ਮੁੰਬਈ: ਸਥਾਨਕ ਨਾਇਰ ਹਸਪਤਾਲ ਦੀ ਮੈਡੀਕਲ ਵਿਦਿਆਰਥਣ ਪਾਇਲ ਨੇ ਕਥਿਤ ਤੌਰ ‘ਤੇ ਅਪਣੇ ਤਿੰਨ ਸੀਨੀਅਰ ਵਿਦਿਆਰਥੀਆਂ ਵੱਲੋਂ ਵਾਰ ਵਾਰ ਜਾਤੀ ਦੇ ਅਧਾਰ ‘ਤੇ ਟਿੱਪਣੀ ਕੀਤੇ ਜਾਣ ਤੋਂ ਤੰਗ ਆ ਕੇ ਖੁਦਕੁਸ਼ੀ ਕਰ ਲਈ ਹੈ। ਮ੍ਰਿਤਕ ਦੇ ਪਰਿਵਾਰ ਨੇ ਇਲਜ਼ਾਮ ਲਗਾਏ ਹਨ ਕਿ ਪਾਇਲ ਨੇ ਹਸਪਤਾਲ ਦੇ ਪ੍ਰਸ਼ਾਸਨ ਨੂੰ  ਇਸ ਪਰੇਸ਼ਾਨੀ ਸਬੰਧੀ ਕਈ ਵਾਰ ਦੱਸਿਆ ਸੀ ਪਰ ਕੋਈ ਕਦਮ ਨਹੀਂ ਚੁੱਕਿਆ ਗਿਆ। ਪਾਇਲ ਤੜਵੀ ਨੇ ਸਾਲ 2018 ਵਿਚ ਮੁੰਬਈ ਦੇ ਨਾਇਰ ਹਸਪਤਾਲ ਵਿਚ ਦਾਖਲਾ ਲਿਆ ਸੀ ਅਤੇ ਇਸੇ ਹਸਪਤਾਲ ਵਿਚ ਬਤੌਰ ਰੈਜ਼ੀਡੇਂਟ ਡਾਕਟਰ ਤੈਨਾਤ ਸੀ।

ਦਾਖਲਾ ਰਾਖਵੇਂ ਕੋਟੇ ਦੇ ਅਧਾਰ ‘ਤੇ ਹੋਣ ਕਾਰਨ ਉਸਦੇ ਤਿੰਨ ਸੀਨੀਅਰ ਜਾਤ ਦੇ ਅਧਾਰ ‘ਤੇ ਟਿੱਪਣੀ ਕਰਕੇ ਉਸ ਨੂੰ ਪਰੇਸ਼ਾਨ ਕਰਦੇ ਸਨ ਅਤੇ ਵਾਰ ਵਾਰ ਇਸ ਦਾ ਜ਼ਿਕਰ ਕਰਦੇ ਸਨ। ਇਹ ਸਿਲਸਿਲਾ ਕਈ ਮਹੀਨਿਆਂ ਤੱਕ ਚੱਲਿਆ। ਵਿਦਿਆਰਥਣ ਨੇ ਇਸ ਦੀ ਸ਼ਿਕਾਇਤ ਹੌਸਟਲ ਦੇ ਅਧਿਕਾਰੀਆਂ ਕੋਲ ਵੀ ਕੀਤੀ ਸੀ ਪਰ ਫਿਰ ਵੀ ਕੋਈ ਕਾਰਵਾਈ ਨਹੀਂ ਹੋਈ। 22 ਮਈ ਨੂੰ ਕਥਿਤ ਤੌਰ ‘ਤੇ ਇਸੇ ਪਰੇਸ਼ਾਨੀ ਤੋਂ ਤੰਗ ਆ ਕੇ ਲੜਕੀ ਨੇ ਆਤਮ ਹੱਤਿਆ ਕਰ ਲਈ। ਮ੍ਰਿਤਕ ਦੇ ਪਰਿਵਾਰ ਵੱਲੋਂ ਇਨਸਾਫ ਦੀ ਮੰਗ ਕੀਤੀ ਜਾ ਰਹੀ ਹੈ। ਇਸ ਮਾਮਲੇ ਵਿਚ ਕਥਿਤ ਦੋਸ਼ੀ 22 ਮਈ ਤੋਂ ਹੀ ਫਰਾਰ ਹਨ।

ਮ੍ਰਿਤਕ ਦੇ ਸਾਥੀਆਂ ਮੁਤਾਬਕ ਦਾਖਲੇ ਤੋਂ ਬਾਅਦ ਹੀ ਸੀਨੀਅਰ ਲਗਾਤਾਰ ਉਹਨਾਂ ਦੀ ਰੈਗਿੰਗ ਕਰ ਰਹੇ ਸਨ। ਇਸ ਹਾਦਸੇ ਤੋਂ ਬਾਅਦ ਵਿਦਿਆਰਥੀਆਂ ਨੇ ਇਸਦੇ ਵਿਰੁੱਧ ਪ੍ਰਦਰਸ਼ਨ ਵੀ ਕੀਤਾ। ਹਸਪਤਾਲ ਦੇ ਅਧਿਕਾਰੀਆਂ ਨੇ ਇਸ ਮਾਮਲੇ ਦੀ ਜਾਂਚ ਦੇ ਆਦੇਸ਼ ਦਿੱਤੇ ਹਨ। ਇਸਦੇ ਨਾਲ ਹੀ ਪੁਲਿਸ ਨੇ ਤਿੰਨ ਕਥਿਤ ਦੋਸ਼ੀਆਂ ਵਿਰੁੱਧ ਧਾਰਾ 306 ਅਤੇ ਐਸਸੀ/ ਐਸਟੀ ਕਾਨੂੰਨ ਤਹਿਤ ਮਾਮਲਾ ਦਰਜ ਕਰ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।