Amitabh Bachchan

ਅੰਮ੍ਰਿਤਸਰ (ਸੁਖਵਿੰਦਰਜੀਤ ਸਿੰਘ ਬਹੋੜੂ): ਅਮਿਤਾਭ ਬੱਚਨ ਵਲੋਂ 2011 ਵਿਚ ਅਕਾਲ ਤਖ਼ਤ ਸਾਹਿਬ ’ਤੇ ਭੇਜੀ ਗਈ ਚਿੱਠੀ ਸਾਹਮਣੇ ਆਈ ਹੈ ਜਿਸ ਵਿਚ ਅਮਿਤਾਭ ਬੱਚਨ ਵਲੋਂ ਉਨ੍ਹਾਂ ਉਪਰ ਲੱਗੇ ਸਿੱਖ ਕਤਲੇਆਮ ਲਈ ਭੀੜ ਨੂੰ ਉਕਸਾਉਣ ਵਾਲੇ ਦੋਸ਼ ਤੇ ਉਨ੍ਹਾਂ ਅਪਣਾ ਸਪਸ਼ਟੀਕਰਨ ਦਿਤਾ। ਅਮਿਤਾਭ ਬੱਚਨ ਨੇ ਬਹੁਤ ਹੀ ਭਾਵੁਕ ਮਨ ਨਾਲ ਅਪਣੇ ਮਿੱਤਰ ਮੁੰਬਈ ਨਿਵਾਸੀ ਸ਼੍ਰੋਮਣੀ ਕਮੇਟੀ ਮੈਂਬਰ ਸ. ਗੁਰਿੰਦਰ ਸਿੰਘ ਬਾਵਾ ਰਾਹੀਂ ਭੇਜੇ ਗਏ ਪੱਤਰ ਵਿਚ ਲਿਖਿਆ ਸੀ ਕਿ 1984 ਵਿਚ ਸਿੱਖ ਕਤਲੇਆਮ ਦੌਰਾਨ ਮੇਰੇ ਵਿਰੁਧ ਹਿੰਸਾ ਭੜਕਾਉਣ ਵਿਚ ਮੇਰੀ ਸ਼ਮੂਲੀਅਤ ਬਾਰੇ ਗ਼ੈਰ ਜ਼ਿੰਮੇਵਾਰਨਾ ਦੋਸ਼ ਲਗਾਏ ਜਾ ਰਹੇ ਹਨ। ਇਨ੍ਹਾਂ ਦੋਸ਼ਾਂ ਨੇ ਮੈਨੂੰ ਦੁੱਖ ਪਹੁੰਚਾਇਆ ਹੈ। 

ਉਕਤ ਐਸ ਜੀ ਪੀ ਸੀ ਮੈਂਬਰ ਬਾਵਾ ਦੇ ਨਿਜੀ ਸਹਾਇਕ ਹਰਮੀਤ ਸਿੰਘ ਸਲੂਜਾ ਨੇ ਜਾਰੀ ਬਿਆਨ ਵਿਚ ਕਿਹਾ ਕਿ ਮੈਂ ਤੁਹਾਨੂੰ ਇਹ ਪੱਤਰ ਬਹੁਤ ਦੁਖੀ ਦਿਲ ਨਾਲ ਲਿਖ ਰਿਹਾ ਹਾਂ, ਇਹ ਸਮਾਂ ਖ਼ਾਸਕਰ ਉਦੋਂ ਜਦੋਂ ਮੈਨੂੰ ਖ਼ਾਲਸ ਪੰਥ ਦੇ ਜਨਮ ਅਸਥਾਨ ਸ੍ਰੀ ਅਨੰਦਪੁਰ ਸਾਹਿਬ ਵਿਖੇ ਇਤਿਹਾਸਕ ਖ਼ਾਲਸਾ ਵਿਰਾਸਤ ਕੰਪਲੈਕਸ ਦੇ ਉਦਘਾਟਨ ਸਮਾਰੋਹ ਵਿਚ ਸ਼ਾਮਲ ਹੋਣ ਲਈ ਪੰਜਾਬ ਸਰਕਾਰ ਵਲੋਂ ਸੱਦਾ ਸਵੀਕਾਰ ਕੀਤਾ ਸੀ। ਮੈਂ ਸੱਚਮੁੱਚ ਇਸ ਇਤਿਹਾਸਕ ਸਮਾਗਮ ਵਿਚ ਸ਼ਿਰਕਤ ਕਰਨ ਦੀ ਉਮੀਦ ਕਰ ਰਿਹਾ ਸੀ, ਪਰ ਮੈਂ ਇਨਕਾਰ ਕਰ ਦਿਤਾ ਕਿਉਂਕਿ ਮੈਂ ਇਸ ਇਤਿਹਾਸਕ ਸਮਾਗਮ ਵਿਚ ਕਿਸੇ ਸ਼ਰਮਿੰਦਗੀ ਦਾ ਕਾਰਨ ਨਹੀਂ ਬਣਨਾ ਚਾਹੁੰਦਾ ਸੀ।

