ਨਵੀਂ ਦਿੱਲੀ : ਨਾਗਰਿਕ ਸੋਧ ਕਾਨੂੰਨ ਦੇ ਵਿਰੋਧ ਵਿਚ ਦਿੱਲੀ ਸਮੇਤ ਦੇਸ਼ ਦੇ ਕਈ ਵਿਦਿਅਕ ਅਦਾਰਿਆਂ ਅੰਦਰ ਰੋਸ ਪ੍ਰਦਰਸ਼ਨ ਹੋਏ ਹਨ। ਇਸ ਦੌਰਾਨ ਹੋਈਆਂ ਹਿੰਸਕ ਘਟਨਾਵਾਂ ਤੋਂ ਹਰ ਕੋਈ ਦੁਖੀ ਤੇ ਚਿੰਤਤ ਹੈ। ਇਨ੍ਹਾਂ ਰੋਸ ਪ੍ਰਦਰਸ਼ਨਾਂ ਸਬੰਧੀ ਪ੍ਰਸਿੱਧ ਅਦਾਕਾਰ ਰਿਤੀਕ ਰੋਸ਼ਨ ਨੇ ਟਵੀਟ ਰਾਹੀਂ ਚਿੰਤਾ ਦਾ ਪ੍ਰਗਟਾਵਾ ਕੀਤਾ ਹੈ।

ਅਪਣੇ ਟਵੀਟ ਰਾਹੀਂ ਰਿਤੀਕ ਰੋਸ਼ਨ ਨੇ ਵਿਦਿਆਰਥੀਆਂ ਦਾ ਜ਼ਿਕਰ ਕਰਦਿਆਂ ਕਿਹਾ ਕਿ ਇਕ ਪਿਤਾ ਤੇ ਭਾਰਤ ਦਾ ਭਾਰਤ ਦਾ ਨਾਗਰਿਕ ਹੋਣ ਦੇ ਨਾਤੇ ਮੈਂ ਦੇਸ਼ ਅੰਦਰਲੇ ਵਿਦਿਅਕ ਅਦਾਰਿਆਂ ਅੰਦਰ ਫੈਲੀ ਗੜਬੜੀ ਤੋਂ ਮੈਂ ਦੁਖੀ ਹਾਂ। ਮੈਂ ਅਰਦਾਸ ਕਰਦਾ ਹਾਂ ਕਿ ਇਨ੍ਹਾਂ ਸੰਸਥਾਵਾਂ ਅੰਦਰ ਛੇਤੀ ਤੋਂ ਛੇਤੀ ਸ਼ਾਂਤੀ ਸਥਾਪਤ ਹੋ ਜਾਵੇ।

ਉਨ੍ਹਾਂ ਅੱਗੇ ਲਿਖਿਆ ਕਿ ਕਈ ਵਾਰ ਮਹਾਨ ਆਗੂ ਤੇ ਅਧਿਆਪਕ ਵੀ ਅਪਣੇ ਵਿਦਿਆਰਥੀਆਂ ਤੋਂ ਸਿੱਖਦੇ ਹਨ। ਮੈਂ ਦੁਨੀਆਂ ਦੇ ਸੱਭ ਤੋਂ ਨੌਜਵਾਨ ਲੋਕਤੰਤਰ ਨੂੰ ਸਲਾਮ ਕਰਦਾ ਹਾਂ। ਆਪਣੇ ਟਵੀਟ ਜ਼ਰੀਏ ਜਿੱਥੇ ਉਨ੍ਹਾਂ ਨੇ ਵਿਦਿਆਰਥੀਆਂ ਦਾ ਸਮਰਥਨ ਕੀਤਾ ਉੱਥੇ ਦੇਸ਼ ਦੇ ਸਮੂਹ ਵਿਦਿਅਕ ਅਦਾਰਿਆ ਅੰਦਰ ਸ਼ਾਂਤੀ ਵਾਪਸੀ ਲਈ ਕਾਮਨਾ ਵੀ ਕੀਤੀ। ਰਿਤੀਕ ਰੋਸ਼ਨ ਦੇ ਇਸ ਟਵੀਟ ਦਾ ਲੋਕਾਂ ਵਲੋਂ ਭਰਪੂਰ ਸਮਰਥਨ ਕੀਤਾ ਜਾ ਰਿਹਾ ਹੈ।