...ਹੋਰ ਵਿਗੜੇਗਾ ਤੁਹਾਡੇ ਘਰ ਦਾ ਬਜਟ, ਪਿਆਜ਼ ਦਾਲਾਂ ਤੋਂ ਬਾਅਦ ਮਹਿੰਗੀ ਹੋਣ ਵਾਲੀ ਹੈ ਇਹ ਚੀਜ਼
ਮਹਿੰਗਾਈ ਜਲਦ ਹੀ ਤੁਹਾਡੇ ਘਰ ਦਾ ਬਜਟ ਹੋਰ ਜ਼ਿਆਦਾ ਵਿਗਾੜਨ ਵਾਲੀ ਹੈ।
ਨਵੀਂ ਦਿੱਲੀ- ਮਹਿੰਗਾਈ ਜਲਦ ਹੀ ਤੁਹਾਡੇ ਘਰ ਦਾ ਬਜਟ ਹੋਰ ਜ਼ਿਆਦਾ ਵਿਗਾੜਨ ਵਾਲੀ ਹੈ। ਦੇਸ਼ 'ਚ ਪਿਆਜ ਦੀਆਂ ਕੀਮਤਾਂ ਨੇ ਆਮ ਆਦਮੀ ਦੇ ਬਜਟ ਨੂੰ ਵਿਗਾੜ ਕੇ ਰੱਖ ਦਿੱਤਾ ਹੈ। ਭਾਰਤ 'ਚ ਚੀਨੀ ਉਤਪਾਦਨ 'ਚ ਗਿਰਾਵਟ ਦਰਜ ਕੀਤੀ ਗਈ ਹੈ। ਗ੍ਰਾਹਕ ਮੰਤਰਾਲੇ ਦਾ ਕਹਿਣਾ ਹੈ ਕਿ ਸਰਕਾਰ ਕੋਲ ਦਾਲਾਂ ਦਾ ਬਫਰ ਸਟਾਕ ਹੈ।
ਉਹ ਅਪਣੇ ਬਫਰ ਸਟਾਕ ਵਿਚੋਂ ਕਰੀਬ 8.5 ਲੱਖ ਮੀਟ੍ਰਿਕ ਟਨ ਦਾਲਾਂ ਖੁੱਲ੍ਹੇ ਬਜ਼ਾਰ ਵਿਚ ਵੇਚੇਗੀ, ਇਸ ਨਾਲ ਨਿਸ਼ਚਿਤ ਤੌਰ ‘ਤੇ ਦਾਲਾਂ ਦੀਆਂ ਕੀਮਤਾਂ ਘਟ ਜਾਣਗੀਆਂ ਪਰ ਹੁਣ ਚੀਨੀ ਦੀਆਂ ਕੀਮਤਾਂ ਵਧਣ ਦਾ ਸ਼ੱਕ ਹੈ। ਚਾਲੂ ਵਿੱਤੀ ਵਰ੍ਹੇ 'ਚ 15 ਦਸੰਬਰ ਤਕ ਦੇਸ਼ ਦਾ ਚੀਨੀ ਉਤਪਾਦਨ 35% ਦੀ ਗਿਰਾਵਟ ਨਾਲ 4.58 ਮਿਲੀਅਨ ਟਨ 'ਤੇ ਆ ਗਿਆ ਹੈ।
ਚੀਨੀ ਉਤਪਾਦਨ 'ਚ ਇਹ ਕਮੀ ਮਹਾਰਾਸ਼ਟਰ ਅਤੇ ਕਰਨਾਟਕ ਤੋਂ ਹੋਣ ਵਾਲੇ ਉਤਪਾਦਨ 'ਚ ਤੇਜ਼ੀ ਨਾਲ ਆਈ ਗਿਰਾਵਟ ਕਾਰਨ ਹੋਈ ਹੈ। ਇਹ ਜਾਣਕਾਰੀ ਭਾਰਤੀ ਚੀਨੀ ਮਿੱਲ ਐਸੋਸੀਏਸ਼ਨ (ਇਸਮਾ) ਨੇ ਦਿੱਤੀ। 2018-19 ਦੇ ਮਾਰਕੀਟਿੰਗ ਸਾਲ 'ਚ ਮਿਲਾਂ ਨੇ ਇਸ ਦੌਰਾਨ 70.5 ਲੱਖ ਟਨ ਖੰਡ ਦਾ ਉਤਪਾਦਨ ਕੀਤਾ ਸੀ।
