ਜੇਕਰ ਅੰਮ੍ਰਿਤ ਸੰਚਾਰ ਦੇਵਤਿਆਂ ਨੇ ਤਿਆਰ ਕਰਵਾਇਆ ਹੈ ਤਾਂ ਸਿੱਖਾਂ ਨੂੰ ਕਾਹਦਾ ਮਾਣ: ਢਡਰੀਆਂ ਵਾਲੇ
ਭਾਈ ਰਣਜੀਤ ਸਿੰਘ ਖ਼ਾਲਸਾ ਨੇ ਅੱਜ ਭਰਵੇਂ ਦੀਵਾਨ ਨੂੰ ਸੰਬੋਧਨ ਕਰਦਿਆਂ ਦਸਿਆ ਕਿ ਮਨੁੱਖ ਨੂੰ ਫਸਾਉਣ ਲਈ ਵੀ ਧਾਰਮਕ ਜਾਲ ਵਿਛਾਏ ਗਏ ਹਨ।
ਸੰਗਰੂਰ (ਗੁਰਦਰਸ਼ਨ ਸਿੰਘ ਸਿੱਧੂ): ਭਾਈ ਰਣਜੀਤ ਸਿੰਘ ਖ਼ਾਲਸਾ ਨੇ ਅੱਜ ਭਰਵੇਂ ਦੀਵਾਨ ਨੂੰ ਸੰਬੋਧਨ ਕਰਦਿਆਂ ਦਸਿਆ ਕਿ ਮਨੁੱਖ ਨੂੰ ਫਸਾਉਣ ਲਈ ਵੀ ਧਾਰਮਕ ਜਾਲ ਵਿਛਾਏ ਗਏ ਹਨ। ਕਿਤੇ ਇਸ਼ਨਾਨ ਕਰਨ ਦਾ ਕਿਤੇ ਮੱਥਾ ਟੇਕਣ ਦਾ। ਉਨ੍ਹਾਂ ਦਸਿਆ ਕਿ ਜੇਕਰ ਅਜਿਹਾ ਕੁੱਝ ਕਰਨ ਨਾਲ ਦੁੱਖ ਕੱਟੇ ਜਾਣ ਤਾਂ ਸੱਭ ਤੋਂ ਵੱਡਾ ਦੁੱਖ ਬੁਢਾਪਾ ਹੈ ਉਹ ਕਿਉਂ ਨਹੀਂ ਰੋਕਿਆ ਜਾ ਸਕਦਾ।
ਉਨ੍ਹਾਂ ਕਿਹਾ ਕਿ ਸਾਨੂੰ ਪੰਥ ਵਿਚੋਂ ਛੇਕਣ ਦੀਆਂ ਤਿਆਰੀਆਂ ਹੋ ਰਹੀਆਂ ਹਨ। ਉਨ੍ਹਾਂ ਸਪੋਕਸਮੈਨ ਅਖ਼ਬਾਰ ਵਿਚ ਛਪੀ ਖ਼ਬਰ ਦਾ ਹਵਾਲਾ ਦਿੰਦਿਆਂ ਦਸਿਆ ਕਿ ਮਹਾਂਗੱਪੀ ਸੰਤੋਖ ਸਿੰਘ ਨੇ ਸੂਰਜ ਪ੍ਰਕਾਸ਼ ਗ੍ਰੰਥ ਵਿਚ ਲਿਖਿਆ ਹੈ ਕਿ ਅੰਮ੍ਰਿਤ ਸੰਚਾਰ ਸਮੇਂ ਵਰੁਨ ਦੇਵਤਾ ਅਪਣੇ ਹੱਥੀ ਜਲ ਲੈ ਕੇ ਆਇਆ, ਇੰਦਰ ਦੇਵਤਾ ਮਹਾਨ ਬਲ ਨਾਲ ਮਿੱਠਾ ਲਿਆਇਆ, ਜਮਰਾਜ ਨੇ ਆ ਕੇ ਲੋਹਾ ਦਿਤਾ ਤੇ ਸਾਰੇ ਦੇਵਤੇ ਅੰਮ੍ਰਿਤ ਵਾਸਤੇ ਇਕੱਠੇ ਹੋਏ।
ਜਲ ਇਸ ਕਰ ਕੇ ਹੈ ਕਿ ਸਿੱਖ ਸ਼ਾਂਤੀ ਅਵਸਥਾ ਨੂੰ ਪਾਵੇ, ਮਿੱਠਾ ਇਸ ਕਰ ਕੇ ਹੈ ਕਿ ਸਿੱਖ ਭੋਗਾਂ ਨੂੰ ਨਾ ਚਾਹੁਣ। ਇਸ ਸਬੰਧੀ ਭਾਈ ਰਣਜੀਤ ਸਿੰਘ ਖ਼ਾਲਸਾ ਨੇ ਆਖਿਆ ਕਿ ਫਿਰ ਅੰਮ੍ਰਿਤ ਵਿਚ ਸਿੱਖਾਂ ਦਾ ਕੀ ਰਹਿ ਗਿਆ ਫਿਰ ਅੰਮ੍ਰਿਤ ਸੰਚਾਰ ਵੀ ਉਨ੍ਹਾਂ ਦਾ ਹੀ ਹੋਇਆ।