ਭਿਆਨਕ ਹਾਦਸੇ ਦਾ ਸ਼ਿਕਾਰ ਹੋਇਆ ਇੰਡੀਅਨ ਨੇਵੀ ਦਾ ਗਲਾਈਡਰ, ਦੋ ਅਫ਼ਸਰਾਂ ਦੀ ਮੌਤ
ਹਾਦਸੇ ਦੀ ਜਾਂਚ ਲਈ ਬੋਰਡ ਆਫ ਇਨਕੁਆਇਰੀ ਦਾ ਗਠਨ
ਨਵੀਂ ਦਿੱਲੀ: ਐਤਵਾਰ ਸਵੇਰੇ ਕੇਰਲ ਦੇ ਕੋਚੀ ਵਿਚ ਨਿਯਮਿਤ ਉਡਾਣ ਦੌਰਾਨ ਇਕ ਗਲਾਈਡਰ ਦੇ ਹਾਦਸਾਗ੍ਰਸਣ ਹੋਣ ਕਾਰਨ ਇੰਡੀਅਨ ਨੇਵੀ ਦੇ ਦੋ ਅਫ਼ਸਰਾਂ ਦੀ ਮੌਤ ਹੋਣ ਜਾਣ ਦਾ ਸਮਾਚਾਰ ਪ੍ਰਾਪਤ ਹੋਇਆ ਹੈ। ਦਰਅਸਲ ਇਹ ਗਲਾਈਡਰ ਟ੍ਰੇਨਿੰਗ ਲਈ ਉਡਿਆ ਸੀ, ਜੋ ਕਿ ਐਤਵਾਰ ਨੂੰ ਹਾਦਸੇ ਦਾ ਸ਼ਿਕਾਰ ਹੋ ਗਿਆ।
ਹਾਦਸੇ ਦੌਰਾਨ ਗਲਾਈਡਰ ਵਿਚ ਇੰਡੀਅਨ ਨੇਵੀ ਦੇ ਦੋ ਅਫ਼ਸਰ ਸਵਾਰ ਸਨ, ਦੋਵਾਂ ਦੀ ਹਾਦਸੇ ਦੌਰਾਨ ਮੌਤ ਹੋ ਗਈ ਹੈ। ਹਾਦਸੇ ਦੀ ਜਾਂਚ ਲਈ ਬੋਰਡ ਆਫ ਇਨਕੁਆਇਰੀ ਗਠਿਤ ਕੀਤੀ ਗਈ ਹੈ। ਮਿਲੀ ਜਾਣਕਾਰੀ ਮੁਤਾਬਕ ਇੰਡੀਅਨ ਨੇਵੀ ਦੇ ਗਲਾਈਡਰ ਨੇ ਨਿਯਮਿਤ ਅਭਿਆਸ ਦੌਰਾਨ ਆਈਐਨਐਸ ਗਰੂੜ ਤੋਂ ਉਡਾਨ ਭਰੀ ਸੀ।
ਗਲਾਈਡਰ ਸਵੇਰੇ ਕਰੀਬ ਸੱਤ ਵਜੇ ਜਲ ਸੈਨਾ ਬੇਸ ਦੇ ਨੇੜੇ ਪੁਲ ਕੋਲ ਹਾਦਸੇ ਦਾ ਸ਼ਿਕਾਰ ਹੋ ਗਿਆ। ਇਸ ਗਲਾਈਡਰ ਵਿਚ ਲੈਫਟੀਨੈਂਟ ਰਾਜੀਵ ਝਾਅ ਸੁਨੀਲ ਕੁਮਾਰ ਸਵਾਰ ਸਨ। ਉਹਨਾਂ ਨੂੰ ਤੁਰੰਤ ਆਈਐਨਐਚਐਸ ਸੰਜੀਵਨੀ ਸ਼ਿਫਟ ਕੀਤਾ ਗਿਆ ਸੀ ਪਰ ਉਹਨਾਂ ਨੂੰ ਉੱਥੇ ਮ੍ਰਿਤਕ ਐਲਾਨ ਦਿੱਤਾ ਗਿਆ।
ਦੱਖਣੀ ਨੇਵਲ ਕਮਾਂਡ ਨੇ ਇਸ ਹਾਦਸੇ ਵਿਚ ਬੋਰਡ ਆਫ ਇਨਕੁਆਇਰੀ ਦੇ ਗਠਨ ਦਾ ਆਦੇਸ਼ ਦਿੱਤਾ ਹੈ। ਰੱਖਿਆ ਬੁਲਾਰੇ ਨੇ ਦੱਸਿਆ ਕਿ ਐਤਵਾਰ ਸਵੇਰੇ ਹੋਏ ਇਸ ਹਾਦਸੇ ਵਿਚ ਅਸੀਂ ਦੋ ਬਹਾਦਰ ਜਵਾਨਾਂ ਨੂੰ ਖੋ ਦਿੱਤਾ ਹੈ। ਉਹਨਾਂ ਕਿਹਾ ਕਿ ਇਸ ਦੌਰਾਨ ਨੇਵਲ ਪਾਵਰ ਗਲਾਈਡਰ ਇਕ ਨਿਯਮਤ ਅਭਿਆਸ 'ਤੇ ਸੀ।