Railways cups say Main Bhi Chowkidar, pic goes viral

ਨਵੀਂ ਦਿੱਲੀ : ਦੇਸ਼ 'ਚ ਲੋਕ ਸਭਾ ਚੋਣਾਂ ਦੀ ਸਰਗਰਮੀ ਜ਼ੋਰਾਂ 'ਤੇ ਹੈ। ਵੋਟਰਾਂ ਨੂੰ ਲੁਭਾਉਣ ਲਈ ਸਿਆਸੀ ਪਾਰਟੀਆਂ ਨੇ ਕਈ ਨਾਅਰੇ ਦਿੱਤੇ ਹਨ। ਇਸ ਵਾਰ ਭਾਜਪਾ ਵੱਲੋਂ 'ਮੈਂ ਵੀ ਚੌਕੀਦਾਰ' ਦਾ ਨਾਅਰਾ ਦਿੱਤਾ ਗਿਆ ਹੈ। ਇਸ ਵਿਚਕਾਰ ਇਕ ਅਜਿਹਾ ਮਾਮਲਾ ਸਾਹਮਣੇ ਆਇਆ ਹੈ, ਜੋ ਚਰਚਾ ਦਾ ਵਿਸ਼ਾ ਬਣ ਗਿਆ ਹੈ। ਦਰਅਸਲ ਸ਼ਤਾਬਦੀ ਟਰੇਨ 'ਚ ਜਿਹੜੇ ਕੱਪ 'ਚ ਮੁਸਾਫ਼ਰਾਂ ਨੂੰ ਚਾਹ ਦਿੱਤੀ ਜਾ ਰਹੀ ਸੀ ਉਸ 'ਤੇ 'ਮੈਂ ਵੀ ਚੌਕੀਦਾਰ' ਲਿਖਿਆ ਹੋਇਆ ਸੀ। ਇਸ ਦੀ ਤਸਵੀਰ ਵਾਇਰਲ ਹੋ ਗਈ ਅਤੇ ਮਾਮਲਾ ਕਾਫ਼ੀ ਭੱਖ ਗਿਆ ਹੈ।

ਜਾਣਕਾਰੀ ਮੁਤਾਬਕ ਪਾਇਲ ਮਹਿਤਾ ਨਾਂ ਦੀ ਇਕ ਟਵਿਟਰ ਯੂਜਰ ਨੇ ਚਾਹ ਵਾਲੇ ਕੱਪ ਦੀ ਤਸਵੀਰ ਸ਼ੇਅਰ ਕਰਦਿਆਂ ਲਿਖਿਆ, "ਕਾਠਗੋਦਾਮ ਜਾਣ ਵਾਲੀ ਸ਼ਤਾਬਦੀ ਐਕਸਪ੍ਰੈਸ 12040 'ਚ ਜਿਹੜੇ ਕੱਪਾਂ ਵਿਚ ਚਾਹ ਦਿੱਤੀ ਜਾ ਰਹੀ ਹੈ, ਉਸ 'ਤੇ 'ਮੈਂ ਵੀ ਚੌਕੀਦਾਰ' ਲਿਖਿਆ ਹੋਇਆ ਹੈ।" ਪਾਇਲ ਮਹਿਤਾ ਨੇ ਇਸ ਤਸਵੀਰ ਨੂੰ ਰੇਲ ਮੰਤਰਾਲਾ ਅਤੇ ਚੋਣ ਕਮਿਸ਼ਨ ਨੂੰ ਵੀ ਟੈਗ ਕੀਤਾ। ਇਸ ਟਵੀਟ ਮਗਰੋਂ ਭਾਰਤੀ ਰੇਲਵੇ ਤੁਰੰਤ ਹਰਕਤ 'ਚ ਆਇਆ ਅਤੇ IRCTC ਤੋਂ ਇਸ ਸਬੰਧ 'ਚ ਜਵਾਬ ਮੰਗਿਆ। ਇਸ ਸਬੰਧ 'ਚ IRCTC ਨੇ ਮਾਫ਼ੀ ਮੰਗਦਿਆਂ ਕਿਹਾ, "ਪ੍ਰੇਸ਼ਾਨੀ ਲਈ ਮੈਨੂੰ ਦੁਖ ਹੈ। ਤੁਸੀ ਮੈਨੂੰ ਆਪਣੀ ਯਾਤਰਾ ਦੀ ਡਿਟੇਲ ਅਤੇ ਪੀਐਨਆਰ ਨੰਬਰ ਦਿਓ। ਮਾਮਲੇ 'ਚ ਲੋੜੀਂਦੀ ਕਾਰਵਾਈ ਕੀਤੀ ਜਾਵੇਗੀ।" ਇਸ ਦੇ ਜਵਾਬ 'ਚ ਮਹਿਤਾ ਨੇ ਲਿਖਿਆ, "ਇਹ ਕੋਡ ਆਫ਼ ਕੰਡਕਟ ਦੀ ਉਲੰਘਣਾ ਹੈ।"

ਮੁੱਦਾ ਗਰਮ ਹੁੰਦਿਆਂ ਵੇਖ IRCTC ਨੂੰ ਬਕਾਇਦਾ ਮਾਫ਼ੀ ਮੰਗਣੀ ਪਈ। ਆਪਣੇ ਟਵੀਟ 'ਚ IRCTC ਨੇ ਲਿਖਿਆ, "ਮੀਡੀਆ ਰਿਪੋਰਟ ਮੁਤਾਬਕ 'ਮੈਂ ਵੀ ਚੌਕੀਦਾਰ' ਨਾਂ ਦੇ ਸਟਿੱਕਰ ਲੱਗੇ ਕੱਪਾਂ ਦੀ ਵਰਤੋਂ ਰੇਲ ਗੱਡੀਆਂ 'ਚ ਹੋ ਰਹੀ ਹੈ। ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਅਜਿਹਾ IRCTC ਦੀ ਮਨਜੂਰੀ ਤੋਂ ਬਗੈਰ ਕੀਤਾ ਜਾ ਰਿਹਾ ਹੈ। ਕੱਪਾਂ ਨੂੰ ਤੁਰੰਤ ਹਟਾ ਦਿੱਤਾ ਗਿਆ ਹੈ। ਇਸ ਮਾਮਲੇ 'ਚ ਪੈਂਟਰੀ ਇੰਚਾਰਜ ਤੋਂ ਜਵਾਬ ਮੰਗਿਆ ਗਿਆ ਹੈ। ਸਰਵਿਸ ਉਪਲੱਬਧ ਕਰਵਾਉਣ ਵਾਲੇ 'ਤੇ 1 ਲੱਖ ਰੁਪਏ ਦਾ ਜੁਰਮਾਨਾ ਲਗਾਇਆ ਜਾ ਸਕਦਾ ਹੈ।"