਨ ਦਾ ਸਾਕਾ ਜਦ ਉਸ ਨੇ ਉਥੇ ਨਕਲੀ ਸ਼ਰਾਬ ਦੇ ਜਾਲ ਦਾ ਪਰਦਾਫ਼ਾਸ਼ ਕਰਨ ਦਾ ਯਤਨ ਕੀਤਾ ਸੀ। ਕੁੱਝ ਐਮ.ਐਲ.ਏ. ਤੇ ਹੋਰ ਲੀਡਰ ਵੀ ਸੱਚੇ ਹੋਣ ਲਈ ਤੇ ਆਪਸੀ ਨਰਾਜ਼ਗੀਆਂ ਨੂੰ ਲੈ ਕੇ, ਆਉਦੀਆਂ ਚੋਣਾਂ ਕਾਰਨ ਅੱਜ ਬੋਲ ਰਹੇ ਹਨ ਨਹੀਂ ਤਾਂ ਇਹ ਸਿਸਟਮ ਕਈ ਸਾਲਾਂ ਤੋਂ ਸੱਭ ਦੇ ਸਾਹਮਣੇ ਫਲਦਾ-ਫੁਲਦਾ ਆ ਰਿਹਾ ਹੈ, ਕਿਸੇ ਨੇ ਕਦੇ ਕੁੱਝ ਨਹੀਂ ਸੀ ਆਖਿਆ। ਪਰ ਸਰਕਾਰ ਲਈ ਇਨ੍ਹਾਂ 107 ਪਰਵਾਰਾਂ ਦੇ ਰੋਣ-ਕੁਰਲਾਣ ਦੀ ਆਵਾਜ਼ ਸੁਣ ਕੇ ਹੁਣ ਜਾਗਣ ਦੀ ਜ਼ਰੂਰਤ ਹੈ।
Alcohol
ਹਰ ਗ਼ੈਰ ਕਾਨੂੰਨੀ ਵਪਾਰ ਅੱਜ ਪੰਜਾਬ ਵਿਚ ਫੈਲ ਰਿਹਾ ਹੈ। ਕੋਰੋਨਾ ਵਾਇਰਸ ਦੇ ਚਲਦਿਆਂ ਲਾਕਡਾਊਨ/ਕਰਫ਼ਿਊ ਦੌਰਾਨ ਵੀ ਪੰਜਾਬ ਵਿਚ ਨਾਜਾਇਜ਼ ਸ਼ਰਾਬ ਵਿਕਦੀ ਰਹੀ। ਸਰਕਾਰ ਦੇ ਐਕਸਾਈਜ਼ ਵਿਭਾਗ ਨੂੰ ਇਸ ਦਾ ਭਾਰੀ ਨੁਕਸਾਨ ਵੀ ਸਹਿਣਾ ਪਿਆ। ਮੰਤਰੀਆਂ ਨੇ ਤਾਂ ਅਫਸਰਸ਼ਾਹੀ 'ਤੇ ਸਿੱਧਾ ਦੋਸ਼ ਲਗਾ ਦਿਤਾ ਸੀ ਪਰ ਠੋਸ ਕਦਮ ਕੋਈ ਨਾ ਚੁੱਕੇ ਗਏ। ਰਾਜਪੁਰਾ ਵਿਚ ਲੰਗਰ ਵੰਡਣ ਦੀ ਆੜ ਵਿਚ ਜੂਆ ਖੇਡਿਆ ਗਿਆ। ਉਸ ਸਮੇਂ ਵੀ ਤਸਕਰੀ ਬਾਰੇ ਅਫ਼ਵਾਹਾਂ ਉਠੀਆਂ ਸਨ ਪਰ ਜਾਂਚ ਨਹੀਂ ਸੀ ਹੋਈ। ਅੱਜ ਸ਼ਾਇਦ ਲੋਕਾਂ ਅੰਦਰ ਜਾਗਰੂਕਤਾ ਪੈਦਾ ਕਰਨ ਦੀ ਜ਼ਰੂਰਤ ਹੈ।
Alcohol
ਜਿਹੜੀ ਸਰਕਾਰ ਕੋਰੋਨਾ ਦੌਰ ਵਿਚ ਅਪਣੇ ਪਰਵਾਸੀ ਮਜ਼ਦੂਰਾਂ ਦਾ ਖ਼ਿਆਲ ਰਖ ਸਕਦੀ ਹੈ ਅਤੇ ਹਰ ਇਕ ਦੀ ਭੁੱਖ ਦਾ ਖ਼ਿਆਲ ਕਰ ਸਕਦੀ ਹੈ, ਦੇਸ਼ ਵਿਚ ਸੱਭ ਤੋਂ ਚੰਗੀ ਤਾਲਾਬੰਦੀ ਲਾਗੂ ਕਰ ਸਕਦੀ ਹੈ, ਉਹ ਇਸ ਗ਼ੈਰ-ਕਾਨੂੰਨੀ ਵਪਾਰ 'ਤੇ ਭਾਰੂ ਕਿਉਂ ਨਹੀਂ ਹੋ ਸਕਦੀ? ਅੱਜ ਸਰਕਾਰ ਅਤੇ ਉਨ੍ਹਾਂ ਦੇ ਮੰਤਰੀਆਂ ਨੂੰ ਅਪਣੇ ਕਰੀਬੀਆਂ ਦੀ ਬਜਾਏ ਅਪਣੇ ਵੋਟਰਾਂ ਦੀ ਗੱਲ ਸੁਣਨ ਦੀ ਜ਼ਰੂਰਤ ਹੈ। ਸਰਕਾਰ ਨੂੰ ਸੱਤਾ ਵਿਚ ਬਿਠਾਉਣ ਵਾਲੇ ਅਤੇ ਹਟਾਉਣ ਵਾਲੇ ਅੱਜ ਬਹੁਤ ਦੁਖੀ ਹਨ। ਸਰਕਾਰ ਨੂੰ ਸਿੱਧਾ ਉਨ੍ਹਾਂ ਦੇ ਦਰਦ ਨੂੰ ਸੁਣਨ ਦੀ ਜ਼ਰੂਰਤ ਹੈ।
- ਨਿਮਰਤ ਕੌਰ
Punjabi News ਨਾਲ ਜੁੜੀ ਹੋਰ ਅਪਡੇਟ ਲਗਾਤਾਰ ਹਾਸਲ ਕਰਨ ਲਈ ਸਾਨੂੰ Facebook ਤੇ ਲਾਈਕ Twitter ਤੇ follow ਕਰੋ।
