PM Modi 's Sister Mohsin Shaikh

ਨਵੀਂ ਦਿੱਲੀ : ਰੱਖੜੀ ਦਾ ਤਿਓਹਾਰ ਪੂਰੇ ਦੇਸ਼ ਭਰ ਵਿਚ ਮਨਾਇਆ ਗਿਆ। ਇਸੇ ਦੌਰਾਨ ਦੇਸ਼ ਦੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਮੂੰਹਬੋਲੀ ਮੁਸਲਿਮ ਭੈਣ ਕਮਰ ਮੋਹਸਿਨ ਸ਼ੇਖ਼ ਨੇ ਵੀ ਉਨ੍ਹਾਂ ਦੇ ਰੱਖੜੀ ਬੰਨ੍ਹੀ। ਦਸ ਦਈਏ ਕਿ ਕਮਰ ਮੋਹਸਿਨ ਸ਼ੇਖ ਪਿਛਲੇ 24 ਸਾਲਾਂ ਤੋਂ ਨਰਿੰਦਰ ਮੋਦੀ ਨੂੰ ਰੱਖੜੀ ਬੰਨ੍ਹਦੀ ਆ ਰਹੀ ਹੈ। ਮੋਹਸਿਨ ਪੀਐੱਮ ਮੋਦੀ ਨੂੰ ਉਦੋਂ ਤੋਂ ਜਾਣਦੀ ਹੈ ਜਦੋਂ ਤੋਂ ਉਹ ਆਰਐੱਸਐੱਸ ਨਾਲ ਕੰਮ ਕਰਦੇ ਸਨ। 

ਮੋਦੀ ਦੀ ਰੱਖੜੀ ਸਿਸਟਰ ਮੰਨੀ ਜਾਣ ਵਾਲੀ ਕਮਰ ਮੋਹਸਿਨ ਸ਼ੇਖ ਦਾ ਕਹਿਣਾ ਹੈ ਕਿ ਜਦੋਂ ਉਸ ਨੇ ਪਹਿਲੀ ਵਾਰ ਭਰਾ ਨਰਿੰਦਰ ਮੋਦੀ ਨੂੰ ਰੱਖੜੀ ਬੰਨ੍ਹੀ ਸੀ ਤਾਂ ਉਸ ਸਮੇਂ ਉਹ ਆਰਐੱਸਐੱਸ ਦੇ ਇਕ ਵਰਕਰ ਸਨ। ਉਨ੍ਹਾਂ ਨੂੰ ਰੱਖੜੀ ਬੰਨ੍ਹਦੇ ਹੋਏ 24 ਸਾਲ ਹੋ ਗਏ ਹਨ। ਉਨ੍ਹਾਂ ਦੇ ਵਿਵਹਾਰ ਵਿਚ ਕੋਈ ਬਦਲਾਅ ਨਹੀਂ ਆਇਆ ਹੈ। ਉਹ ਸਿਰਫ਼ ਪਹਿਲਾਂ ਨਾਲੋਂ ਜ਼ਿਆਦਾ ਰੁੱਝ ਗਏ ਹਨ। ਇਸ ਲਈ ਸਾਨੂੰ ਮਿਲਣ ਦਾ ਸਮਾਂ ਨਹੀਂ ਮਿਲਦਾ। ਇਸ ਦੇ ਇਲਾਵਾ ਬਾਕੀ ਸਭ ਕੁਝ ਓਵੇਂ ਜਿਵੇਂ ਹੈ। 

ਕਮਰ ਮੋਹਸਿਨ ਸ਼ੇਖ ਚਿੱਤਰਕਾਰ ਮੋਹਸਿਨ ਸ਼ੇਖ ਦੀ ਪਤਨੀ ਅਤੇ ਸਵੀਮਰ ਸੂਫੀਆਨ ਸ਼ੇਖ ਦੀ ਮਾਂ ਹੈ। ਪਾਕਿਸਤਾਨ ਦੀ ਕਮਰ ਸ਼ੇਖ ਦਾ ਵਿਆਹ 1981 ਵਿਚ ਹੋਇਆ ਸੀ। ਇਸ ਤੋਂ ਬਾਅਦ ਉਹ ਅਹਿਮਦਾਬਾਦ ਵਿਖੇ ਆ ਕੇ ਰਹਿਣ ਲੱਗ ਗਈ ਸੀ। 1995 ਵਿਚ ਉਨ੍ਹਾਂ ਦੀ ਮੁਲਾਕਾਤ ਗੁਜਰਾਤ ਦੇ ਉਸ ਸਮੇਂ ਰਾਜਪਾਲ ਡਾ. ਸਵਰੂਪ ਸਿੰਘ ਨਾਲ ਹੋਈ। ਉਹ ਉਨ੍ਹਾਂ ਨੂੰ ਆਪਣੀ ਬੇਟੀ ਮੰਨਦੇ ਸਨ। ਇਸੀ ਦੌਰਾਨ ਜਦੋਂ ਉਹ ਪਾਕਿਸਤਾਨ ਜਾ ਰਹੀ ਸੀ ਉਦੋਂ ਖੁਦ ਸਵਰੂਪ ਸਿੰਘ ਉਨ੍ਹਾਂ ਨੂੰ ਏਅਰਪੋਰਟ ਤਕ ਛੱਡਣ ਗਏ ਸਨ। 

ਉਸ ਸਮੇਂ ਉਨ੍ਹਾਂ ਦੇ ਨਾਲ ਨਰਿੰਦਰ ਮੋਦੀ ਵੀ ਸਨ। ਉਸ ਸਮੇਂ ਮੋਦੀ ਭਾਜਪਾ ਦੇ ਸੂਬਾਈ ਪ੍ਰਧਾਨ ਸਨ। ਉਨ੍ਹਾਂ ਨੇ ਦਸਿਆ ਕਿ ਮੈਨੂੰ ਵਿਦਾ ਕਰਦੇ ਸਮੇਂ ਸਵਰੂਪ ਸਿੰਘ ਨੇ ਮੋਦੀ ਨੂੰ ਕਿਹਾ ਕਿ ਇਹ ਮੇਰੀ ਬੇਟੀ ਹੈ, ਇਸ ਦਾ ਹਮੇਸ਼ਾ ਖ਼ਿਆਲ ਰੱਖਣਾ। ਇਸ 'ਤੇ ਨਰਿੰਦਰ ਮੋਦੀ ਨੇ ਕਿਹਾ ਸੀ ਕਿ ਜੇਕਰ ਇਹ ਤੁਹਾਡੀ ਬੇਟੀ ਹੈ ਤਾਂ ਫਿਰ ਮੇਰੀ ਭੈਣ ਵੀ ਹੈ।

ਇਸ ਦੇ ਬਾਅਦ ਤੋਂ ਮੈਂ ਰੱਖੜੀ ਦੇ ਤਿਓਹਾਰ ਮੌਕੇ ਮੋਦੀ ਨੂੰ ਭਰਾ ਮੰਨਦੇ ਹੋਏ ਰੱਖੜੀ ਬੰਨ੍ਹਣੀ ਸ਼ੁਰੂ ਕਰ ਦਿਤੀ। ਦਸ ਦਈਏ ਕਿ ਰੱਖੜੀ ਦੇ ਤਿਓਹਾਰ ਮੌਕੇ ਮੋਹਸਿਨ ਤੋਂ ਇਲਾਵਾ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੂੰ ਬੱਚਿਆਂ ਅਤੇ ਹੋਰ ਔਰਤਾਂ ਨੇ ਵੀ ਰੱਖੜੀ ਬੰਨ੍ਹੀ।