monsoon likely to hit kerala in 4 days

ਨਵੀਂ ਦਿੱਲੀ : ਭਿਆਨਕ ਗਰਮੀ ਕਾਰਨ ਲੋਕਾਂ ਦਾ ਬੁਰਾ ਹਾਲ ਹੋ ਰਿਹਾ ਹੈ। ਪਾਰਾ ਇੰਨਾ ਜ਼ਿਆਦਾ ਵਧ ਚੁੱਕਿਆ ਹੈ ਕਿ ਲੋਕਾਂ ਦਾ ਬਾਹਰ ਨਿਕਲਣਾ ਔਖਾ ਹੋਇਆ ਪਿਆ ਹੈ। ਇਸ ਭਿਆਨਕ ਗਰਮੀ ਤੋਂ ਰਾਹਤ ਦੀ ਉਮੀਦ ਲਗਾਏ ਬੈਠੇ ਲੋਕਾਂ ਖ਼ਾਸ ਕਰ ਕੇ ਕਿਸਾਨਾਂ ਲਈ ਚੰਗੀ ਖ਼ਬਰ ਹੈ। ਇਸ ਵਾਰ ਮਾਨਸੂਨ ਸਮੇਂ ਤੋਂ ਪਹਿਲਾਂ ਦਸਤਕ ਦੇ ਸਕਦਾ ਹੈ। ਭਾਰਤੀ ਮੌਸਮ ਵਿਭਾਗ ਨੇ ਦਸਿਆ ਹੈ ਕਿ ਦੱਖਣ-ਪੱਛਮ ਮਾਨਸੂਨ ਸ਼ੁਕਰਵਾਰ ਨੂੰ ਦਖਣ ਅੰਡੇਮਾਨ ਸਾਗਰ ਵਿਚ ਪਹੁੰਚ ਗਿਆ ਅਤੇ ਇਸ ਦੇ ਅਗਲੇ ਚਾਰ ਦਿਨਾਂ ਵਿਚ ਕੇਰਲ ਪਹੁੰਚਣ ਦੀ ਸੰਭਾਵਨਾ ਹੈ।

ਜੇਕਰ ਇਹ ਭਵਿੱਖਬਾਣੀ ਬਰਕਰਾਰ ਰਹਿੰਦੀ ਹੈ ਤਾਂ ਇਸ ਸਾਲ ਮਾਨਸੂਨ ਅਪਣੀ ਆਮ ਤਰੀਕ ਤੋਂ ਘੱਟ ਤੋਂ ਘੱਟ 3 ਦਿਨ ਪਹਿਲਾਂ ਆਏਗਾ।  ਉਮੀਦ ਪ੍ਰਗਟਾਈ ਜਾ ਰਹੀ ਹੈ ਕਿ ਅਗਲੇ ਮਹੀਨੇ ਦੇ ਸ਼ੁਰੂ ਵਿਚ ਦੱਖਣ ਭਾਰਤੀ ਦੇ ਕਈ ਹਿੱਸਿਆਂ ਵਿਚ ਬਾਰਿਸ਼ ਹੋ ਸਕਦੀ ਹੈ। ਹਾਲਾਂਕਿ ਮੌਸਮ ਦੀ ਭਵਿੱਖਬਾਣੀ ਕਰਨ ਵਾਲੀਆਂ ਆਜ਼ਾਦ ਏਜੰਸੀਆਂ ਦਾ ਕਹਿਣਾ ਹੈ ਕਿ ਮਜ਼ਬੂਤ ਸ਼ੁਰੂਆਤ ਤੋਂ ਬਾਅਦ ਦੇਸ਼ ਦੇ ਕਈ ਹਿੱਸਿਆਂ ਵਿਚ ਹੜ੍ਹ ਅਤੇ ਸੋਕਾ ਪੈਣ ਦਾ ਸ਼ੱਕ ਵਧ ਗਿਆ ਹੈ। ਖ਼ਾਸ ਤੌਰ 'ਤੇ ਖੇਤੀ ਦੇ ਲਿਹਾਜ ਨਾਲ ਮਹੱਤਵਪੂਰਨ ਜੁਲਾਈ ਅਤੇ ਅਗੱਸਤ ਦੇ ਮਹੀਨਿਆਂ ਵਿਚ ਇਸ ਦਾ ਖ਼ਤਰਾ ਜ਼ਿਆਦਾ ਹੈ। 

ਪ੍ਰਾਈਵੇਟ ਫਾਰਕਾਸਟਰ ਨੇ ਭਲੇ ਹੀ ਚੌਕਸ ਰਹਿਣ ਲਈ ਕਿਹਾ ਹੋਵੇ ਪਰ ਆਈਐਮਡੀ ਦੇ ਨਿਦੇਸ਼ਕ ਡੀ ਐਸ ਪਈ ਦਾ ਕਹਿਣਾ ਹੈ ਕਿ ਮਾਨਸੂਨੀ ਬਾਰਿਸ਼ ਦੇਸ਼ ਦੇ ਵੱਖ-ਵੱਖ ਹਿੱਸਿਆਂ ਵਿਚ ਕਿਵੇਂ ਹੋਵੇਗੀ, ਇਸ ਦੀ ਭਵਿੱਖਬਾਣੀ ਕਰਨਾ ਅਜੇ ਜਲਦਬਾਜ਼ੀ ਹੋਵੇਗੀ। ਅਮਰੀਕਾ ਸਥਿਤ ਕਮਰਸ਼ਲ ਫਾਰਕਾਸਟਰ ਨੇ ਕਿਹਾ ਕਿ ਮਿਡ ਸੀਜ਼ਨ ਬਾਰਿਸ਼ ਅਨਿਯਮਤ ਹੋਵੇਗੀ। ਆਸਮਾਨ ਤੋਂ ਸੋਕਾ ਅਤੇ ਹੜ੍ਹ ਦਾ ਖ਼ਤਰਾ ਰਹੇਗਾ। 

