Online fraud luring people of girlfriend

Online fraud: ਸਰਕਾਰੀ ਨੌਕਰੀ ਦੀ ਪ੍ਰੀਖਿਆ ਵਿਚ ਫੇਲ ਹੋਏ 5 ਨੌਜਵਾਨਾਂ ਨੇ ਅਮੀਰ ਬਣਨ ਲਈ ਧੋਖਾਧੜੀ ਦੀ ਅਨੋਖੀ ਯੋਜਨਾ ਬਣਾਈ। ਇਨ੍ਹਾਂ ਨੌਜਵਾਨਾਂ ਨੇ ਡੇਢ ਮਹੀਨੇ ਵਿਚ 200 ਲੋਕਾਂ ਨਾਲ ਲੱਖਾਂ ਰੁਪਏ ਦੀ ਠੱਗੀ ਮਾਰੀ ਹੈ। ਦਰਅਸਲ ਜਿਵੇਂ ਕਿਸੇ ਨੂੰ ਓਟੀਟੀ ਪਲੇਟਫਾਰਮ ਦੀ ਵਰਤੋਂ ਕਰਨ ਲਈ ਮੈਂਬਰਸ਼ਿਪ ਲੈਣੀ ਪੈਂਦੀ ਹੈ। ਇਸੇ ਤਰ੍ਹਾਂ ਇਨ੍ਹਾਂ ਨੌਜਵਾਨਾਂ ਨੇ ਆਨਲਾਈਨ ਗਰਲਫ੍ਰੈਂਡ ਸਕੀਮ ਸ਼ੁਰੂ ਕੀਤੀ। ਇਹ ਨੌਜਵਾਨ ਸੋਸ਼ਲ ਮੀਡੀਆ 'ਤੇ ਇਸ਼ਤਿਹਾਰ ਲਗਾ ਕੇ ਲੜਕੀਆਂ ਨਾਲ ਦੋਸਤੀ ਕਰਨ ਲਈ ਨੌਜਵਾਨਾਂ ਨੂੰ ਸ਼ਿਕਾਰ ਬਣਾਉਂਦੇ ਸਨ। ਇਸ ਦੇ ਲਈ ਉਹ ਹੈਲੋ ਐਪ ਅਤੇ ਇੰਸਟਾਗ੍ਰਾਮ 'ਤੇ ਯੂਜ਼ਰਸ ਨੂੰ ਟਾਰਗੇਟ ਕਰਦੇ ਸਨ।

ਪਹਿਲਾਂ ਉਨ੍ਹਾਂ ਨੂੰ ਅਸ਼ਲੀਲ ਫੋਟੋਆਂ ਭੇਜ ਕੇ ਲੁਭਾਇਆ ਗਿਆ ਅਤੇ ਬਾਅਦ ਵਿਚ ਮੈਂਬਰਸ਼ਿਪ ਲੈਣ ਲਈ ਕਿਹਾ ਜਾਂਦਾ। ਜਿਵੇਂ ਹੀ ਯੂਜ਼ਰ ਪੈਸੇ ਟ੍ਰਾਂਸਫਰ ਕਰਦਾ ਸੀ, ਇਹ ਲੋਕ ਉਸ ਨੂੰ ਬਲਾਕ ਕਰ ਦਿੰਦੇ ਸਨ। ਡੇਢ ਮਹੀਨੇ 'ਚ 5 ਦੋਸ਼ੀਆਂ ਨੇ 200 ਲੋਕਾਂ ਨਾਲ ਲੱਖਾਂ ਰੁਪਏ ਦੀ ਠੱਗੀ ਮਾਰੀ। ਬਦਨਾਮੀ ਦੇ ਡਰੋਂ ਕੋਈ ਵੀ ਪੀੜਤ ਅੱਗੇ ਨਹੀਂ ਆਇਆ। ਉਦੈਪੁਰ ਦੇ ਗੋਵਰਧਨ ਵਿਲਾਸ ਥਾਣੇ ਦੀ ਪੁਲਿਸ ਨੇ ਜਾਅਲੀ ਗਾਹਕ ਬਣ ਕੇ ਇਨ੍ਹਾਂ ਨੂੰ ਬੀਡੀਓ ਕਲੋਨੀ ਵਿਚ ਕਿਰਾਏ ਦੇ ਮਕਾਨ ਵਿਚੋਂ ਫੜਿਆ। ਮੁਲਜ਼ਮ ਭਾਨੂਪ੍ਰਤਾਪ ਸਿੰਘ (27) ਵਾਸੀ ਆਗਰਾ, ਸਤਿਆਮ ਸਿੰਘ (28) ਵਾਸੀ ਆਗਰਾ, ਰਾਹੁਲ ਵਿਆਸ (26) ਵਾਸੀ ਕਰੌਲੀ, ਅਮੁਲ ਅਹੀਰਵਰ (24) ਵਾਸੀ ਛੱਤਰਪੁਰ ਅਤੇ ਮੋਹਿਤ (26) ਵਾਸੀ ਆਗਰਾ ਤੋਂ ਪੁੱਛਗਿੱਛ ਦੌਰਾਨ ਪੂਰੀ ਧੋਖਾਧੜੀ ਦਾ ਖੁਲਾਸਾ ਹੋਇਆ।

