Shiv Sena Sudhir Suri Lakha singh sidhana

ਚੰਡੀਗੜ੍ਹ: ਮੰਦੀ ਸ਼ਬਦਾਵਲੀ ਵਰਤਣ ਵਾਲਾ ਸ਼ਿਵ ਸੈਨਾ ਦਾ ਆਗੂ ਸੁਧੀਰ ਸੂਰੀ ਹੁਣ ਲੱਖਾ ਸਿਧਾਣਾ ਦੇ ਨਿਸ਼ਾਨੇ ਤੇ ਆ ਗਿਆ ਹੈ। ਸਿਧਾਣਾ ਨੇ ਕਿਹਾ ਕਿ ਲੋਕ ਅਮਨ ਚੈਨ ਭੰਗ ਕਰਨ ਲਈ ਅਜਿਹੀਆਂ ਸਾਜ਼ਿਸ਼ਾਂ ਕਰਦੇ ਹਨ ਤਾਂ ਜੋ ਪੰਜਾਬ ਦਾ ਮਾਹੌਲ ਖਰਾਬ ਕਰ ਸਕਣ।

ਸਿਰਫ ਇੰਨਾ ਹੀ ਨਹੀਂ ਗਰਮ ਹੋਏ ਲੱਖਾ ਸਿਧਾਣਾ ਨੇ ਸਰਕਾਰ ਨੂੰ ਚੇਤਾਵਨੀ ਦਿੰਦੇ ਹੋਏ ਆਖਿਆ ਕਿ ਇਕ ਵਾਰ ਅਜਿਹੇ ਲੋਕਾਂ ਨੂੰ ਦਿੱਤੀਆਂ ਸਿਕਿਊਰਿਟੀਆਂ ਵਾਪਸ ਲੈ ਕੇ ਦੇਖੋ ਲੋਕ ਸੂਰੀ ਵਰਗਿਆਂ ਨੂੰ ਉਹਨਾਂ ਦੀ ਔਕਾਤ ਦਿਖਾ ਦੇਣਗੇ। ਸਿਧਾਣਾ ਨੇ ਪੰਜਾਬ ਦੇ ਲੋਕਾਂ ਨੂੰ ਵੀ ਉਹਨਾਂ ਦੀਆਂ ਸੁੱਤੀਆਂ ਪਈਆਂ ਜ਼ਮੀਰਾਂ ਜਗਾਉਣ ਨੂੰ ਕਿਹਾ ਤਾਂ ਜੋ ਪੰਜਾਬ ਨਾਲ ਹੋ ਰਹੇ ਧੱਕੇ ਵਿਰੁਧ ਅਪਣੀ ਆਵਾਜ਼ ਬੁਲੰਦ ਹੋ ਸਕੇ।

ਉਸ ਨੇ ਸਰਕਾਰ ਨੂੰ ਕਿਹਾ ਕਿ ਉਹਨਾਂ ਨੂੰ ਇਹ ਨਹੀਂ ਦਿਖਦਾ ਕਿ ਸੂਰੀ ਵਰਗੇ 25-25 ਗਨਮੈਨ ਰੱਖੀ ਫਿਰਦੇ ਨੇ ਤੇ ਜੋ ਦਿਲ ਆਵੇ ਕਰੀ ਜਾਂਦੇ ਹਨ। ਇਸ ਦਾ ਬੋਝ ਖਜਾਨੇ ਤੇ ਪੈ ਰਿਹਾ ਹੈ ਤੇ ਖਜਾਨੇ ਵਿਚ ਲੋਕਾਂ ਦਾ ਪੈਸਾ ਹੈ। ਇਹਨਾਂ ਵੱਲੋਂ ਰੋਜ਼ ਹੀ ਅਜਿਹੇ ਡਰਾਮ ਕੀਤੇ ਜਾਂਦੇ ਹਨ ਕਿਉਂ ਕਿ ਇਹਨਾਂ ਨੂੰ ਸਿਕਿਊਰਿਟੀ ਦੀ ਸਪੋਰਟ ਹੁੰਦੀ ਹੈ।

