file photo

 ਨਵੀਂ ਦਿੱਲੀ: ਪਛਮੀ ਬੰਗਾਲ 'ਚ ਚੱਕਰਵਾਤ ਅੱਫ਼ਾਨ ਕਰ ਕੇ ਮਰਨ ਵਾਲਿਆਂ ਦੀ ਗਿਣਤੀ ਵੱਧ ਕੇ 85 ਹੋ ਗਈ ਹੈ। ਜਦਕਿ ਕੋਲਕਾਤਾ 'ਚ ਨਾਰਾਜ਼ ਲੋਕਾਂ ਨੇ ਤਿੰਨ ਦਿਨਾਂ ਬਾਅਦ ਵੀ ਸਥਿਤੀ ਆਮ ਕਰ ਸਕਣ 'ਚ ਪ੍ਰਸ਼ਾਸਨ ਦੀ ਅਸਫ਼ਲਤਾ ਵਿਰੁਧ ਪ੍ਰਦਰਸ਼ਨ ਕੀਤਾ ਅਤੇ ਸ਼ਹਿਰ ਦੇ ਵੱਖੋ-ਵੱਖ ਹਿੱਸਿਆਂ 'ਚ ਸੜਕਾਂ ਰੋਕ ਦਿਤੀਆਂ।

ਚੱਕਰਵਾਤ ਕਰ ਕੇ ਆਮ ਜੀਵਨ ਬੁਰੀ ਤਰ੍ਹਾਂ ਪ੍ਰਭਾਵਤ ਹੋਣ ਮਗਰੋਂ ਪ੍ਰਸ਼ਾਸਨ ਦੇ ਸਾਰੇ ਅਧਿਕਾਰੀ ਸੂਬੇ ਦੇ ਵੱਖੋ-ਵੱਖ ਹਿੱਸਿਆਂ 'ਚ ਸਥਿਤੀ ਨੂੰ ਆਮ ਵਾਂਗ ਕਰਨ 'ਚ ਲੱਗੇ ਹੋਏ ਹਨ। ਪਛਮੀ ਬੰਗਾਲ ਦੀ ਮੁੱਖ ਮੰਤਰੀ ਮਮਤਾ ਬੈਨਰਜੀ ਨੇ ਰੇਲ ਮੰਤਰਾਲੇ ਨੂੰ ਚੱਕਰਵਾਤੀ 'ਅੱਫ਼ਾਨ' ਦੇ ਮੱਦੇਨਜ਼ਰ 26 ਮਈ ਤਕ ਸੂਬੇ 'ਚ 'ਸ਼ਰਮਿਕ ਵਿਸ਼ੇਸ਼ ਟਰੇਨਾਂ' ਨੂੰ ਨਾ ਭੇਜਣ ਲਈ ਕਿਹਾ ਹੈ।

ਸੂਬੇ ਦੇ ਮੁੱਖ ਸਕੱਤਰ ਰਾਜੀਵ ਸਿਨਹਾ ਵਲੋਂ ਰੇਲਵੇ ਬੋਰਡ ਦੇ ਮੁਖੀ ਵੀ.ਕੇ. ਯਾਦਵ ਨੂੰ 22 ਮਈ ਨੂੰ ਲਿਖੀ ਚਿੱਠੀ 'ਚ ਕਿਹਾ ਗਿਆ ਹੈ ਕਿ ਜ਼ਿਲ੍ਹਾ ਪ੍ਰਸ਼ਾਸਨ ਰਾਹਤ ਅਤੇ ਮੁੜਵਸੇਬਾ ਕੰਮਾਂ 'ਚ ਰੁੱਝਾ ਹੋਇਆ ਹੈ।

ਇਸ ਲਈ ਅਗਲੇ ਕੁੱਝ ਦਿਨਾਂ ਤਕ ਵਿਸ਼ੇਸ਼ ਰੇਲ ਗੱਡੀਆਂ ਦੇ ਪਛਮੀ ਬੰਗਾਲ 'ਚ ਪਹੁੰਚਣ 'ਤੇ ਓਨਾ ਧਿਆਨ ਦੇਣਾ ਸੰਭਵ ਨਹੀਂ ਹੋਵੇਗਾ। ਇਸ ਲਈ ਇਹ ਅਪੀਲ ਕੀਤੀ ਜਾਂਦੀ ਹੈ ਕਿ 26 ਮਈ ਤਕ ਕੋਈ ਵੀ ਰੇਲ ਗੱਡੀ ਪਛਮੀ ਬੰਗਾਲ ਨਾ ਭੇਜੀ ਜਾਵੇ।