ਇੰਝ ਕੀਤੀ ਠੱਗੀ ਦੀ ਸ਼ੁਰੂਆਤ

ਪੁਲਿਸ ਮੁਤਾਬਕ ਇਹ ਪੰਜੇ ਮੁਲਜ਼ਮ ਪੜ੍ਹਾਈ ਦੌਰਾਨ ਮਿਲੇ ਸਨ। ਇਹ ਲੋਕ ਬੈਂਕ ਪੀਓ, ਐਸਐਸਸੀ ਸਮੇਤ ਕਈ ਸਰਕਾਰੀ ਪ੍ਰੀਖਿਆਵਾਂ ਦੀ ਤਿਆਰੀ ਕਰ ਰਹੇ ਸਨ। ਇਸ ਪੂਰੇ ਮਾਮਲੇ ਦੇ ਮਾਸਟਰਮਾਈਂਡ ਸਤਿਆਮ ਸਿੰਘ ਨੇ ਇਨ੍ਹਾਂ ਨੂੰ ਆਪਸ ਵਿਚ ਜੋੜਿਆ। ਸਤਿਅਮ ਨੇ ਪੁੱਛਗਿੱਛ ਦੌਰਾਨ ਦਸਿਆ ਕਿ ਉਸ ਨੇ ਕਈ ਸਰਕਾਰੀ ਪ੍ਰੀਖਿਆਵਾਂ ਦਿਤੀਆਂ ਸਨ ਪਰ ਜਦੋਂ ਉਹ ਪਾਸ ਨਹੀਂ ਹੋਇਆ ਤਾਂ ਉਸ ਨੇ ਠੱਗੀ ਮਾਰਨ ਦੀ ਯੋਜਨਾ ਬਣਾਈ। ਉਸ ਨੇ ਭਾਨੂ ਤੇ ਰਾਹੁਲ ਨੂੰ ਵੀ ਅਪਣੇ ਨਾਲ ਮਿਲਾ ਲਿਆ।

