Sunny Deol's Road Show

ਬਾੜਮੇਰ: ਬਾਲੀਵੁੱਡ ਐਕਟਰ ਸੰਨੀ ਦਿਉਲ ਨੇ ਲੋਕਸਭਾ ਚੋਣਾਂ 2019 ’ਚ ਭਾਰਤੀ ਜਨਤਾ ਪਾਰਟੀ (ਭਾਜਪਾ) ਜੁਆਇਨ ਕਰ ਲਈ ਹੈ। ਉਹ ਪੰਜਾਬ ਦੀ ਗੁਰਦਾਸਪੁਰ ਸੀਟ ਤੋਂ ਚੋਣ ਲੜਨਗੇ। ਸ਼ਨਿਚਰਵਾਰ ਨੂੰ ਉਨ੍ਹਾਂ ਨੇ ਅਪਣਾ ਪਹਿਲਾ ਰੋਡ ਸ਼ੋਅ ਕੀਤਾ ਜਿਸ ਵਿਚ ਬੇਹਿਸਾਬ ਲੋਕਾਂ ਦੀ ਭੀੜ ਸੜਕਾਂ ਉਤੇ ਨਜ਼ਰ ਆਈ। ਉਨ੍ਹਾਂ ਨੇ ਇਹ ਰੋਡ ਸ਼ੋਅ ਬਾੜਮੇਰ ਤੋਂ ਲੋਕਸਭਾ ਉਮੀਦਵਾਰ ਕੈਲਾਸ਼ ਚੌਧਰੀ ਲਈ ਕੀਤਾ ਸੀ। ਕਾਂਗਰਸ ਵਲੋਂ ਮਾਨਵੇਂਦਰ ਸਿੰਘ ਇਸ ਸੀਟ ਤੋਂ ਚੋਣ ਲੜ ਰਹੇ ਹਨ।

ਸੰਨੀ ਦਿਉਲ ਦੇ ਪਹਿਲੇ ਰੋਡ ਸ਼ੋਅ ਵਿਚ ਹਜ਼ਾਰਾਂ ਸਮਰਥਕ ਸੜਕ ਉਤੇ ਵਿਖਾਈ ਦਿਤੇ। ਸੰਨੀ ਦਿਉਲ ਨੇ ਸਫ਼ੈਦ ਸ਼ਰਟ ਤੇ ਨੀਲੀ ਜੀਨ ਤੇ ਆਰਮੀ ਕੈਪ ਪਹਿਨੀ ਹੋਈ ਸੀ। ਫ਼ੈਨਸ ਸੰਨੀ ਦਿਉਲ ਦੀ ਗੱਡੀ ਦੇ ਕੋਲ ਆ ਰਹੇ ਸਨ ਤੇ ਸੰਨੀ ਦਿਉਲ ਫ਼ੈਨਸ ਨਾਲ ਨਾ ਸਿਰਫ਼ ਹੱਥ ਮਿਲਾ ਰਹੇ ਸਨ ਬਲਕਿ ਉਨ੍ਹਾਂ ਵਲੋਂ ਦਿਤੇ ਤੋਹਫ਼ੇ ਵੀ ਸਵੀਕਾਰ ਕਰ ਰਹੇ ਸਨ।

ਸੰਨੀ ਦਿਉਲ ਦੇ ਸਮਰਥਕ ਉਨ੍ਹਾਂ ਦੀ ਫ਼ਿਲਮ ‘ਗਦਰ’ ਦਾ ਡਾਇਲੌਗ ‘ਹਿੰਦੁਸਤਾਨ ਜ਼ਿੰਦਾਬਾਦ ਸੀ, ਜ਼ਿੰਦਾਬਾਦ ਹੈ ਤੇ ਜ਼ਿੰਦਾਬਾਦ ਰਹੇਗਾ’ ਦੇ ਨਾਅਰੇ ਲਗਾਉਂਦੇ ਦਿਸੇ ਤੇ ਨਾਲ ਹੀ ਸਪੀਕਰ ’ਤੇ ਵੀ ਇਹ ਡਾਇਲੌਗ ਵਜਾ ਰਹੇ ਸਨ।

ਜ਼ਿਕਰਯੋਗ ਹੈ ਕਿ 29 ਅਪ੍ਰੈਲ ਨੂੰ ਰਾਜਸਥਾਨ ਦੀਆਂ 13 ਲੋਕਸਭਾ ਸੀਟਾਂ ’ਤੇ ਵੋਟਿੰਗ ਹੋਣੀ ਹੈ। ਹਾਲ ਹੀ ਵਿਚ ਭਾਜਪਾ ਨੂੰ ਵਿਧਾਨ ਸਭਾ ਚੋਣਾਂ ਵਿਚ ਮਿਲੀ ਹਾਰ ਤੋਂ ਬਾਅਦ ਭਾਜਪਾ ਦੇ ਸਾਹਮਣੇ ਵੱਡੀ ਚੁਣੌਤੀ ਹੈ। ਉੱਥੇ ਹੀ ਸੱਤਾਧਾਰੀ ਕਾਂਗਰਸ ਇਸ ਵਾਰ ਸੂਬੇ ਦੀਆਂ 25 ਸੀਟਾਂ ’ਤੇ ਜਿੱਤ ਹਾਸਲ ਕਰਕੇ ਦਿੱਲੀ ਦੀ ਸੱਤਾ ਤੱਕ ਪਹੁੰਚਣ ਦੀ ਕੋਸ਼ਿਸ਼ ਵਿਚ ਲੱਗੀ ਹੈ।