ਚੋਣ ਪ੍ਰਚਾਰ ਲਈ ਪਹੁੰਚੇ ਭਾਜਪਾ ਸਾਂਸਦ, ਪਿੰਡ ਵਾਲਿਆਂ ਨੇ ਭਜਾ ਦਿਤੇ
ਭਾਰਤੀ ਜਨਤਾ ਪਾਰਟੀ ਦਾ ਕਹਿਣਾ ਹੈ ਕਿ ਇਹ ਵਿਰੋਧ ਨਹੀਂ ਸਾਜ਼ਿਸ਼ ਦਾ ਹਿੱਸਾ
ਸਤਨਾ: ਮੱਧ ਪ੍ਰਦੇਸ਼ ਦੇ ਸਤਨਾ ਲੋਕਸਭਾ ਹਲਕੇ ਤੋਂ 3 ਵਾਰ ਸਾਂਸਦ ਅਤੇ ਚੌਥੀ ਵਾਰ ਭਾਜਪਾ ਦੇ ਉਮੀਦਵਾਰ ਗਣੇਸ਼ ਸਿੰਘ ਸੋਮਵਾਰ ਨੂੰ ਲੋਕਾਂ ’ਚ ਵਿਚਰਨ ਲਈ ਪਹੁੰਚੇ, ਜਿਸ ਦੌਰਾਨ ਗਣੇਸ਼ ਸਿੰਘ ਨੂੰ ਨੌਜਵਾਨਾਂ ਨੇ ਨਾਗੌਦ ਦੇ ਬੜਖੇਰ ਪਿੰਡ ਵਿਚ ਵੜਨ ਨਹੀਂ ਦਿਤਾ।
ਦੱਸਿਆ ਜਾ ਰਿਹਾ ਹੈ ਕਿ ਚੋਣ ਪ੍ਰਚਾਰ ਦੇ ਲਈ ਜਦੋਂ ਗਣੇਸ਼ ਸਿੰਘ ਨਾਗੌਦ ਵਿਧਾਨਸਭਾ ਦੇ ਬੜਖੇਰ ਪਿੰਡ ਪਹੁੰਚੇ ਤਾਂ ਉੱਥੇ ਦਰਜਨ ਦੇ ਕਰੀਬ ਨੌਜਵਾਨਾਂ ਨੇ ਸਾਂਸਦ ਦੀ ਗੱਡੀ ਪਿੰਡ ਦੇ ਬਾਹਰ ਦੀ ਰੋਕ ਦਿਤੀ ਤੇ ਗਣੇਸ਼ ਸਿੰਘ ਵਾਪਸ ਜਾਓ ਦੇ ਨਾਅਰੇ ਲਗਾਉਣ ਲੱਗੇ।
ਉੱਥੇ ਹੀ ਭਾਰਤੀ ਜਨਤਾ ਪਾਰਟੀ ਦਾ ਕਹਿਣਾ ਹੈ ਕਿ ਇਹ ਵਿਰੋਧ ਨਹੀਂ ਸਾਜ਼ਿਸ਼ ਦਾ ਹਿੱਸਾ ਹੈ। ਇਸ ਬਾਰੇ ਭਾਜਪਾ ਦੇ ਜ਼ਿਲ੍ਹਾ ਪ੍ਰਧਾਨ ਨਰੇਂਦਰ ਤ੍ਰਿਪਾਠੀ ਨੇ ਕਿਹਾ ਕਿ ਵੀਡੀਓ ਵੇਖਣ ਕੇ ਸਾਫ਼ ਪਤਾ ਲੱਗਦਾ ਹੈ ਕਿ ਇਹ ਕੋਈ ਪਿੰਡ ਵਾਲਿਆਂ ਦਾ ਵਿਰੋਧ ਨਹੀਂ ਹੈ।
ਪਿੰਡ ਵਿਚ ਲਗਭੱਗ 12 ਸੌ ਲੋਕ ਰਹਿੰਦੇ ਹਨ ਜੇਕਰ ਉਨ੍ਹਾਂ ਦਾ ਵਿਰੋਧ ਹੁੰਦਾ ਤਾਂ ਘੱਟ ਤੋਂ ਘੱਟ 3-4 ਸੌ ਲੋਕ ਵਿਰੋਧ ਕਰਦੇ। ਸਿਰਫ਼ 7-8 ਨੌਜਵਾਨ ਹੀ ਵਿਰੋਧ ਕਿਉਂ ਕਰਨ ਆਏ ਹਨ, ਇਹ ਕਿਸੇ ਦੀ ਸਾਜ਼ਿਸ਼ ਦਾ ਹਿੱਸਾ ਹੈ।
ਦੱਸ ਦਈਏ ਕਿ ਭਾਜਪਾ ਉਮੀਦਵਾਰ ਗਣੇਸ਼ ਸਿੰਘ ਵਿਰੁਧ ਇਸ ਵਾਰ ਕਾਂਗਰਸ ਤੋਂ ਰਾਜਰਾਮ ਤ੍ਰਿਪਾਠੀ ਚੋਣ ਮੈਦਾਨ ਵਿਚ ਉਤਰੇ ਹਨ। ਦੋਵਾਂ ਉਮੀਦਵਾਰਾਂ ਦੇ ਵਿਚ ਜ਼ਬਰਦਸਤ ਮੁਕਾਬਲਾ ਦੱਸਿਆ ਜਾ ਰਿਹਾ ਹੈ।