ਪੰਜਾਬ ਦੇ ਮੈਡੀਕਲ ਕਾਲਜਾਂ ’ਚ ਹੁਣ ਸਿਰਫ਼ ਪੰਜਾਬ ਦੇ ਵਿਦਿਆਰਥੀ ਹੀ ਲੈਣਗੇ ਦਾਖ਼ਲਾ
ਪੰਜਾਬ ਮੈਡੀਕਲ ਸਿੱਖਿਆ ਵਿਭਾਗ ਵਲੋਂ ਦਾਖ਼ਲੇ ਦੇ ਮਾਪਦੰਡਾਂ ’ਚ ਨਵੇਂ ਬਦਲਾਅ
ਚੰਡੀਗੜ੍ਹ: ਐਮਬੀਬੀਐਸ ਕਰਨ ਦੇ ਚਾਹਵਾਨ ਹਜ਼ਾਰਾਂ ਹੀ ਵਿਦਿਆਰਥੀਆਂ ਨੂੰ ਉਸ ਵੇਲੇ ਵੱਡਾ ਝਟਕਾ ਲੱਗਿਆ ਜਦੋਂ ‘ਐਨਈਈਟੀ’ (NEET) ਦੇ ਨਤੀਜੇ ਆਉਣ ਤੋਂ ਇਕ ਦਿਨ ਬਾਅਦ ਹੀ ਪੰਜਾਬ ਮੈਡੀਕਲ ਸਿੱਖਿਆ ਵਿਭਾਗ ਨੇ ਸੂਬੇ ਵਿਚ ਮੈਡੀਕਲ ਦਾਖ਼ਲੇ ਦੇ ਮਾਪਦੰਡ ਬਦਲ ਦਿਤੇ। ਹੁਣ ਨਵੇਂ ਮਾਪਦੰਡ ਅਨੁਸਾਰ ਕੇਵਲ ਉਹ ਵਿਦਿਆਰਥੀ ਪੰਜਾਬ ਦੇ ਮੈਡੀਕਲ ਕਾਲਜਾਂ ਵਿਚ ਦਾਖ਼ਲਾ ਲੈ ਸਕਦੇ ਹਨ ਜੋ ਕਿ ਪੰਜਾਬ ਦੇ ਰਹਿਣ ਵਾਲੇ ਹਨ। ਇਹ ਸਾਲ 2019 ਲਈ ਐਮਬੀਬੀਐਸ ਤੇ ਬੀਡੀਐਸ ਦਾਖ਼ਲੇ ਦੇ ਨੋਟਿਸ ਵਿਚ ਲਿਖਿਆ ਹੋਇਆ ਹੈ।
ਇਹ ਨਵੀਂ ਸ਼ਰਤ ਪਿਛਲੇ ਨੋਟਿਸ ਦੇ ਮਾਪਦੰਡਾਂ ਦੇ ਬਿਲਕੁਲ ਉਲਟ ਹੈ, ਜਿੰਨ੍ਹਾਂ ਵਿਚ ਇਹ ਲਿਖਿਆ ਸੀ ਕਿ ਜਿਹੜੇ ਵਿਦਿਆਰਥੀਆਂ ਨੇ 10ਵੀਂ ਤੋਂ ਲੈ ਕੇ 12ਵੀਂ ਕਲਾਸ ਦੀ ਪੜ੍ਹਾਈ ਪੰਜਾਬ ਵਿਚ ਕੀਤੀ ਹੈ ਉਹ ਪੰਜਾਬ ਦੇ ਮੈਡੀਕਲ ਕਾਲਜ ਵਿਚ ਦਾਖ਼ਲਾ ਲੈ ਸਕਦੇ ਹਨ। ਇਹ ਮਾਰਚ 2016 ਦੀ ਨੋਟੀਫ਼ਿਕੇਸ਼ਨ ਵਿਚ ਦਰਜ ਹੈ। ਐਨ ਮੌਕੇ ’ਤੇ ਹੋਏ ਮਾਪਦੰਡਾਂ ਵਿਚ ਬਦਲਾਅ ਦੀ ਖ਼ਬਰ ਕਈਆਂ ਲਈ ਝਟਕਾ ਦੇਣ ਵਾਲੀ ਹੈ।
ਇਸੇ ਬਦਲਾਅ ਦੀਆਂ ਕਿਆਸਅਰਾਈਆਂ ਦੇ ਚੱਲਦਿਆਂ ਕਈ ਵਿਦਿਆਰਥੀਆਂ ਦੇ ਮਾਪਿਆਂ ਨੇ ਮੁੱਖ ਮੰਤਰੀ ਨੂੰ ਕੁਝ ਦਿਨ ਪਹਿਲਾਂ ਚਿੱਠੀ ਲਿਖੀ ਸੀ, ਜਿਸ ਵਿਚ ਉਨ੍ਹਾਂ ਨੇ ਮੁੱਖ ਮੰਤਰੀ ਨੂੰ ਬੇਨਤੀ ਕੀਤੀ ਸੀ ਕਿ ਇਸ ਸਾਲ ਇਨ੍ਹਾਂ ਮਾਪਦੰਡਾਂ ਨੂੰ ਨਾ ਬਦਲਿਆ ਜਾਵੇ ਜਦੋਂਕਿ ਕਾਫ਼ੀ ਵਿਦਿਆਰਥੀ ਪਿਛਲੀ ਨੋਟੀਫ਼ਿਕੇਸ਼ਨ ਦੇ ਹਿਸਾਬ ਨਾਲ ਅਪਣਾ ਵਿੱਦਿਅਕ ਰਸਤਾ ਚੁਣੀ ਬੈਠੇ ਸਨ।
ਜ਼ਿਕਰਯੋਗ ਹੈ ਕਿ ਮਾਪਦੰਡਾਂ ਦੇ ਇਸ ਬਦਲਾਅ ਨਾਲ ਹੁਣ ਪੰਜਾਬ ਵਿਚ ਵੀ ਉਹੀ ਨਿਯਮ ਲਾਗੂ ਹੋ ਗਏ ਹਨ ਜਿਵੇਂ ਕਿ ਗੁਆਂਢੀ ਸੂਬਿਆਂ ਵਿਚ ਹਨ। ਹੁਣ ਤੱਕ ਪੰਜਾਬ ਦੇ ਵਸਨੀਕਾਂ ਨੂੰ ਕਾਲਜਾਂ ਵਿਚ ਦਾਖ਼ਲਾ ਦੇਣ ਦੀ ਸ਼ਰਤ ਨਹੀਂ ਸੀ ਲਾਗੂ ਕੀਤੀ ਗਈ, ਜਿਸ ਕਰਕੇ ਹਰਿਆਣਾ ਅਤੇ ਹਿਮਾਚਲ ਪ੍ਰਦੇਸ਼ ਤੋਂ ਕਈ ਵਿਦਿਆਰਥੀ ਪੰਜਾਬ ਦੇ ਕਾਲਜਾਂ ਵਿਚ ਸੀਟਾਂ ਦੇ ਹੱਕਦਾਰ ਬਣ ਜਾਂਦੇ ਸਨ।