ਸ਼ੂਗਰ ਮਾਰਕੀਟਿੰਗ ਸਾਲ ਅਕਤੂਬਰ ਤੋਂ ਸਤੰਬਰ ਤੱਕ ਚੱਲਦਾ ਹੈ। ਇਸਮਾ ਮੁਤਾਬਕ, 15 ਦਸੰਬਰ ਨੂੰ 406 ਖੰਡ ਮਿੱਲਾਂ ਗੰਨੇ ਦੀ ਪਿੜਾਈ ਕਰ ਰਹੀਆਂ ਸਨ, ਜਦੋਂ ਕਿ ਪਿਛਲੇ ਸਾਲ ਇਸੇ ਦਿਨ 473 ਮਿੱਲਾਂ ਚਾਲੂ ਸਨ। ਦੇਸ਼ ਦੇ ਸਭ ਤੋਂ ਵੱਡੇ ਖੰਡ ਉਤਪਾਦਕ ਉੱਤਰ ਪ੍ਰਦੇਸ਼ 'ਚ ਮਿੱਲਾਂ ਨੇ 15 ਦਸੰਬਰ ਤੱਕ 21.2 ਲੱਖ ਟਨ ਖੰਡ ਦਾ ਉਤਪਾਦਨ ਕੀਤਾ ਹੈ, ਜੋ ਪਿਛਲੇ ਸਾਲ ਦੀ ਇਸ ਮਿਆਦ 'ਚ 18.9 ਲੱਖ ਟਨ ਤੋਂ ਵੱਧ ਹੈ।
ਯੂ. ਪੀ. ਮਿੱਲਾਂ ਨੇ ਚਾਲੂ ਸੀਜ਼ਨ 'ਚ ਇਕ ਹਫ਼ਤਾ ਪਹਿਲਾਂ ਪਿੜਾਈ ਸ਼ੁਰੂ ਕਰ ਦਿੱਤੀ ਸੀ। ਹਾਲਾਂਕਿ ਦੂਜੇ ਸਭ ਤੋਂ ਵੱਡੇ ਖੰਡ ਉਤਪਾਦਕ ਮਹਾਰਾਸ਼ਟਰ 'ਚ ਉਤਪਾਦਨ 'ਚ ਭਾਰੀ ਗਿਰਾਵਟ ਆਈ ਹੈ। ਮਹਾਰਸ਼ਟਰ 'ਚ ਮਿੱਲਾਂ ਨੇ ਪਿਛਲੇ ਸਾਲ ਦੇ 29 ਲੱਖ ਟਨ ਦੀ ਤੁਲਨਾ 'ਚ ਇਸ ਵਾਰ ਹੁਣ ਤਕ ਸਿਰਫ 7,66,000 ਟਨ ਉਤਪਾਦਨ ਕੀਤਾ ਹੈ।
ਇਸੇ ਤਰ੍ਹਾਂ ਤੀਜੇ ਸਭ ਤੋਂ ਵੱਡੇ ਖੰਡ ਉਤਪਾਦਕ ਸੂਬੇ ਕਰਨਾਟਕ ਨੇ ਇਸ ਸਾਲ 15 ਦਸੰਬਰ ਤਕ 10.6 ਲੱਖ ਟਨ ਉਤਪਾਦਨ ਕੀਤਾ ਹੈ, ਜੋ ਪਿਛਲੀ ਵਾਰ ਇਸ ਦੌਰਾਨ 13.9 ਲੱਖ ਟਨ ਸੀ।
Punjabi News ਨਾਲ ਜੁੜੀ ਹੋਰ ਅਪਡੇਟ ਲਗਾਤਾਰ ਹਾਸਲ ਕਰਨ ਲਈ ਸਾਨੂੰ Facebook ਤੇ ਲਾਈਕ Twitter ਤੇ follow ਕਰੋ।