ਹੁਣ ਜਦੋਂ ਸਮਾਰੋਹ ਖ਼ਤਮ ਹੋ ਗਿਆ ਹੈ। ਮੈਂ ਮੇਰੇ ਤੇ ਲਗਾਏ ਜਾ ਰਹੇ ਦੋਸ਼ਾਂ ਦਾ ਜ਼ੋਰਦਾਰ ਖੰਡਨ ਕਰਨ ਦੀ ਇੱਛਾ ਰਖਦਾ ਹਾਂ ਜੋ ਪੂਰੀ ਤਰ੍ਹਾਂ ਬੇਬੁਨਿਆਦ ਅਤੇ ਝੂਠੇ ਹਨ। ਗਾਂਧੀ ਪਰਵਾਰ ਨਾਲ ਅਪਣਾ ਪਿਛੋਕੜ ਦਸਦਿਆਂ ਅਮਿਤਾਭ ਬੱਚਨ ਨੇ ਲਿਖਿਆ ਕਿ ਨਹਿਰੂ ਗਾਂਧੀ ਪ੍ਰਵਾਰ ਅਤੇ ਸਾਡੇ ਪ੍ਰਵਾਰ ਦਾ ਮੂਲ ਸ਼ਹਿਰ, ਅਲਾਹਾਬਾਦ ਹੈ ਜਿਥੋਂ ਸਾਡੇ ਪ੍ਰਵਾਰਾਂ ਦੇ ਪੁਰਾਣੇ ਸਬੰਧ ਹਨ। ਅਸੀਂ ਇਕ ਦੂਜੇ ਦੇ ਖ਼ੁਸ਼ੀ ਤੇ ਗਮੀ ਦੇ ਸਮਾਗਮਾਂ ਵਿਚ ਇੱਕਠੇ ਹੁੰਦੇ ਹਾਂ। ਪਰ ਇਹ ਦੋਸ਼ ਲਗਾਉਣਾ ਕਿ ਮੈਂ ਭੀੜ ਦਾ ਇਕ ਹਿੱਸਾ ਸੀ ਜਿਸ ਨੇ ਉਨ੍ਹਾਂ ਨੂੰ ਸਿੱਖ ਵਿਰੋਧੀ ਨਾਹਰੇਬਾਜ਼ੀ ਲਈ ਉਕਸਾਉਂਦਿਆਂ ਬਿਲਕੁਲ ਗ਼ਲਤ ਹੈ।