ਸੂਬੇ ਦੀ ਸਰਕਾਰ ਨੇ ਚੱਕਰਵਾਤੀ ਤੂਫਾਨ ਅਮਫਾਨ ਨਾਲ ਪ੍ਰਭਾਵਿਤ ਇਲਾਕਿਆਂ 'ਚ ਜ਼ਰੂਰੀ ਸੇਵਾਵਾਂ ਨੂੰ ਫਿਰ ਤੋਂ ਬਹਾਲ ਕਰਨ ਲਈ ਸੈਨਾ ਦੀ ਮਦਦ ਵੀ ਮੰਗੀ ਹੈ। ਪੱਛਮੀ ਬੰਗਾਲ ਨੇ ਰੇਲਵੇ ਬੰਦਰਗਾਹ ਅਤੇ ਨਿਜੀ ਸੰਸਥਾਨਾਂ ਤੋਂ ਚੱਕਰਵਾਤੀ ਪ੍ਰਭਾਵਿਤ ਇਲਾਕਿਆਂ 'ਚ ਜਰੂਰੀ ਸੇਵਾਵਾਂ ਬਹਾਲ ਕਰਨ ਦੀ ਮਦਦ ਮੰਗੀ ਹੈ।

ਪੱਛਮੀ ਬੰਗਾਲ 'ਚ ਬੁੱਧਵਾਰ ਸ਼ਾਮ ਨੂੰ 130 ਕਿਲੋਮੀਟਰ ਪ੍ਰਤੀ ਘੰਟੇ ਦੀ ਰਫਤਾਰ ਨਾਲ ਆਏ ਭਿਆਨਕ ਚੱਕਰਵਾਤੀ ਤੂਫਾਨ ਅਮਫਾਨ ਦੇ ਕਾਰਨ ਹਜ਼ਾਰਾਂ ਲੋਕ ਬੇਘਰ ਹੋ ਚੁੱਕੇ ਹਨ। ਅੱਫਾਨ ਨੇ ਸੂਬੇ ਦੇ ਕਈ ਹਿੱਸਿਆਂ 'ਚ ਕਹਿਰ ਵਰਸਾਇਆ ਹੈ। ਸੂਤਰਾਂ ਮੁਤਾਬਕ ਸੂਬੇ ਦੇ ਲਗਭਗ 1.5 ਕਰੋੜ ਲੋਕ ਸਿੱਧੇ ਤੌਰ 'ਤੇ ਪ੍ਰਭਾਵਤ ਹੋਏ ਹਨ ਅਤੇ ਚੱਕਰਵਾਤ ਕਰ ਕੇ 10 ਲੱਖ ਤੋਂ ਜ਼ਿਆਦਾ ਘਰ ਬਰਬਾਦ ਹੋ ਗਏ।

ਰਾਜਧਾਨੀ ਕੋਲਕਾਤਾ ਸ਼ਹਿਰ ਦੇ ਵੱਖ-ਵੱਖ ਹਿੱਸਿਆਂ 'ਚ ਬਿਜਲੀ ਦੀ ਸਪਲਾਈ, ਬ੍ਰਾਂਡਬੈਂਡ ਸੇਵਾਵਾਂ ਅਤੇ ਮੋਬਾਇਲ ਨੈੱਟਵਰਕ ਵੀ ਬੁਰੀ ਤਰ੍ਹਾਂ ਨਾਲ ਪ੍ਰਭਾਵਿਤ ਹੋਏ ਹਨ। ਕੋਲਕਾਤਾ ਨਗਰ ਨਿਗਮ ਦੇ ਮੁਤਾਬਕ ਪੂਰੇ ਸ਼ਹਿਰ 'ਚ 5000 ਤੋਂ ਜ਼ਿਆਦਾ ਰੁੱਖ ਤਬਾਹ ਹੋਏ ਹਨ ਅਤੇ ਬਿਜਲੀ ਦੇ ਖੰਭੇ ਵੀ ਨੁਕਸਾਨੇ ਗਏ ਹਨ।

Punjabi News  ਨਾਲ ਜੁੜੀ ਹੋਰ ਅਪਡੇਟ ਲਗਾਤਾਰ ਹਾਸਲ ਕਰਨ ਲਈ ਸਾਨੂੰ  Facebook  ਤੇ ਲਾਈਕ Twitter  ਤੇ follow  ਕਰੋ।