ਏਜੰਸੀ ਦੇ ਮੁਖੀ ਸੰਸਾਰਕ ਮੌਸਮ ਵਿਗਿਆਨੀ ਜੇਸਨ ਨਿਕਾਲਸ ਨੇ ਕਿਹਾ ਕਿ ਅਸੀਂ ਉਮੀਦ ਕਰ ਰਹੇ ਹਾਂ ਕਿ ਦੱਖਣ ਪੱਛਮ ਮਾਨਸੂਨ ਜੁਲਾਈ ਅਤੇ ਅਗੱਸਤ ਦੇ ਮਹੀਨੇ ਜ਼ਿਆਦਾ ਅਸਥਿਰ ਹੋਵੇਗਾ। ਜੇਸਨ ਨੇ ਭਵਿੱਖਬਾਣੀ ਕੀਤੀ ਹੈ ਕਿ ਓਡੀਸ਼ਾ, ਪੱਛਮ ਬੰਗਾਲ ਅਤੇ ਯੂਪੀ ਅਤੇ ਮੱਧ ਪ੍ਰਦੇਸ਼ ਦੇ ਕੁੱਝ ਹਿੱਸਿਆਂ ਵਿਚ ਭਾਰੀ ਬਾਰਿਸ਼ ਅਤੇ ਹੜ੍ਹ ਵੀ ਆ ਸਕਦਾ ਹੈ। 

ਏਜੰਸੀ ਦੀ ਮੰਨੀਏ ਤਾਂ ਜੋ ਉਤਰ ਪੱਛਮ ਅਤੇ ਦੱਖਣ ਪੂਰਬੀ ਭਾਰਤ ਦੇ ਕੁੱਝ ਹਿੱਸਿਆਂ ਵਿਚ ਸੋਕਾ ਪੈ ਸਕਦਾ ਹੈ। ਉਧਰ ਪ੍ਰਾਈਵੇਟ ਫਾਰਕਾਸਟਰ ਸਕਾਈਮੇਟ ਨੇ ਵੀ ਬਾਰਿਸ਼ ਦੀ ਭਵਿੱਖਬਾਣੀ ਕੀਤੀ ਹੈ। ਇਸ ਦੇ ਮੁਤਾਬਕ ਉਤਰ ਪੂਰਬੀ ਭਾਰਤ ਦੇ ਜ਼ਿਆਦਾਤਰ ਹਿੱਸਿਆਂ ਵਿਚ ਮਾਨਸੂਨ ਦੇ ਸੀਜ਼ਨ ਵਿਚ ਘੱਟ ਬਾਰਿਸ਼ ਹੋ ਸਕਦੀ ਹੈ। ਸਕਾਈਮੇਟ ਨੇ ਕਿਹਾ ਕਿ ਜੁਲਾਈ ਅਤੇ ਅਗੱਸਤ ਦੇ ਮਹੀਨੇ ਵਿਚ ਘੱਟ ਬਾਰਿਸ਼ ਹੋ ਸਕਦੀ ਹੈ। ਇੱਥੋਂ ਤਕ ਕਿ ਅਗੱਸਤ ਵਿਚ ਜੁਲਾਈ ਤੋਂ ਵੀ ਘੱਟ ਬਾਰਿਸ਼ ਦੇ ਆਸਾਰ ਹਨ। 

ਦਸ ਦਈਏ ਕਿ ਭਾਰਤ ਦੀ ਸਾਲਾਨਾ ਬਾਰਿਸ਼ ਵਿਚ 73 ਫ਼ੀ ਸਦੀ ਹਿੱਸਾ ਮਾਨਸੂਨ ਦਾ ਹੈ। ਆਮ ਤੌਰ 'ਤੇ ਇਹ ਇਕ ਜੂਨ ਨੂੰ ਕੇਰਲ ਪਹੁੰਚਦਾ ਹੈ ਪਰ ਇਸ ਵਾਰ ਇਸ ਦੇ 3 ਦਿਨ ਪਹਿਲਾਂ ਦਸਤਕ ਦੇਣ ਦੀ ਉਮੀਦ ਹੈ। ਭਾਰਤ ਦੀ ਅਰਥਵਿਵਸਥ ਦੇ ਲਈ ਮਾਨਸੂਨ ਦਾ ਕਾਫ਼ੀ ਮਹੱਤਵ ਹੈ ਅਤੇ ਇਸ ਨਾਲ ਸਿੱਧੇ ਤੌਰ 'ਤੇ ਕਿਸਾਨ ਪ੍ਰਭਾਵਤ ਹੁੰਦੇ ਹਨ। ਉਧਰ ਰਾਜਸਥਾਨ, ਮੱਧ ਪ੍ਰਦੇਸ਼ ਅਤੇ ਛੱਤੀਸਗੜ੍ਹ ਵਿਚ ਇਸੇ ਸਾਲ ਚੋਣਾਂ ਵੀ ਹੋਣ ਵਾਲੀਆਂ ਹਨ। ਵੋਟਰਾਂ ਦੇ ਵੋਟਿੰਗ ਪੈਟਰਨ ਨੂੰ ਪ੍ਰਭਾਵਤ ਕਰਨ ਵਿਚ ਵੀ ਇਹ ਅਹਿਮ ਭੂਮਿਕਾ ਨਿਭਾਅ ਸਕਦਾ ਹੈ।