ਇਸ ਦੇ ਉਲਟ, ਮੈਂ ਹਮੇਸ਼ਾ ਜ਼ਖ਼ਮੀ ਭਾਵਨਾਵਾਂ ਨੂੰ ਠੱਲ੍ਹ ਪਾਉਣ ਅਤੇ ਸਹਿਜਤਾ ਨੂੰ ਬਣਾਈ ਰੱਖਣ ਦਾ ਪ੍ਰਚਾਰ ਕੀਤਾ ਹੈ। ਸਿੱਖਾਂ ਵਿਰੁਧ 1984 ਦੇ ਸਿੱਖ ਕਤਲੇਆਮ ਦੀ ਮੰਦਭਾਗੀ ਘਟਨਾ ਸਾਡੇ ਦੇਸ਼ ਦੇ ਇਤਿਹਾਸ ਵਿਚ ਹਮੇਸ਼ਾ ਲਈ ਇਕ ਧੁੰਦਲਾ ਅਤੇ ਇਕ ਕਾਲਾ ਅਧਿਆਏ ਹੈ, ਖ਼ਾਸਕਰ ਉਹ ਦੇਸ਼ ਜੋ ਅਪਣਾ ਧਰਮ ਨਿਰਪੱਖ ਪ੍ਰਮਾਣ ਪੱਤਰਾਂ ਵਿਚ ਮਾਣ ਕਰਦਾ ਹੈ। 

ਅਮਿਤਾਭ ਬੱਚਨ ਨੇ ਲਿਖਿਆ ਕਿ ਸ਼ਾਇਦ ਇਹ ਬਹੁਤਿਆਂ ਨੂੰ ਪਤਾ ਨਹੀਂ ਕਿ ਮੈਂ ਖ਼ੁਦ ਵੀ ਅੱਧਾ ਸਿੱਖ ਹਾਂ। ਮੇਰੀ ਮਾਂ ਤੇਜੀ ਕੌਰ ਕੌਰ ਸੂਰੀ ਸਿੱਖ ਪ੍ਰਵਾਰ ਵਿਚੋਂ ਸਨ। ਮੇਰੇ ਨਾਨਾ ਸਰਦਾਰ ਖਜ਼ਾਨ ਸਿੰਘ ਸੂਰੀ ਇੰਗਲੈਂਡ ਤੋਂ ਬਾਰ ਐਟ ਲਾਅ ਸਨ ਤੇ ਪਟਿਆਲਾ ਰਿਆਸਤ ਵਿਚ ਮਾਲ ਮੰਤਰੀ ਵਜੋਂ ਸੇਵਾ ਨਿਭਾਈ ਸੀ। ਮੇਰੀ ਨਾਨੀ ਅਨੰਦਪੁਰ ਦੇ ਸਿੱਖ ਪ੍ਰਵਾਰ ਵਿਚੋਂ ਆਈ ਸੀ ਅਤੇ ਉਸ ਦੇ ਪ੍ਰਵਾਰ ਦੇ ਮੈਂਬਰ, ਪੀੜ੍ਹੀਆਂ ਤਕ, ਗੁਰਦਵਾਰਾ ਅਨੰਦਪੁਰ ਸਾਹਿਬ ਦੀਆਂ ਸੇਵਾਵਾ ਕਰਦੇ ਰਹੇ।

ਮੇਰੀਆਂ ਯਾਦਾਂ ਵਿਚ ਮੇਰੀ ਮਾਤਾ ਜੀ ਹਮੇਸ਼ਾ ਹੀ ਮੇਰੇ ਕੰਨਾਂ ਵਿਚ ਗੁਰੂ ਗ੍ਰੰਥ ਸਾਹਿਬ ਤੋਂ ਗੁਰਬਾਣੀ ਦਾ ਪਾਠ ਕਰਦਿਆਂ ਰਹੀਆਂ। ਅਮਿਤਾਭ ਬੱਚਨ ਨੇ ਲਿਖਿਆ ਕਿ ਕਿਉਂਕਿ ਮੈਂ ਅਪਣੀ ਜ਼ਿੰਦਗੀ ਸਾਫ਼ ਅਤੇ ਸਾਫ਼ ਜ਼ਮੀਰ ਨਾਲ ਬਤੀਤ ਕੀਤੀ ਹੈ ਮੈਂ ਮਹਾਨ ਸਿੱਖ ਗੁਰੂਆਂ ਪ੍ਰਤੀ ਅਪਣੀ ਸ਼ਰਧਾ ਅਤੇ ਸਿੱਖਾਂ ਨਾਲ ਅਪਣਾ ਨਜ਼ਦੀਕੀ ਤੇ ਮਾਣ ਮਹਿਸੂਸ ਕਰਦਾ ਹਾਂ। ਮੈਂ ਉਮੀਦ ਕਰਦਾ ਹਾਂ ਕਿ ਸਿੱਖ ਕੌਮ ਵਿਚ ਮੇਰੇ ਵਿਰੁਧ ਪ੍ਰਚਾਰੀਆਂ ਗਈਆਂ ਸਾਰੀਆਂ ਬੇਬੁਨਿਆਦ, ਸ਼ੱਕੀ ਅਤੇ ਮੰਦਭਾਗੀਆਂ ਗ਼ਲਤ ਫ਼ਹਿਮੀਆਂ ਨੂੰ ਦੂਰ ਕਰੇਗਾ।

