ਸਥਾਨਕ ਲੱਕੀ ਕਲੌਨੀ ਵਿਚ ਮਹਿਲਾ ਕੌਂਸਲਰ ਦੇ ਪਤੀ ਵਲੋਂ ਬੀਤੇ ਦਿਨੀਂ ਬੇਕਸੂਰ ਸਿੱਖ ਨੌਜਵਾਨ ਰਾਜਨ ਸਿੰਘ ਦੀ ਦਸਤਾਰ ਉਤਾਰ ਕੇ, ਕੇਸਾਂ ਦੀ ਬੇਅਦਬੀ ਅਤੇ ਮਾਰ ਕੁਟਾਈ......
ਸ਼ਾਹਬਾਦ ਮਾਰਕੰਡਾ : ਸਥਾਨਕ ਲੱਕੀ ਕਲੌਨੀ ਵਿਚ ਮਹਿਲਾ ਕੌਂਸਲਰ ਦੇ ਪਤੀ ਵਲੋਂ ਬੀਤੇ ਦਿਨੀਂ ਬੇਕਸੂਰ ਸਿੱਖ ਨੌਜਵਾਨ ਰਾਜਨ ਸਿੰਘ ਦੀ ਦਸਤਾਰ ਉਤਾਰ ਕੇ, ਕੇਸਾਂ ਦੀ ਬੇਅਦਬੀ ਅਤੇ ਮਾਰ ਕੁਟਾਈ ਕਰਨ ਦਾ ਮਾਮਲਾ ਬੀਤੇ ਇਕ ਹਫਤੇ ਤੋਂ ਗਰਮਾ ਰਿਹਾ ਸੀ। ਇਸ ਮਾਮਲੇ ਵਿਚ ਦੋਸ਼ੀ ਨੇ ਉਲਟਾ ਸਿੱਖ ਨੌਜਵਾਨ ਵਿਰੁਧ ਹੀ ਪੁਲਿਸ ਵਿਚ ਮਾਮਲਾ ਦਰਜ ਕਰਵਾ ਦਿਤਾ ਸੀ ਜਿਸ ਨੂੰ ਲੈ ਕੇ ਸਿੱਖ ਸਮਾਜ ਨੇ ਭਾਰੀ ਵਿਰੋਧ ਕੀਤਾ ਅਤੇ ਪੁਲਿਸ ਅਫਸਰਾਂ ਨਾਲ ਕਈ ਬੈਠਕਾਂ ਹੋਈਆਂ।
ਹਰਿਆਣਾ ਸਿੱਖ ਪਰਿਵਾਰ ਦੇ ਪ੍ਰਧਾਨ ਅਤੇ ਸ਼੍ਰੋਮਣੀ ਅਕਾਲੀ ਦਲ ਦੇ ਬੁਲਾਰੇ ਕੰਵਲਜੀਤ ਸਿੰਘ ਅਜਰਾਨਾ ਨੇ ਇਸ ਮਾਮਲੇ ਨੂੰ ਗੰਭੀਰਤਾ ਨਾਲ ਲੈਂਦੇ ਹੋਏ ਆਪਣੇ ਸਾਥੀ ਸਿੱਖਾਂ ਨਾਲ ਅੰਦੋਲਨ ਸ਼ੁਰੂ ਕਰ ਦਿਤਾ ਸੀ। ਆਖਰ ਵਿਚ ਸਿੱਖ ਸੰਘਰਸ਼ ਰੰਗ ਲਿਆਇਆ ਅਤੇ ਕੌਂਸਲਰ ਪਤੀ ਰਾਕੇਸ਼ ਗਰਗ ਨੇ ਭਰੀ ਪੰਚਾਇਤ ਵਿਚ ਸਿੱਖ ਸਮਾਜ ਤੋਂ ਮਾਫੀ ਮੰਗੀ। ਉਸਨੇ ਆਪਣੀ ਗਲਤੀ ਮੰਨਦੇ ਹੋਏ ਪੰਚਾਇਤ ਦੇ ਸਾਹਮਣੇ ਇਹ ਵੀ ਲਿਖ ਕੇ ਦਿਤਾ ਕਿ ਭਵਿੱਖ ਵਿਚ ਉਹ ਅਜਿਹੀ ਗਲਤੀ ਨਹੀਂ ਕਰੇਗਾ।
ਸਿੱਖ ਸਮਾਜ ਦਾ ਸਦਾ ਉਹ ਆਦਰ ਅਤੇ ਮਾਣ ਸਨਮਾਣ ਕਰਦਾ ਰਹੇਗਾ। ਸਿੱਖ ਸਮਾਜ ਦੇ ਸੰਘਰਸ਼ ਦੀ ਅਗਵਾਈ ਕਰ ਰਹੇ ਕੰਵਲਜੀਤ ਸਿੰਘ ਅਜਰਾਨਾ ਨੇ ਕਿਹਾ ਕਿ ਅਜਿਹੇ ਲੌਕਾਂ ਕਾਰਨ ਸਮਾਜ ਦਾ ਭਾਈਚਾਰਾ ਖਰਾਬ ਹੁੰਦਾ ਹੈ। ਅਜਿਹੇ ਵਿਚ ਸਾਨੂੰ ਸਾਰੇ ਧਰਮਾਂ ਦਾ ਸਨਮਾਨ ਅਤੇ ਸਤਿਕਾਰ ਕਰਨਾ ਚਾਹੀਦਾ ਹੈ। ਅਜਰਾਨਾ ਨੇ ਕਿਹਾ ਕਿ ਇਸ ਮਾਮਲੇ ਦੀ ਗੰਭੀਰਤਾ ਨੂੰ ਵੇਖਦੇ ਹੋਏ
ਐਸ ਪੀ ਕੁਰੂਕਸ਼ੇਤਰ ਦੇ ਆਦੇਸ਼ਾਨੁਸਾਰ ਸਾਰੇ ਮਾਮਲੇ ਦੀ ਡੀਐਸਪੀ ਸ਼ਾਹਬਾਦ ਜਗਦੀਸ਼ ਰਾਏ ਨੇ ਜਾਂਚ ਕੀਤੀ ਅਤੇ ਕੌਂਸਲਰ ਪਤੀ ਰਾਕੇਸ਼ ਗਰਗ ਨੂੰ ਦੋਸ਼ੀ ਠਹਿਰਾਇਆ। ਯਾਦ ਰਹੇ, ਰਾਕੇਸ਼ ਗਰਗ ਨੇ ਰਾਜਨ ਤੇ ਮੁਹੱਲੇ ਦੀਆਂ ਲੜਕੀਆਂ ਨੂੰ ਛੇੜਨ ਅਤੇ ਤਲਵਾਰ ਨਾਲ ਹਮਲਾ ਕਰਨ ਦਾ ਦੋਸ਼ ਲਗਾਇਆ ਸੀ। ਜਾਂਚ ਵਿਚ ਇਹ ਸਾਰਾ ਮਾਮਲਾ ਝੂਠਾ ਪਾਇਆ ਗਿਆ।
