ਨਵੀਂ ਦਿੱਲੀ: ਕੇਂਦਰੀ ਰੱਖਿਆ ਮੰਤਰੀ ਰਾਜਨਾਥ ਸਿੰਘ ਨੇ ਧਾਰਾ 370 ਨੂੰ ਕੈਂਸਰ ਦੱਸਿਆ ਹੈ। ਬਿਹਾਰ ਦੀ ਰਾਜਧਾਨੀ ਪਟਨਾ ਵਿਚ ਧਾਰਾ 370 ‘ਤੇ ਸੰਬੋਧਨ ਕਰ ਰਹੇ ਰਾਜਨਾਥ ਸਿੰਘ ਕਿਹਾ ਕਿ ਧਾਰਾ 370 ਅਜਿਹਾ ਕੈਂਸਰ ਸੀ ਜਿਸ ਨੇ ਕਸ਼ਮੀਰ ਦਾ ਬਹੁਤ ਖੂਨ ਬਹਾਇਆ ਹੈ। ਜੰਮੂ ਕਸ਼ਮੀਰ ਦੀ ਤਿੰਨ ਚੌਥਾਈ ਜਨਤਾ ਧਾਰਾ 370 ਦੀਆਂ ਜ਼ਿਆਦਾਤਰ ਧਾਰਾਵਾਂ ਨੂੰ ਖਤਮ ਕਰਨ ਦੇ ਹੱਕ ਵਿਚ ਸੀ। ਉਹਨਾਂ ਨੇ ਕਿਹਾ ਕਿ ਦੇਖਦੇ ਹਾਂ ਕਿ ਪਾਕਿਸਤਾਨ ਕਿੰਨੇ ਅਤਿਵਾਦੀ ਭੇਜ ਸਕਦਾ ਹੈ, ਕੋਈ ਵਾਪਸ ਨਹੀਂ ਜਾ ਸਕੇਗਾ।

ਪਟਨਾ ਵਿਚ ਭਾਜਪਾ ਦੀ ਜਨ ਜਾਗਰਣ ਸਭਾ ਵਿਚ ਰਾਜਨਾਥ ਸਿੰਘ ਨੇ ਕਿਹਾ ਕਿ ਉਮੀਦ ਕਰਦੇ ਹਾਂ ਕਿ ਪਾਕਿਸਤਾਨ 1965 ਅਤੇ 1971 ਦੀਆਂ ਗਲਤੀਆਂ ਨੂੰ ਨਹੀਂ ਦੁਹਰਾਏਗਾ, ਹੁਣ ਉਸ ਦੇ ਨਾਲ ਗੱਲਬਾਤ ਸਿਰਫ਼ ਪੀਓਕੇ ‘ਤੇ ਹੀ ਹੋਵੇਗੀ। ਉਹਨਾਂ ਕਿਹਾ ਕਿ ਭਾਜਪਾ ਨੇ ਅਪਣਾ ਰੁਖ ਕਦੀ ਵੀ ਨਰਮ ਨਹੀਂ ਕੀਤਾ, ਧਾਰਾ 370 ਨੂੰ ਖਤਮ ਕਰਨਾ ਸਾਬਿਤ ਕਰਦਾ ਹੈ ਕਿ ਪਾਰਟੀ ਇਮਾਨਦਾਰ ਅਤੇ ਭਰੋਸੇਯੋਗ ਹੈ।

ਉਹਨਾਂ ਨੇ ਸਪੱਸ਼ਟ ਸ਼ਬਦਾਂ ਵਿਚ ਕਿਹਾ ਕਿ ਇਕ ਦੇਸ਼ ਦੇ ਅਤਿਵਾਦੀ ਨੂੰ ਦੂਜੇ ਦੇਸ਼ ਵਿਚ ਸੁਤੰਤਰਤਾ ਸੈਨਾਨੀ ਨਹੀਂ ਮੰਨਿਆ ਜਾ ਸਕਦਾ ਹੈ। ਰੱਖਿਆ ਮੰਤਰੀ ਨੇ ਕਿਹਾ ਕਿ ਧਾਰਾ 370 ਨੂੰ ਹਟਾਉਣਾ ਇਕ ਸੁਪਨਾ ਸੀ, ਜਿਸ ਨੂੰ ਪੀਐਮ ਮੋਦੀ ਨੇ ਸੱਚ ਕਰ ਕੇ ਦਿਖਾਇਆ ਹੈ। ਉਹਨਾਂ ਕਿਹਾ ਕਿ ਕਸ਼ਮੀਰ ਵਿਚ ਅਤਿਵਾਦ ਦਾ ਮੁੱਖ ਕਾਰਨ ਧਾਰਾ 370 ਅਤੇ ਧਾਰਾ 35 ਏ ਸੀ। ਇਸ ਅਤਿਵਾਦ ਨੇ ਕਸ਼ਮੀਰ ਨੂੰ ਲਹੂ-ਲੁਹਾਣ ਕਰ ਦਿੱਤਾ।

Punjabi News  ਨਾਲ ਜੁੜੀ ਹੋਰ ਅਪਡੇਟ ਲਗਾਤਾਰ ਹਾਸਲ ਕਰਨ ਲਈ ਸਾਨੂੰ  Facebook ਤੇ ਲਾਈਕ Twitter  ਤੇ follow ਕਰੋ।