Galvan Valley

ਨਵੀਂ ਦਿੱਲੀ : ਚੀਨ ਭਾਰਤ ਨਾਲ ਚਲਾਕੀਆਂ ਖੇਡਣ ਤੋਂ ਬਾਜ ਨਹੀਂ ਆ ਰਿਹਾ। ਅਪਣੇ ਵਿਸਥਾਰਵਾਦੀ ਰਵੱਈਏ ਤਹਿਤ ਇਕ ਪਾਸੇ ਉਹ ਭਾਰਤ ਨਾਲ ਗੱਲਬਾਤ ਜ਼ਰੀਏ ਸਰਹੱਦੀ ਵਿਵਾਦ ਸੁਲਝਾਉਣ ਦੀ ਕੋਸ਼ਿਸ਼ ਦਾ ਵਿਖਾਵਾ ਕਰ ਰਿਹਾ ਹੈ, ਜਦਕਿ ਦੂਜੇ ਪਾਸੇ ਅੰਦਰਖਾਤੇ ਅਪਣੀਆਂ ਗਤੀਵਿਧੀਆਂ ਨੂੰ ਚਾਲੂ ਰੱਖ ਰਿਹਾ ਹੈ। ਤਾਜ਼ਾ ਮਾਮਲਾ ਗਲਵਾਨ ਘਾਟੀ ਦਾ ਸਾਹਮਣੇ ਆਇਆ ਹੈ, ਜਿੱਥੇ ਦੋਵਾਂ ਦੇਸ਼ਾਂ ਦੀਆਂ ਸੈਨਾਵਾਂ ਆਹਮੋ-ਸਾਹਮਣੇ ਆਉਣ ਬਾਅਦ ਖੂਨੀ ਝੜਪ ਵੀ ਹੋ ਚੁੱਕੀ ਹੈ।

ਇਸੇ ਸਥਾਨ 'ਤੇ ਹੁਣ ਚੀਨੀ ਸੈਨਾ ਨੇ ਵੱਡੀ ਗਿਣਤੀ 'ਚ ਸਥਾਈ ਉਸਾਰੀਆਂ ਕਰ ਲਈਆਂ ਹਨ। ਇਸ ਦਾ ਖੁਲਾਸਾ ਸੈਟੇਲਾਈਟ ਤਸਵੀਰਾਂ ਜ਼ਰੀਏ ਹੋਇਆ ਹੈ। ਦੱਸ ਦਈਏ ਕਿ ਚੀਨੀ ਸੈਨਾ ਨੇ ਜਿਸ ਜਗ੍ਹਾ 'ਤੇ ਤਾਜ਼ਾ ਉਸਾਰੀਆਂ ਕੀਤੀਆਂ ਹਨ, ਉਹ ਗਲਵਾਨ ਨਦੀ ਦੇ ਕਿਨਾਰਿਆਂ ਵਾਲਾ ਇਲਾਕਾ ਹੈ, ਜਿਸ ਨੂੰ ਭਾਰਤ ਦੀ ਜ਼ਮੀਨ ਮੰਨਿਆ ਜਾਂਦਾ ਹੈ। ਇਸ ਤੋਂ ਸਾਬਤ ਹੋ ਜਾਂਦੈ ਕਿ ਚੀਨੀ ਸੈਨਾ ਨੇ ਨਾ ਸਿਰਫ਼ ਭਾਰਤੀ ਇਲਾਕੇ ਅੰਦਰ ਘੁਸਪੈਠ ਕੀਤੀ ਬਲਕਿ ਉਥੇ ਅਪਣੇ ਕੈਂਪ ਵੀ ਉਸਾਰ ਲਏ ਹਨ।