ਜੀ.ਕੇ. ਸਿਆਸੀ ਲਾਹਾ ਲੈਣ ਲਈ ਸ਼ਰਧਾਲੂਆਂ ਦੀਆਂ ਭਾਵਨਾਵਾਂ ਨਾਲ ਖਿਲਵਾੜ ਨਾ ਕਰੇ : ਆਰ.ਐਸ. ਸੋਢੀ

ਇਕ ਨਿਜੀ ਚੈਨਲ ਨੂੰ ਦਿਤੀ ਗਈ ਇੰਟਰਵਿਊ ਦੌਰਾਨ ਦਿੱਲੀ ਹਾਈ ਕੋਰਟ ਦੇ ਸੇਵਾ ਮੁਕਤ ਜੱਜ ਜਸਟਿਸ ਆਰ ਐਸ ਸੋਢੀ ਨੇ ਜੀ ਕੇ ’ਤੇ ਵਿਅੰਗ ਕਸਦਿਆਂ ਕਿਹਾ ਕਿ ਜੀ ਕੇ ਨੂੰ ਕੋਈ ਅਧਿਕਾਰ ਨਹੀਂ ਕਿ ਉਹ ਕਿਸੀ ਸ਼ਰਧਾਲੂ ਵਲੋਂ ਗੁਰੂ ਘਰ ਵਿਚ ਦਿਤੇ ਗਏ ਦਾਨ ਨੂੰ ਵਾਪਸ ਲੈਣ ਲਈ ਸਿਆਸੀ ਡਰਾਮਾ ਕਰੇ। ਉਨ੍ਹਾਂ ਕਿਹਾ ਕਿ ਜੇਕਰ ਕੋਈ ਇਨਸਾਨ ਗੁਰੁ ਘਰ ਵਿਚ ਦਾਨ ਦਿੰਦਾ ਹੈ ਤਾਂ ਉਸ ਵਿਅਕਤੀ ਅਤੇ ਗੁਰੂ ਵਿਚਲਾ ਮਾਮਲਾ ਹੈ ਅਤੇ ਕਿਸੀ ਵੀ ਕਮੇਟੀ ਦੇ ਪ੍ਰਧਾਨ ਜਾਂ ਸਾਬਕਾ ਪ੍ਰਧਾਨ ਨੂੰ ਇਹ ਅਧਿਕਾਰ ਨਹੀਂ ਕਿ ਉਹ ਉਸ ਦਾਨ ਦਿਤੀ ਗਈ ਰਾਸ਼ੀ ਨੂੰ ਪ੍ਰਵਾਨ ਕਰੇ ਜਾਂ ਨਾ ਕਰੇ। ਉਨ੍ਹਾਂ ਮਨਜੀਤ ਸਿੰਘ ਜੀ ਕੇ ਨੂੰ ਤਾੜਨਾ ਕੀਤੀ ਕਿ ਉਹ ਸਿਆਸੀ ਲਾਹਾ ਲੈਣ ਲਈ ਸ਼ਰਧਾਲੂਆਂ ਦੀਆਂ ਭਾਵਨਾਵਾਂ ਨਾਲ ਖਿਲਵਾੜ ਨਾ ਕਰੇ।