ਪਟਿਆਲਾ: ਪਟਿਆਲਾ ਸ਼ਹਿਰ ਦੇ ਨਜ਼ਦੀਕੀ ਪੈਂਦੇ ਪਿੰਡਾਂ ਦੇ ਰਹਿਣ ਵਾਲੇ ੭੫ ਸਾਲਾ ਮੁਖਤਿਆਰ ਸਿੰਘ ਚਮਾਰਹੇੜੀ ਤੇ ੭੨ ਸਾਲਾ ਬਜ਼ੁਰਗ ਬਾਲ ਸਿੰਘ ਵਿਰਕ ਕਮਾਲਪੁਰ ਜਿਨ੍ਹਾਂ ਨੇ ਖੇਡਾਂ ਦੇ ਖੇਤਰ ਵਿਚ ਵੱਡੀਆ ਮੱਲਾਂ ਮਾਰੀਆਂ ਹਨ। ਅਯੋਕੇ ਸਮੇਂ ਦੇ ਦੌਰਾਨ ਵੀ ਜਦੋ ਇਹ ਅਭਿਆਸ ਕਰਦੇ ਹਨ ਤਾਂ ਨੌਜਵਾਨਾਂ ਨੂੰ ਵੀ ਮਾਤ ਪਾ ਦਿੰਦੇ ਹਨ।

ਇਹ ਦੋਨੋਂ ਬਜ਼ੁਰਗ ਖਿਡਾਰੀ ਟ੍ਰਿਪਲ ਜੰਪ, ਲਾਂਗ ਜੰਪ, ਜੈਵਲਿਨ ਥਰੋਅ, ਡਿਸਕਸ ਥਰੋਅ, ਹੈਮਰ ਥਰੋਅ, ਪੋਲ, ਵਾਲਟ ਅਤੇ ਸ਼ਾਟਪੁੱਟ ਦੇ ਨੈਸ਼ਨਲ ਪੱਧਰ ਤੱਕ ਆਪਣੀ ਧਾਕ ਦਾ ਲੋਹਾ ਮਨਵਾ ਚੁੱਕੇ ਹਨ। ਖੇਡਾਂ ਵਿਚ ਜਿੱਤੇ ਇਨਾਮਾਂ ਦੀ ਗਿਣਤੀ ਕਰਨੀ ਵੀ ਔਖੀ ਹੈ। ਇਸ ਤੋਂ ਇਲਾਵਾ ਕੇਂਦਰ ਅਤੇ ਪੰਜਾਬ ਸਰਕਾਰਾਂ ਤੋਂ ਕਈ ਵਾਰ ਸਨਮਾਨਤ ਹੋ ਚੁੱਕੇ ਹਨ।

ਪਿਛਲੇ ਕੁੱਝ ਦਿਨ ਪਹਿਲਾ ਰੁੜਕੀ ( ਉੱਤਰਾਖੰਡ) ਵਿਚ ਹੋਈ ਮਿੰਨੀ ਮੈਰਾਥਨ ਵਿਚ ਬਾਲ ਸਿੰਘ ਵਿਰਕ ਨੇ ੭ ਕਿਲੋਮੀਟਰ ਦੌੜ ੩੬ ਮਿੰਟ ਵਿਚ ਪੂਰੀ ਕਰ ਕੇ ਗੋਲਡ ਅਤੇ ਮੁਖਤਿਆਰ ਸਿੰਘ ਨੇ ੭ ਕਿਲੋਮੀਟਰ ਨੂੰ ੪੦ ਮਿੰਟ ਵਿਚ ਪੂਰਾ ਕਰ ਕੇ ਸਿਲਵਰ ਮੈਡਲ ਜਿੱਤ ਕੇ ਪੰਜਾਬ ਸੂਬੇ ਦਾ ਮਾਣ ਵਧਾਇਆ। ਇਨ੍ਹਾਂ ਦੋਵੇਂ ਖਿਡਾਰੀਆਂ ਨੂੰ ੨੬ ਜਨਵਰੀ ਅਤੇ ਜ਼ਿਲਾ ਪੱਧਰੀ ਸਨਮਾਨ ਨਾਲ ਸੂਬਾ ਸਰਕਾਰ ਵੱਲੋਂ ਸਨਮਾਨਿਤ ਕੀਤਾ ਗਿਆ।