ਡੇਢ ਮਹੀਨਾ ਪਹਿਲਾਂ ਹੀ ਉਸ ਨੇ ਬੀਡੀਓ ਕਲੋਨੀ ਬਲੀਚਾ, ਉਦੈਪੁਰ ਵਿਚ ਮਕਾਨ ਕਿਰਾਏ ’ਤੇ ਲਿਆ ਸੀ। ਇਥੋਂ ਉਹ ਧੋਖਾਧੜੀ ਦੀਆਂ ਵਾਰਦਾਤਾਂ ਨੂੰ ਅੰਜਾਮ ਦਿੰਦੇ ਸਨ। ਇਹ ਪੰਜੇ ਵੱਖ-ਵੱਖ ਫੋਨਾਂ 'ਤੇ ਗੱਲਬਾਤ ਕਰਦੇ ਸਨ ਅਤੇ ਲੋਕਾਂ ਨੂੰ ਠੱਗੀ ਦਾ ਸ਼ਿਕਾਰ ਬਣਾਉਂਦੇ ਸਨ। ਪੁਲਿਸ ਦੀ ਹੁਣ ਤਕ ਦੀ ਜਾਂਚ 'ਚ ਸਾਹਮਣੇ ਆਇਆ ਹੈ ਕਿ ਮੁਲਜ਼ਮਾਂ ਨੇ ਇੰਸਟਾਗ੍ਰਾਮ ਅਤੇ ਹੈਲੋ ਐਪ 'ਤੇ ਅਕਾਊਂਟ ਬਣਾਏ ਸਨ। ਇਸ ਤੋਂ ਬਾਅਦ ਉਹ ਖਾਤੇ 'ਤੇ ਲਿੰਕ ਪੋਸਟ ਕਰਦੇ ਸਨ। ਜੋ ਸਿੱਧੇ ਤੌਰ 'ਤੇ ਵਟਸਐਪ ਚੈਟ ਜਾਂ ਇੰਸਟਾ ਚੈਟ ਨਾਲ ਜੁੜਿਆ ਹੋਇਆ ਸੀ। ਇਸ 'ਚ ਜਦੋਂ ਵੀ ਕੋਈ ਯੂਜ਼ਰ ਇਸ ਲਿੰਕ 'ਤੇ ਕਲਿੱਕ ਕਰੇਗਾ ਤਾਂ ਇਕ ਚੈਟ ਬਾਕਸ ਖੁੱਲ੍ਹ ਜਾਵੇਗਾ। ਪਹਿਲਾਂ ਜਿਵੇਂ ਹੀ Hi ਦਾ ਮੈਸੇਜ ਆਉਂਦਾ ਸੀ, ਉਹ ਸੋਸ਼ਲ ਮੀਡੀਆ ਯੂਜ਼ਰ ਨੂੰ 6 ਮਹੀਨੇ ਲਈ ਮੈਂਬਰਸ਼ਿਪ ਲੈਣ ਲਈ ਕਹਿੰਦੇ ਸਨ।

ਯੂਜ਼ਰ ਨੂੰ ਕਿਹਾ ਜਾਂਦਾ ਸੀ ਕਿ ਜੇਕਰ ਤੁਸੀਂ ਮੈਂਬਰਸ਼ਿਪ ਲੈਂਦੇ ਹੋ ਤਾਂ ਤੁਹਾਨੂੰ 6 ਮਹੀਨੇ ਤਕ ਚੈਟ ਕਰਨ ਦਾ ਮੌਕਾ ਮਿਲੇਗਾ। ਇਸ ਦੇ ਲਈ ਉਹ ਯੂਜ਼ਰਸ ਨੂੰ ਫਰਜ਼ੀ ਚੈਟ ਦੇ ਸਕ੍ਰੀਨਸ਼ਾਟਸ ਵੀ ਭੇਜਦੇ ਸਨ। ਤਾਂ ਜੋ ਦੂਜੇ ਵਿਅਕਤੀ ਨੂੰ ਵਿਸ਼ਵਾਸ ਹੋਵੇ ਕਿ ਇਹ ਅਸਲ ਵਿਚ ਇਕ ਅਸਲੀ ਡੇਟਿੰਗ ਸਾਈਟ ਹੈ। ਇਨ੍ਹਾਂ ਸਕ੍ਰੀਨਸ਼ਾਟਸ ਵਿਚ ਨੌਜਵਾਨਾਂ ਅਤੇ ਔਰਤਾਂ ਵਿਚਕਾਰ ਚੈਟ ਦੇ ਸਕ੍ਰੀਨਸ਼ਾਟਸ ਸਨ। ਜਦੋਂ ਪੁਲਿਸ ਨੇ ਉਨ੍ਹਾਂ ਨੂੰ ਫੜਿਆ ਤਾਂ ਉਨ੍ਹਾਂ ਦੇ ਫ਼ੋਨਾਂ 'ਚੋਂ ਅਸ਼ਲੀਲ ਤਸਵੀਰਾਂ ਅਤੇ ਸਕ੍ਰੀਨਸ਼ਾਟਸ ਵੀ ਮਿਲੇ, ਜੋ ਯੂਜ਼ਰਜ਼ ਨੂੰ ਭੇਜੇ ਜਾਂਦੇ ਸਨ।

