Passenger hits pilot: ਉਡਾਣ ਵਿਚ ਦੇਰੀ ਦੇ ਐਲਾਨ ਤੋਂ ਭੜਕੇ ਯਾਤਰੀ ਨੇ ਪਾਇਲਟ ’ਤੇ ਕੀਤਾ ਹਮਲਾ, ਵੀਡੀਉ ਹੋਈ ਵਾਇਰਲ
ਹਵਾਬਾਜ਼ੀ ਸੁਰੱਖਿਆ ਏਜੰਸੀ ਨੇ ਘਟਨਾ ਦਾ ਨੋਟਿਸ ਲੈਂਦਿਆਂ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿਤੀ ਹੈ
Passenger hits pilot: ਖ਼ਰਾਬ ਮੌਸਮ ਕਾਰਨ ਉਡਾਣਾਂ ਵਿਚ ਦੇਰੀ ਦਾ ਸਿਲਸਿਲਾ ਜਾਰੀ ਹੈ। ਇਸ ਦੌਰਾਨ ਦਿੱਲੀ 'ਚ ਜਹਾਜ਼ ਦੇ ਟੇਕ ਆਫ 'ਚ ਦੇਰੀ ਤੋਂ ਇਕ ਯਾਤਰੀ ਇੰਨਾ ਨਾਰਾਜ਼ ਹੋ ਗਿਆ ਕਿ ਉਸ ਨੇ ਫਲਾਈਟ ਦੇ ਕੈਪਟਨ 'ਤੇ ਹਮਲਾ ਕਰ ਦਿਤਾ। ਇਸ ਘਟਨਾ ਦਾ ਇਕ ਵੀਡੀਉ ਸੋਸ਼ਲ ਮੀਡੀਆ 'ਤੇ ਵਾਇਰਲ ਹੋ ਰਿਹਾ ਹੈ।
ਇਸ ਵੀਡੀਉ 'ਚ ਵਿਅਕਤੀ ਨੂੰ ਪਾਇਲਟ ਨੂੰ ਮੁੱਕੇ ਮਾਰਦੇ ਦੇਖਿਆ ਜਾ ਸਕਦਾ ਹੈ। ਹਵਾਬਾਜ਼ੀ ਸੁਰੱਖਿਆ ਏਜੰਸੀ ਨੇ ਘਟਨਾ ਦਾ ਨੋਟਿਸ ਲੈਂਦਿਆਂ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿਤੀ ਹੈ। ਦਸਿਆ ਜਾ ਰਿਹਾ ਹੈ ਕਿ ਇਹ ਘਟਨਾ ਉਦੋਂ ਵਾਪਰੀ ਜਦੋਂ ਪਾਇਲਟ ਮਾਈਕ੍ਰੋਫੋਨ 'ਤੇ ਯਾਤਰੀਆਂ ਨੂੰ ਧੁੰਦ ਕਾਰਨ ਦਿੱਲੀ ਤੋਂ ਗੋਆ ਜਾਣ ਵਾਲੀ ਫਲਾਈਟ ਦੇ ਲੇਟ ਹੋਣ ਦੀ ਜਾਣਕਾਰੀ ਦੇ ਰਿਹਾ ਸੀ। ਇਸ ਦੌਰਾਨ ਯਾਤਰੀ ਨੇ ਪਾਇਲਟ ਨੂੰ ਮੁੱਕਾ ਮਾਰ ਦਿਤਾ।
ਇਹ ਘਟਨਾ ਐਤਵਾਰ ਦੁਪਹਿਰ 1 ਵਜੇ ਵਾਪਰੀ। ਯਾਤਰੀ ਦੀ ਪਛਾਣ ਸਾਹਿਲ ਕਟਾਰੀਆ ਵਜੋਂ ਹੋਈ ਹੈ। ਇਸ ਘਟਨਾ 'ਤੇ ਦਿੱਲੀ ਪੁਲਿਸ ਨੇ ਕਿਹਾ, 'ਅਸੀਂ ਦੋਸ਼ੀਆਂ ਵਿਰੁਧ ਬਣਦੀ ਕਾਨੂੰਨੀ ਕਾਰਵਾਈ ਕਰਾਂਗੇ।' ਇੰਡੀਗੋ ਨੇ ਵੀ ਯਾਤਰੀ ਵਿਰੁਧ ਸ਼ਿਕਾਇਤ ਦਰਜ ਕਰਵਾਈ ਹੈ।