ਇਹ ਵੀ ਜ਼ਿਕਰਯੋਗ ਹੈ ਕਿ ਇਹ ਕੈਂਪ ਪਿਛਲੇ 33 ਦਿਨਾਂ ਦੌਰਾਨ ਹੀ ਉਸਾਰੇ ਗਏ ਹਨ। ਇਕ ਰਿਪੋਰਟ ਮੁਤਾਬਕ ਬੀਤੀ 22 ਮਈ ਨੂੰ ਇਸੇ ਇਲਾਕੇ ਦੀਆਂ ਲਈਆਂ ਗਈਆਂ ਸੈਟੇਲਾਈਟ ਤਸਵੀਰਾਂ 'ਚ ਇਹ ਨਿਰਮਾਣ ਕਾਰਜ ਵਿਖਾਈ ਨਹੀਂ ਦਿੰਦੇ ਜਦਕਿ 22 ਜੂਨ ਨੂੰ ਲਈਆਂ ਗਈਆਂ ਸੈਟੇਲਾਈਟ ਤਸਵੀਰਾਂ 'ਚ ਇਸ ਵਿਵਾਦਿਤ ਇਲਾਕੇ ਅੰਦਰ ਚੀਨ ਵਲੋਂ ਵੱਡੀ ਗਿਣਤੀ 'ਚ ਕੀਤੀਆਂ ਗਈਆਂ ਉਸਾਰੀਆਂ ਵਿਖਾਈ ਦਿੰਦੀਆਂ ਹਨ।

ਗਲਵਾਨ ਘਾਟੀ 'ਚ ਪੀਪੀ-14 ਪੁਆਇਟ ਦੇ ਨੇੜੇ ਨਦੀ ਦੇ ਕਿਨਾਰਿਆਂ ਵਾਲੇ ਇਲਾਕੇ 'ਚ ਕੀਤੀਆਂ ਉਸਾਰੀਆਂ ਇਸ ਲਈ ਵੀ ਅਹਿਮ ਹਨ, ਕਿਉਂਕਿ ਚੀਨੀ ਸੈਨਾ ਇੱਥੋਂ ਥੱਲੇ ਨਦੀ ਦੇ ਕਿਨਾਰਿਆਂ ਤਕ ਭਾਰਤੀ ਸੈਨਾ ਦੀਆਂ ਗਤੀਵਿਧੀਆਂ 'ਤੇ ਨਜ਼ਰ ਰੱਖ ਸਕਦੀ ਹੈ।

ਸੈਟੇਲਾਈਟ ਤਸਵੀਰਾਂ ਤੋਂ ਗਲਵਾਨ ਨਦੀ ਦੇ ਕੰਢੇ 'ਤੇ 50 ਦੇ ਕਰੀਬ ਚੀਨੀ ਸੈਨਿਕਾਂ ਦੀ ਮੌਜੂਦਗੀ ਦਾ ਵੀ ਪਤਾ ਚੱਲਦਾ ਹੈ। 25 ਸੈਨਿਕ ਉਨ੍ਹਾਂ ਤੋਂ ਕਰੀਬ 150 ਮੀਟਰ ਦੀ ਦੂਰੀ 'ਤੇ ਵਿਖਾਈ ਦੇ ਰਹੇ ਹਨ। ਸੈਟੇਲਾਈਟ ਤਸਵੀਰਾਂ ਇਸ ਗੱਲ ਵੱਲ ਇਸ਼ਾਰਾ ਕਰਦੀਆਂ ਹਨ ਕਿ ਚੀਨੀ ਸੈਨਾ ਇਸ ਇਲਾਕੇ 'ਚ ਅਹਿਮ ਟਿਕਾਣਿਆਂ 'ਤੇ ਤੈਨਾਤ ਹੈ, ਜਿੱਥੋਂ ਉਹ ਭਾਰਤੀ ਸੈਨਾ 'ਤੇ ਨਜ਼ਰ ਰੱਖ ਸਕਦੇ ਹਨ।

Punjabi News  ਨਾਲ ਜੁੜੀ ਹੋਰ ਅਪਡੇਟ ਲਗਾਤਾਰ ਹਾਸਲ ਕਰਨ ਲਈ ਸਾਨੂੰ  Facebook  ਤੇ ਲਾਈਕ Twitter  ਤੇ follow  ਕਰੋ ।