ਸਮੁੰਦਰ ਦੇ ਅੰਦਰ ਵੀ ਘੁੰਮ ਸਕਣਗੇ ਯਾਤਰੀ, ਮਹਾਰਾਸ਼ਟਰ ਵਿਚ ਸ਼ੁਰੂ ਹੋਵੇਗੀ ਟੂਰਿਸਟ ਪਣਡੁੱਬੀ ਸੇਵਾ!
ਆਸਟਰੇਲੀਆ ਵਿਚ ਲੋਕਾਂ ਨੂੰ ਸਮੁੰਦਰ ਦੀ ਡੂੰਘਾਈ ਦਾ ਤਜਰਬਾ ਕਰਾਉਣ ਲਈ...
ਮੁੰਬਈ: ਆਸਟ੍ਰੇਲੀਆ ਵਿਚ ਟੈਕਨਾਲਾਜੀ ਕੰਪਨੀ ਉਬਰ ਦੁਆਰਾ ਅੰਡਰਵਾਟਰ ਪਣਡੁੱਬੀ ਸੇਵਾ ਦੀ ਸ਼ੁਰੂਆਤ ਦਾ ਫ਼ੈਸਲਾ ਕਰਨ ਦੀਆਂ ਖ਼ਬਰਾਂ ਸਾਹਮਣੇ ਆਈਆਂ ਹਨ। ਜੇ ਤੁਸੀਂ ਵੀ ਕਿਸੇ ਅਜਿਹੀ ਸੇਵਾ ਦਾ ਲੁਤਫ਼ ਲੈਣਾ ਚਾਹੁੰਦੇ ਹੋ ਤਾਂ ਤੁਹਾਨੂੰ ਆਸਟ੍ਰੇਲੀਆ ਜਾਣ ਦੀ ਜ਼ਰੂਰਤ ਨਹੀਂ ਹੈ।
ਜਲਦ ਹੀ ਅਜਿਹੀ ਸੇਵਾ ਦਾ ਅਨੰਦ ਭਾਰਤੀ ਸੈਲਾਨੀ ਵੀ ਚੁੱਕ ਸਕਣਗੇ। ਜਾਣਕਾਰੀ ਅਨੁਸਾਰ ਮਹਾਰਾਸ਼ਟਰ ਵਿਚ ਯਾਤਰੀਆਂ ਨੂੰ ਆਕਰਸ਼ਿਤ ਕਰਨ ਲਈ ਰਾਜ ਸੈਰ ਸਪਾਟਾ ਵਿਭਾਗ ਨੇ ਟੂਰਿਸਟ ਪਣਡੁੱਬੀ ਸੇਵਾ ਸ਼ੁਰੂ ਕਰਨ ਤੇ ਕੰਮ ਕਰ ਰਿਹਾ ਹੈ। ਇਸ ਦੇ ਲਈ ਰਾਜ ਸਰਕਾਰ ਵੱਲੋਂ 25 ਕਰੋੜ ਰੁਪਏ ਦੀ ਰਾਸ਼ੀ ਵੀ ਮਿਲ ਚੁੱਕੀ ਹੈ। ਜਲਦ ਹੀ ਇਸ ਸ਼ੁਰੂ ਕਰਨ ਲਈ ਟੈਂਡਰ ਕੱਢਿਆ ਜਾਵੇਗਾ।
ਮਹਾਰਾਸ਼ਟਰ ਟੂਰਿਜ਼ਮ ਡਿਵੈਲਪਮੈਂਟ ਕਾਰਪੋਰੇਸ਼ਨ ਦੇ ਐਮਡੀ ਅਭਿਮੰਨਿਯੂ ਕਾਲੇ ਨੇ ਇਸ ਦੀ ਜਾਣਕਾਰੀ ਦਿੰਦੇ ਹੋਏ ਦਸਿਆ ਕਿ ਸਿੰਧੂਦੁਰਗ ਵਿਚ ਯਾਤਰੀਆਂ ਲਈ ਟੂਰਿਸਟ ਪਣਡੁੱਬੀ ਦੀ ਸ਼ੁਰੂਆਤ ਕੀਤੀ ਜਾਵੇਗੀ। ਅਭਿਮੰਨਿਯੂ ਕਾਲੇ ਨੇ ਦਸਿਆ ਕਿ ਸਬਮਰੀਨ ਵਿਚ 24 ਲੋਕਾਂ ਦੇ ਬੈਠਣ ਦੀ ਸੁਵਿਧਾ ਹੋਵੇਗੀ ਅਤੇ ਤਕਰੀਬਨ 20 ਮਿੰਟ ਤਕ ਇਹ ਸਮੁੰਦਰ ਦੇ ਅੰਦਰ ਯਾਤਰੀਆਂ ਨੂੰ ਲੈ ਕੇ ਘੁੰਮੇਗੀ।