ਤਾਜ਼ਾ ਅਪਡੇਟਸ ਲਈ ਸਾਡੇ Whatsapp Broadcast Channel ਨਾਲ ਜੁੜੋ।
ਇਸ ਘਟਨਾ ਦਾ ਵੀਡੀਉ ਵਾਇਰਲ ਹੁੰਦੇ ਹੀ ਲੋਕਾਂ ਦੀਆਂ ਪ੍ਰਤੀਕਿਰਿਆਵਾਂ ਸਾਹਮਣੇ ਆਈਆਂ। ਇਕ ਯੂਜ਼ਰ ਨੇ ਕਿਹਾ, 'ਫਲਾਈਟ 'ਚ ਦੇਰੀ ਨੂੰ ਲੈ ਕੇ ਪਾਇਲਟ ਕੀ ਕਰ ਸਕਦਾ ਹੈ? ਉਹ ਬੱਸ ਅਪਣਾ ਕੰਮ ਕਰ ਰਿਹਾ ਸੀ। ਇਸ ਵਿਅਕਤੀ ਨੂੰ ਗ੍ਰਿਫਤਾਰ ਕਰਕੇ ਨੋ ਫਲਾਈ ਲਿਸਟ ਵਿਚ ਪਾ ਦਿਤਾ ਜਾਵੇ। ਉਸ ਦੀ ਤਸਵੀਰ ਜਨਤਕ ਕੀਤੀ ਜਾਣੀ ਚਾਹੀਦੀ ਹੈ, ਤਾਂ ਜੋ ਹੋਰ ਲੋਕਾਂ ਨੂੰ ਉਸ ਦੇ ਬੁਰੇ ਵਿਹਾਰ ਬਾਰੇ ਪਤਾ ਲੱਗ ਸਕੇ’। ਇਕ ਹੋਰ ਯੂਜ਼ਰ ਨੇ ਕਿਹਾ, 'ਇਸ ਵਿਅਕਤੀ 'ਤੇ ਹਮਲਾ ਕਰਨ ਦਾ ਮਾਮਲਾ ਦਰਜ ਹੋਣਾ ਚਾਹੀਦਾ ਹੈ। ਇਸ ਨੂੰ ਨੋ-ਫਲਾਈ ਲਿਸਟ 'ਚ ਰੱਖਿਆ ਜਾਣਾ ਚਾਹੀਦਾ ਹੈ। ਯਾਤਰੀ ਦਾ ਇਹ ਵਤੀਰਾ ਅਸਵੀਕਾਰਨਯੋਗ ਹੈ।
ਸੋਨੂੰ ਸੂਦ ਨੇ ਵੀ ਕੀਤਾ ਟਵੀਟ
ਅਦਾਕਾਸ ਸੋਨੂੰ ਸੂਦ ਨੇ ਵੀਡੀਉ ਸਾਂਝੀ ਕਰਦਿਆਂ ਲਿਖਿਆ, “ਜੇਕਰ ਲੋਕ ਅਜਿਹੇ ਬੇਤੁਕੇ ਤਰੀਕਿਆਂ ਨਾਲ ਵਿਵਹਾਰ ਕਰਦੇ ਰਹੇ ਤਾਂ ਜਲਦੀ ਹੀ ਏਅਰਲਾਈਨ ਸਟਾਫ਼ ਲਈ ਸਵੈ-ਰੱਖਿਆ ਸਿਖਲਾਈ ਪ੍ਰੋਗਰਾਮ ਲਾਜ਼ਮੀ ਹੋ ਜਾਣਗੇ!!”
(For more Punjabi news apart from Passenger hits IndiGo pilot at Delhi airport over flight delay , stay tuned to Rozana Spokesman)