ਪਹਿਲਾਂ ਇਹਨਾਂ ਵੱਲੋਂ ਭੜਕਾਊ ਸ਼ਬਦ ਬੋਲੇ ਜਾਂਦੇ ਹਨ ਤੇ ਫਿਰ ਇਹ ਕਹਿੰਦੇ ਹਨ ਕਿ ਇਹਨਾਂ ਨੂੰ ਧਮਕੀਆਂ ਆਉਂਦੀਆਂ ਹਨ ਉਸ ਤੋਂ ਬਾਅਦ ਇਹਨਾਂ ਦੀ ਸੁਰੱਖਿਆ ਲਈ ਗਨਮੈਨ, ਗੱਡੀਆਂ ਦੇ ਦਿੱਤੀਆਂ ਜਾਂਦੀਆਂ ਹਨ। ਉਸ ਵੱਲੋਂ ਲੋਕਾਂ ਦੀਆਂ ਮਾਂਵਾਂ-ਭੈਣਾਂ ਨੂੰ ਬਹੁਤ ਹੀ ਗਲਤ ਬੋਲਿਆ ਗਿਆ ਹੈ ਉਹ ਕਿਸੇ ਨੂੰ ਨਹੀਂ ਦਿਖਦਾ, ਜਿਹੜੇ ਧਰਮ ਦੇ ਠੇਕੇਦਾਰ ਹਨ ਅੱਜ ਉਹ ਕਿੱਥੇ ਲੁਕ ਗਏ।

ਇਹਨਾਂ ਦੀ ਇਕ ਘੜੀ ਹੋਈ ਸਾਜ਼ਿਸ਼ ਹੁੰਦੀ ਹੈ ਕਿ ਪਹਿਲਾਂ ਗਲਤ ਬੋਲ ਦਿਓ ਫਿਰ ਰੌਲਾ ਪੈਣ ਤੇ ਮੁਆਫ਼ੀ ਮੰਗ ਲਓ। ਇਹ ਕਿਹਾ ਜਾ ਰਿਹਾ ਹੈ ਕਿ ਪੰਜਾਬ ਦਾ ਮਾਹੌਲ ਸਿੱਖ ਖਰਾਬ ਕਰ ਰਹੇ ਹਨ ਤੇ ਵਿਦੇਸ਼ਾਂ ਵਿਚ ਬੈਠੇ ਲੋਕ ਖਰਾਬ ਕਰ ਰਹੇ ਹਨ ਪਰ ਅਸਲ ਵਿਚ ਮਾਹੌਲ ਸੂਰੀ ਵਰਗੇ ਖਰਾਬ ਕਰ ਰਹੇ ਹਨ। ਆਉਂਦੇ 10 ਸਾਲਾਂ ਨੂੰ ਪੰਜਾਬ ਦੀਆਂ ਜ਼ਮੀਨਾਂ ਤੇ ਅੰਬਾਨੀਆਂ ਤੇ ਹੋਰਨਾਂ ਲੋਕਾਂ ਦਾ ਅਧਿਕਾਰ ਹੋ ਜਾਣਾ ਹੈ ਤੇ ਪੰਜਾਬ ਦੇ ਲੋਕਾਂ ਇਸ ਵਿਚ ਦਿਹਾੜੀ ਕਰਨੀ ਪਵੇਗੀ।

ਪੰਜਾਬੀਆਂ ਨੂੰ ਪੰਜਾਬ ਵਿਚ ਹੀ ਨੌਕਰੀਆਂ ਤੋਂ ਵਾਂਝਿਆ ਰੱਖਿਆ ਜਾ ਰਿਹਾ ਹੈ, 50 ਪਰਿਵਾਰਾਂ ਵਿਚੋਂ 30 ਲੱਖ ਨੌਜਵਾਨ ਬੇਰੁਜ਼ਗਾਰ ਹਨ। ਲੋਕਾਂ ਦੀਆਂ ਜ਼ਮੀਨਾਂ ਤੇ ਧੱਕੇ ਨਾਲ ਕਬਜ਼ਾ ਕਰ ਕੇ ਉਹਨਾਂ ਤੇ ਕਾਰਖਾਨੇ ਬਣਾਏ ਗਏ ਉਹਨਾਂ ਤੇ 90 ਪ੍ਰਤੀਸ਼ਤ ਬਾਹਰਲੇ ਲੋਕਾਂ ਦਾ ਹੱਕ ਹੈ। ਪੰਜਾਬ ਵਿਚ ਬੰਗਾਲ, ਯੂਪੀ, ਬਿਹਾਰ ਤੋਂ ਨੌਜਵਾਨ ਲਿਆ ਕੇ ਸਰਕਾਰ ਨੇ ਭਰਤੀ ਕੀਤੇ ਹਨ ਤੇ ਪੰਜਾਬ ਦੇ ਨੌਜਵਾਨ ਬੇਰੁਜ਼ਗਾਰ ਹੀ ਤੁਰਿਆ ਫਿਰਦਾ ਹੈ। ਲੋੜ ਹੈ ਕਿ ਅੱਜ ਪੰਜਾਬ ਦਾ ਨੌਜਵਾਨ ਵੀ ਜਾਗਰੂਕ ਹੋਵੇ ਤੇ ਅਪਣੇ ਹੱਕਾਂ ਲਈ ਬੋਲੇ।