ਕੁਝ ਮਹੀਨੇ ਪਹਿਲਾਂ ਇਸ ਦੇ ਲਈ ਸਰਕਾਰ ਨੇ 25 ਕਰੋੜ ਰੁਪਏ ਦਿੱਤੇ ਸਨ ਪਰ ਚੋਣ ਜ਼ਾਬਤਾ ਲਾਗੂ ਹੋਣ ਕਰ ਕੇ ਬਹੁਤ ਕੁੱਝ ਨਹੀਂ ਹੋ ਸਕਿਆ। ਹੁਣ ਇਸ ਦੇ ਲਈ ਕੰਮ ਫਿਰ ਤੋਂ ਸ਼ੁਰੂ ਹੋ ਗਿਆ ਹੈ। ਉਮੀਦ ਹੈ ਕਿ ਸਾਲ ਦੇ ਅੰਤ ਤਕ ਇਸ ਦੀ ਸ਼ੁਰੂਆਤ ਹੋ ਜਾਵੇਗੀ ਅਤੇ ਯਾਤਰੀਆਂ ਨੂੰ ਇਸ ਦਾ ਲਾਭ ਮਿਲਣ ਲੱਗੇਗਾ।
ਤੁਹਾਨੂੰ ਦੱਸ ਦੇਈਏ ਕਿ ਆਸਟਰੇਲੀਆ ਵਿਚ ਲੋਕਾਂ ਨੂੰ ਸਮੁੰਦਰ ਦੀ ਡੂੰਘਾਈ ਦਾ ਤਜਰਬਾ ਕਰਾਉਣ ਲਈ, ਉਬੇਰ ਨੇ ਪਿਛਲੇ ਸਾਲ ਅੰਡਰਵਾਟਰ ਪਣਡੁੱਬੀ ਸੇਵਾ ਸ਼ੁਰੂ ਕਰਨ ਦਾ ਐਲਾਨ ਕੀਤਾ ਸੀ। ਕੰਪਨੀ ਨੇ ਕਿਹਾ ਕਿ ਇਹ ਵਾਤਾਵਰਣ ਪ੍ਰੇਮੀਆਂ ਅਤੇ ਮਾਹਰਾਂ ਨੂੰ ਸਮੁੰਦਰੀ ਜੀਵਨ 'ਤੇ ਨੇੜਿਓਂ ਦੀ ਝਲਕ ਦਿਖਾਈ ਦੇਵੇਗੀ।
ਕੰਪਨੀ ਨੇ ਪਣਡੁੱਬੀ ਤੋਂ ਕੁਈਨਜ਼ਲੈਂਡ ਦੇ ਸਮੁੰਦਰ ਵਿਚ ਸਥਿਤ ਬੈਰੀਅਰ ਰੀਫ ਨੂੰ ਵੇਖਣ ਲਈ ਐਪ ਰਾਹੀਂ ਲੋਕਾਂ ਨੂੰ ਬੁੱਕ ਕਰਨ ਦੀ ਸਹੂਲਤ ਦਾ ਐਲਾਨ ਕੀਤਾ ਸੀ। ਸ਼ੁਰੂ ਵਿਚ ਇਹ ਸੇਵਾ ਸਿਰਫ ਚੋਣਵੇਂ ਉਪਭੋਗਤਾਵਾਂ ਨੂੰ ਪ੍ਰਦਾਨ ਕੀਤੀ ਜਾਣੀ ਸੀ।
Punjabi News ਨਾਲ ਜੁੜੀ ਹੋਰ ਅਪਡੇਟ ਲਗਾਤਾਰ ਹਾਸਲ ਕਰਨ ਲਈ ਸਾਨੂੰ Facebook ਤੇ ਲਾਈਕ Twitter ਤੇ follow ਕਰੋ।