ਤਾਜ਼ਾ ਅਪਡੇਟਸ ਲਈ ਸਾਡੇ Whatsapp Broadcast Channel ਨਾਲ ਜੁੜੋ।

ਕੁੜੀਆਂ ਨੂੰ ਵੀ ਬਣਾਇਆ ਠੱਗੀ ਦਾ ਸ਼ਿਕਾਰ

ਪੁਲਿਸ ਮੁਤਾਬਕ ਮੁਲਜ਼ਮ ਨਾ ਸਿਰਫ ਪੁਰਸ਼ ਯੂਜ਼ਰਸ ਸਗੋਂ ਮਹਿਲਾ ਯੂਜ਼ਰਸ ਨੂੰ ਵੀ ਧੋਖਾਧੜੀ ਦਾ ਸ਼ਿਕਾਰ ਬਣਾਉਂਦੇ ਸਨ। ਉਨ੍ਹਾਂ ਨੇ ਇੰਸਟਾਗ੍ਰਾਮ 'ਤੇ ਡੇਟਿੰਗ ਐਪ ਲਈ ਇਸ਼ਤਿਹਾਰ ਜਾਰੀ ਕੀਤਾ ਸੀ। ਇਸ ਵਿਚ ਲੜਕੀਆਂ ਨੂੰ ਆਨਲਾਈਨ ਬੁਆਏਫ੍ਰੈਂਡ ਅਤੇ ਲੜਕਿਆਂ ਨੂੰ ਆਨਲਾਈਨ ਗਰਲਫ੍ਰੈਂਡ ਦਾ ਲਾਲਚ ਦਿਤਾ ਗਿਆ। ਜਿਵੇਂ ਹੀ ਯੂਜ਼ਰਸ ਅਕਾਊਂਟ 'ਚ ਪੈਸੇ ਜਮ੍ਹਾ ਕਰਦੇ ਸਨ, ਇਹ ਲੋਕ ਉਨ੍ਹਾਂ ਨੂੰ ਬਲਾਕ ਕਰ ਦਿੰਦੇ ਸਨ। ਬਦਨਾਮੀ ਦੇ ਡਰੋਂ ਕਿਸੇ ਨੇ ਇਨ੍ਹਾਂ ਵਿਰੁਧ ਸ਼ਿਕਾਇਤ ਨਹੀਂ ਕੀਤੀ।

ਪੁੱਛਗਿੱਛ ਦੌਰਾਨ ਖੁਲਾਸਾ ਹੋਇਆ ਕਿ ਇਨ੍ਹਾਂ ਲੋਕਾਂ ਨੇ ਉਦੈਪੁਰ ਪਹੁੰਚਦੇ ਹੀ ਠੱਗੀ ਮਾਰਨੀ ਸ਼ੁਰੂ ਕਰ ਦਿਤੀ ਸੀ। ਮੁਲਜ਼ਮਾਂ ਨੇ ਸ਼ਿਵਾਨੀ ਦੇ ਨਾਂਅ ’ਤੇ ਟਰੱਕ ਚਾਲਕ ਦੀ ਆਈਡੀ ਬਣਾਈ ਸੀ। ਰੀਆ ਦੇ ਨਾਂਅ 'ਤੇ ਇੰਸਟਾਗ੍ਰਾਮ 'ਤੇ ਇਕ ਅਕਾਊਂਟ ਵੀ ਬਣਾਇਆ ਗਿਆ ਸੀ। ਪੁੱਛਗਿੱਛ ਦੌਰਾਨ ਇਹ ਗੱਲ ਸਾਹਮਣੇ ਆਈ ਕਿ ਇਹ ਲੋਕ ਲੜਕੀਆਂ ਬਣ ਕੇ ਗੱਲਬਾਤ ਕਰਦੇ ਸਨ। ਹੁਣ ਪੁਲਿਸ ਮੁਲਜ਼ਮਾਂ ਦੇ ਫ਼ੋਨ ਸਕੈਨ ਕਰ ਰਹੀ ਹੈ, ਜਿਸ ਤੋਂ ਪਤਾ ਲਗਾਇਆ ਜਾ ਰਿਹਾ ਹੈ ਕਿ ਕਿੰਨੇ ਲੋਕਾਂ ਨਾਲ ਠੱਗੀ ਹੋਈ ਅਤੇ ਕਿੰਨੀ ਰਕਮ ਦੀ ਠੱਗੀ ਹੋਈ।

(For more Punjabi news apart from Online fraud luring people of girlfriend news in Punjabi, stay tuned to Rozana Spokesman)