Rahul Gandhi

ਨਵੀਂ ਦਿੱਲੀ: ਕਾਂਗਰਸ ਦੇ ਸੰਸਦ ਮੈਂਬਰ ਰਾਹੁਲ ਗਾਂਧੀ ਮੰਗਲਵਾਰ ਨੂੰ ਸੰਸਦ ਭਵਨ ਦੇ ਬਾਹਰ ਇਕ ਮੀਡੀਆ ਕਰਮੀ 'ਤੇ ਵਰ੍ਹੇ। ਆਪਣੇ ਟਵੀਟ ਨੂੰ ਲੈ ਕੇ ਹੋਏ ਸਵਾਲ 'ਤੇ ਰਾਹੁਲ ਨੇ ਪੱਤਰਕਾਰ ਨੂੰ ਕਿਹਾ ਕਿ ਤੁਸੀਂ ਸਰਕਾਰ ਦੀ ਦਲਾਲੀ ਕਰ ਰਹੇ ਹੋ, ਇਸ ਨੂੰ ਬੰਦ ਕਰੋ।

ਰਾਹੁਲ ਗਾਂਧੀ ਨੂੰ ਗੁੱਸੇ 'ਚ ਦੇਖ ਕੇ ਕਾਂਗਰਸ ਦੇ ਸੀਨੀਅਰ ਨੇਤਾ ਮਲਿਕਾਰਜੁਨ ਖੜਗੇ ਅਤੇ ਸ਼ਿਵ ਸੈਨਾ ਦੇ ਸੰਜੇ ਰਾਉਤ ਨੇ ਉਹਨਾਂ ਨੂੰ ਸ਼ਾਂਤ ਕੀਤਾ। ਰਾਹੁਲ ਗਾਂਧੀ ਦੇ ਰਿਪੋਰਟਰ ’ਤੇ ਗੁੱਸਾ ਕਰਨ ਦਾ ਇਹ ਵੀਡੀਓ ਸੋਸ਼ਲ ਮੀਡੀਆ 'ਤੇ ਕਾਫੀ ਸ਼ੇਅਰ ਕੀਤਾ ਜਾ ਰਿਹਾ ਹੈ।

ਦੱਸ ਦਈਏ ਕਿ ਲਖੀਮਪੁਰ ਖੇੜੀ ਮਾਮਲੇ 'ਚ ਗ੍ਰਹਿ ਰਾਜ ਮੰਤਰੀ ਅਜੇ ਕੁਮਾਰ ਮਿਸ਼ਰਾ ਦੇ ਅਸਤੀਫੇ ਦੀ ਮੰਗ ਨੂੰ ਲੈ ਕੇ ਰਾਹੁਲ ਗਾਂਧੀ ਸਮੇਤ ਵਿਰੋਧੀ ਧਿਰ ਦੇ ਸੰਸਦ ਮੈਂਬਰਾਂ ਨੇ ਅੱਜ ਗਾਂਧੀ ਬੁੱਤ ਤੋਂ ਵਿਜੇ ਚੌਕ ਤੱਕ ਮਾਰਚ ਕੱਢਿਆ। ਮਾਰਚ ਤੋਂ ਬਾਅਦ ਰਾਹੁਲ ਨੇ ਮੀਡੀਆ ਨਾਲ ਗੱਲਬਾਤ ਕੀਤੀ। ਇਸ 'ਚ ਉਹਨਾਂ ਕਿਹਾ ਕਿ ਉਹ ਅਜੇ ਮਿਸ਼ਰਾ ਬਾਰੇ ਸਵਾਲਾਂ ਦੇ ਜਵਾਬ ਹੀ ਦੇਣਗੇ।

ਉਹ ਮੀਡੀਆ ਨਾਲ ਗੱਲ ਕਰਨ ਜਾ ਰਹੇ ਸਨ ਜਦੋਂ ਇਕ ਪੱਤਰਕਾਰ ਨੇ ਰਾਹੁਲ ਦੇ ਉਸ ਟਵੀਟ 'ਤੇ ਸਵਾਲ ਕੀਤਾ, ਜਿਸ ਵਿਚ ਉਹਨਾਂ ਕਿਹਾ ਹੈ ਕਿ ਲੋਕਾਂ ਨੇ 2014 ਵਿਚ ਨਰਿੰਦਰ ਮੋਦੀ ਦੀ ਸਰਕਾਰ ਆਉਣ ਤੋਂ ਬਾਅਦ ਹੀ ਲਿੰਚਿੰਗ ਬਾਰੇ ਸੁਣਿਆ ਹੈ। ਰਿਪੋਰਟਰ ਦੇ ਸਵਾਲ ਨੂੰ ਮੁੱਦੇ ਤੋਂ ਮੋੜਨ ਵਾਲਾ ਦੱਸਦਿਆਂ ਰਾਹੁਲ ਨੇ ਕਿਹਾ ਕਿ ਤੁਹਾਨੂੰ ਸਰਕਾਰ ਦੀ ਦਲਾਲੀ ਬੰਦ ਕਰਨੀ ਚਾਹੀਦੀ ਹੈ। ਇਸ ਤੋਂ ਬਾਅਦ ਰਾਹੁਲ ਗਾਂਧੀ ਉਥੋਂ ਚਲੇ ਗਏ।